ރ. އަތޮޅު މާކުރަތުގެ ދެ އިދާރާއެއްގެ ތިޖޫރީ ވަގަށްނެގި މައްސަލާގައި ހަތަރު މީހަކު ހައްޔަރުކޮށްފި އެވެ.
ފުލުހުން ބުނީ، އެމައްސަލައިގެ ތަހުގީގަށް ކޯޓު އަމުރެއްގެ ދަށުން ހަތަރު މީހަކު ހައްޔަރުކޮށްފައިވާ ކަމަށެވެ. ހައްޔަރުކޮށްފައިވަނީ 21 އަހަރުގެ ދެމީހަކާއި 19 އަހަރުގެ މީހަކާއި 62 އަހަރުގެ މީހެކެވެ.
މާކުރަތު ކައުންސިލް މެންބަރު ހަސަން އަލީ އިއްޔެ "އަވަސް"އަށް ވިދާޅުވީ ބުރާސްފަތި ދުވަހުގެ ރޭގެ ވަގުތެއްގައި މާކުރަތު ކައުންސިލަށް ބަޔަކު ވަދެ ތިޖޫރީ ފަޅާލައި ފައިސާތައް ވަގަށް ނަގާފައިވާ ކަމަށާއި ސިއްހީ މަރުކަޒަށް ވެސް ވަދެ ތިޖޫރީ ވަގަށް ނަގާފައިވާ ކަމަށެވެ. އަދި އެ ރަށުގެ މެޖިސްޓްރޭޓަށް ވެސް ބަޔަކު ވަދެފައިވާ ކަމުގެ ނިޝާންތައް ހުރި ކަމަށެވެ.
އޭނާ ވިދާޅުވީ ކައުންސިލުގެ ތިޖޫރީ ފަޅާލައި 83،000 އަކަށް ރުފިޔާ ވަގަށް ނަގާފައިވާ ކަމަށެވެ. އަދި ސިއްހީ މަރުކަޒުގެ ތިޖޫރީގައި 15،000 ރުފިޔާ ހުންނާނެ ކަމަށް އެ އިދާރާ އިން ބުނާ ކަމަށް ހަސަން ވިދާޅުވި އެވެ. އެ ތިން ތަނުގެ ތެރެއިން ސެކިއުރިޓީއަކު ހުރީ ކައުންސިލްގައި ކަމަށާއި ނަމަވެސް ވަގަށް ވަދެފައި ވަނީ އެ މީހާއަށް ނޭނގި ކަމަށް ހަސަން ވިދާޅުވި އެވެ.