ރ. މާކުރަތުގެ ތިން އިދާރާއެއް ފަޅާލައި ގިނަ އަދަދެއްގެ ފައިސާ ވަގަށް ނެގި މައްސަލާގައި ހައްޔަރުކުރި މީހުންގެ ބަންދުގެ މުއްދަތު ކޯޓުން ޖަހައިފި އެވެ.
ފުލުހުން ބުނީ، ވައްކަމުގެ މައްސަލާގައި ހައްޔަރު ކުރު މީހުންގެ މުއްދަތުޖެހުމަށް މިއަދު ރ. އިންނަމާދޫ ކޯޓަށް ހާޒިރުކޮށްފައިވާ ކަމަށެވެ. އެގޮތުން ދެމީހެއްގެ ބަންދަށް 10 ދުވަސް ޖަހާފައިވާއިރު، ބާކީތިބި މީހުންގެ ބަންދަށް ކޯޓުން ވަނީ 15 ދުވަސް ޖަހާފަ އެވެ.
މި މައްސަލާގައި ހައްޔަރުކޮށްފައިވަނީ އުމުރުން 34 އަހަރުގެ މީހަކާއި 38 އަހަރުގެ މީހަކާއި 21 އަހަރުގެ ދެމީހަކާއި 19 އަހަރުގެ މީހަކާއި 62 އަހަރުގެ މީހެކެވެ. މިމައްސަލާގައި މިހާތަނަށް ހައްޔަރު ކުރި މީހުންގެ އަދަދު ހައެކެވެ. އޭގެ ތެރެއިން ބަންދުގެ މުއްދަތަށް 10 ދުވަސް ޖަހާފައިވަނީ އުމުރުން 19 އަދި 21 އަހަރުގެ ދެމީހުނަށެވެ.
މާކުރަތު ކައުންސިލް މެންބަރު ހަސަން އަލީ އިއްޔެ "އަވަސް"އަށް ވިދާޅުވީ ބުރާސްފަތި ދުވަހުގެ ރޭގެ ވަގުތެއްގައި މާކުރަތު ކައުންސިލަށް ބަޔަކު ވަދެ ތިޖޫރީ ފަޅާލައި ފައިސާތައް ވަގަށް ނަގާފައިވާ ކަމަށާއި ސިއްހީ މަރުކަޒަށް ވެސް ވަދެ ތިޖޫރީ ވަގަށް ނަގާފައިވާ ކަމަށެވެ. އަދި އެ ރަށުގެ މެޖިސްޓްރޭޓަށް ވެސް ބަޔަކު ވަދެފައިވާ ކަމުގެ ނިޝާންތައް ހުރި ކަމަށެވެ.
އޭނާ ވިދާޅުވީ ކައުންސިލުގެ ތިޖޫރީ ފަޅާލައި 83،000 އަކަށް ރުފިޔާ ވަގަށް ނަގާފައިވާ ކަމަށެވެ. އަދި ސިއްހީ މަރުކަޒުގެ ތިޖޫރީގައި 15،000 ރުފިޔާ ހުންނާނެ ކަމަށް އެ އިދާރާ އިން ބުނާ ކަމަށް ހަސަން ވިދާޅުވި އެވެ. އެ ތިން ތަނުގެ ތެރެއިން ސެކިއުރިޓީއަކު ހުރީ ކައުންސިލްގައި ކަމަށާއި ނަމަވެސް ވަގަށް ވަދެފައި ވަނީ އެ މީހާއަށް ނޭނގި ކަމަށް ހަސަން ވިދާޅުވި އެވެ.