އުރީދޫ ދިވެހި ޕްރިމިއާ ލީގުގައި ރޭ ދިހަ މީހުންނާއެކު ކުޅުނު ވިކްޓަރީ ސްޕޯޓްސް ކްލަބް އަތުން 3-2 އިން މޮޅުވެ، ކްލަބް ވެެެލެންސިއާ މި ސީޒަންގެ ލީގުގައި ފުރަތަމަ ތިން ޕޮއިންޓް ހޯދައިފި އެވެ.
ލީގުގައި މި މެޗުގެ ކުރިން ކުޅުނު ތިން މެޗުން ވެސް ބަލިވެފައި އޮތް ވެލެންސިއާ އިން މެޗުގެ 13 ވަނަ މިނިޓުގައި ލީޑު ނެގީ ނިއު ރޭޑިއަންޓް އިން އެ ޓީމަށް ބަދަލުވި އަކުރަމް އަބްދުލް ގަނީ ޖެހި ލަނޑުންނެވެ. ޕެނަލްޓީ އޭރިޔާ ބޭރުން ލިބުނު ހިލޭޖެހުމަކުން އަކުރަމް ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ.
އެކަމަކު ފުރަތަމަ ހާފު ނިމެން ކައިރިވެފައިވަނިކޮށް، ވިކްޓަރީން ނަތީޖާ އެއްވަރުކުރީ އަހުމަދު ނިޔާޒް (ނިޔާ) ޖެހި ލަނޑުންނެވެ. ނިއު އިން ވިކްޓަރީ އަށް ބަދަލުވި ނިޔާ ވަނީ ޕެނަލްޓީ އޭރިޔާ ތެރެއިން ލިބުނު ބޯޅަ ގޯލަށް އަމާޒުކޮށްލައިފަ އެެވެ.
މެޗުގެ 59 ވަނަ މިނިޓުގައި ވިކްޓަރީން ލީޑު ނެގީ ނައިޖީރިއާގެ މިޑްފީލްޑަރު ޗިންޑާ ޗިޒީ ކަކާ ޖެހި ލަނޑުންނެވެ. ޕެނަލްޓީ އޭރިޔާ ބޭރުން ކަކާ ފޮނުވާލި ބާރު ޝޮޓް އަމާޒުވީ ގޯލުގެ މަތީ ކަނަށެވެ. މިއީ ލީގުގައި މިހާތަނަށް ފެނުނު އެންމެ ރީތި އެއް ލަނޑެވެ.
ވިކްޓަރީ މެޗުގެ ކޮންޓުރޯލް އަތުލި ނަމަވެސް، އެ ޓީމަށް މައްސަލަ ދިމާވީ މެޗުގެ 66 ވަނަ މިނިޓުގައި ބިދޭސީ މިޑްފީލްޑަރު އަބްދުލް ކާދެރް ކުއަޓާރާ އަށް ރެފްރީ އިސްމާއިލް އިޒުހާން ދެވަނަ ރީނދޫ ކާޑާއެކު ރަތްކާޑު ދެއްކުމުންނެވެ.
މެޗުގެ 71 ވަނަ މިނިޓުގައި ވެލެންސިއާ އިން ނަތީޖާ އެއްވަރުކުރީ އަހުމަދު ރިލްވާން (ރިލޭ) ޖެހި ލަނޑުންނެވެ. ޕެނަލްޓީ އޭރިޔާ ތެރެއިން ލިބުނު ބޯޅަ މެއިން ކޮންޓުރޯލްކޮށްލުމަށް ފަހު، ރިލޭ ވަނީ ގޯލަށް ބޯޅަ އަމާޒުކޮށްލައިފަ އެވެ.
ވެލެންސިއާ އިން ލީޑު ނެގީ 79 ވަނަ މިނިޓުގައި ބަލްގޭރިއާގެ ފޯވަޑް މިރްޗޭވް ވްލަޑިސްލަވް ޖެހި ލަނޑުންނެެވެ. އަކުރަމް ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ މިރްޗޭވް ވަނީ ބޮލުން ގޯލަށް އަމާޒުކޮށްލައިފަ އެވެ.
މެޗަށް ފަހު ވެލެންސިއާގެ ކޯޗު މުހައްމަދު އިގުބާލް ބުނީ މެޗުން މޮޅުވުމަކީ ވެެލެންސިއާ އަށް ލިބުނު ވަރަށް ބޮޑު ހިތްހަމަޖެހުމެއް ކަމަށެވެ.
"މެޗުގެ ފުރަތަމަ ވިއްސަކަށް މިނިޓު ވެލެންސިއާ އިން ވަރަށް ރަނގަޅަށް ކުޅުނު. އެކަމަކު ޖުމްލަކޮށް ބަލާއިރު އުންމީދުކުރި ވަރަކަށް ޓީމަކަށް ނުކުޅެވޭ. އެކަމަކު މި މެޗުން މުހިންމީ ތިން ޕޮއިންޓް. ނުވެ އޮތް ކަންތައް މިވީ. އެހެންވީމަ ކުރިއަށް އޮތް މެޗުތަކުގައި ރަނގަޅުވާނެ،" އިގުބާލް ބުންޏެވެ.
އިގުބާލް ބުނީ ވިކްޓަރީ ދިހަ ކުޅުންތެރިންނަށް މަދުވި ހިސާބުން ވެލެންސިއާ އަށް ވަރަށް ބޮޑު އެޑްވާންޓޭޖެއް ލިބުނު ކަމަށާއި ވެލެންސިއާ އިން އެ އެޑްވާންޓޭޖުގެ ބޭނުން ހިފި ކަމަށެވެ
މެޗަށް ފަހު ވިކްޓަރީގެ ކޯޗު އަހުމަދު ނާޝިދު (ނާދު) ވަނީ މެޗުގެ ރެފްރީ އިޒުހާނަށް ވަަރަށް ބޮޑަށް ފާޑުކިޔައިފަ އެވެ.
"ފުރަތަމަ ވެސް ހަމަ ރެފްރީ އަށް ސާބަސްކިޔާނީ. ރެފްރީން ވަރަށް މަސައްކަތްކޮށްފި. ހީވީ ބަޔަކު ބުނެގެން ވަކި ޓީމެއް މޮޅުކޮށްދޭން ރެފްރީން އުޅުނުހެން،" ނާދު ބުންޏެވެ.
ނާދު ބުނީ ވިކްޓަރީގެ ކުއަޓާރާ އަށް ރަތްކާޑު ދެއްކި ހިސާަބަށް ވިކްޓަރީން ރަނގަޅަށް ކުޅުނު ކަމަށެވެ. އަދި މެޗުން ބަލިވި އެންމެ ބޮޑު ސަބަބަކީ އެ ރަތްކާޑު ކަމަށެވެ.