ރ. މާކުރަތުގެ ތިން އިދާރާއެއް ފަޅާލައި ގިނަ އަދަދެއްގެ ފައިސާ ވަގަށް ނެގި މައްސަލާގައި އިތުރު ދެ މީހަކު ހައްޔަރުކޮށްފި އެވެ.
ފުލުހުން ބުނީ، އެ ދެ މީހުން ވެސް ހައްޔަރުކޮށްފައިވަނީ މިއަދުގެ ވަގުތެއްގައި ކަމަށެވެ. ހައްޔަރުކޮށްފައިވަނީ އުމުރުން 34 އަހަރުގެ ފިރިހެނަކާއި 38 އަހަރުގެ ފިރިހެނެއް ކަމަށެވެ.
ފުލުހުން މީގެ ކުރިން ވަނީ ކޯޓު އަމުރެއްގެ ދަށުން ދަށުން ހަތަރު މީހަކު ހައްޔަރުކޮށްފަ އެވެ. ހައްޔަރުކޮށްފައިވަނީ 21 އަހަރުގެ ދެމީހަކާއި 19 އަހަރުގެ މީހަކާއި 62 އަހަރުގެ މީހެކެވެ. މިމައްސަލާގައި މިހާތަނަށް ހައްޔަރު ކުރި މީހުންގެ އަދަދު ހައެކެވެ.
މާކުރަތު ކައުންސިލް މެންބަރު ހަސަން އަލީ އިއްޔެ "އަވަސް"އަށް ވިދާޅުވީ ބުރާސްފަތި ދުވަހުގެ ރޭގެ ވަގުތެއްގައި މާކުރަތު ކައުންސިލަށް ބަޔަކު ވަދެ ތިޖޫރީ ފަޅާލައި ފައިސާތައް ވަގަށް ނަގާފައިވާ ކަމަށާއި ސިއްހީ މަރުކަޒަށް ވެސް ވަދެ ތިޖޫރީ ވަގަށް ނަގާފައިވާ ކަމަށެވެ. އަދި އެ ރަށުގެ މެޖިސްޓްރޭޓަށް ވެސް ބަޔަކު ވަދެފައިވާ ކަމުގެ ނިޝާންތައް ހުރި ކަމަށެވެ.
އޭނާ ވިދާޅުވީ ކައުންސިލުގެ ތިޖޫރީ ފަޅާލައި 83،000 އަކަށް ރުފިޔާ ވަގަށް ނަގާފައިވާ ކަމަށެވެ. އަދި ސިއްހީ މަރުކަޒުގެ ތިޖޫރީގައި 15،000 ރުފިޔާ ހުންނާނެ ކަމަށް އެ އިދާރާ އިން ބުނާ ކަމަށް ހަސަން ވިދާޅުވި އެވެ. އެ ތިން ތަނުގެ ތެރެއިން ސެކިއުރިޓީއަކު ހުރީ ކައުންސިލްގައި ކަމަށާއި ނަމަވެސް ވަގަށް ވަދެފައި ވަނީ އެ މީހާއަށް ނޭނގި ކަމަށް ހަސަން ވިދާޅުވި އެވެ.