ފުވައްމުލައް ސިޓީ ކައިރިން އިއްޔެ ފެނުނު ސޯމާލިއާ މީހުން ރާއްޖެ އައި ގޮތް ބަލައި ތަހުގީގުކުރަމުންދާ ކަމަށް ފުލުހުން ބުނެފި އެވެ.
ސޯމާލިއާ ތިން މީހުން އިއްޔެގެ ވަގުތެއްގައި ކޯސްޓްގާޑުގެ އުޅަނދަކުން ހިފެހެއްޓީ ފުވައްމުލަކުގެ ހުޅަނގު އުތުރުން 10 މޭލު ބޭރުންނެވެ.
މި ތިން މީހުން އަތުލައިގަތީ ސޯމާލިއާގެ މީހުން އާންމުކޮށް ބޭނުންކުރާ ވައްތަރުގެ "ސްކިފް" ޑިންގީއެއްގައި ތިއްބަ އެވެ.
މި މީހުން ފުލުހުންނާ ހަވާލުކޮށްފައިވާތީ ފުލުހުން މިއަދު ބުނީ މި މީހުން ރާއްޖެ އައި ގޮތް ބެލުމަށް ތަހުގީގު ފަށާފައިވާ ކަމަށެވެ.
މި މީހުންނާ ގުޅޭ މައުލޫމާތު އެއްކޮށް، އިދާރާތަކާ ގުޅިގެން ފިޔަވަޅު އަޅަމުން ގެންދާނެ ކަމަށްވެސް ފުލުހުން ބުންޏެވެ.
ސޯމާލިއާގެ މީހުންނަކީ ކުދި ޑިންގީ ތަކުގައި ކަނޑަށް ނިކުމެ ބޮޑެތި އުޅަނދުތައް ރަހީނުކޮށް ކަނޑުފޭރުމުގެ އަމަލުތައް ހިންގުމުގައި މުޅި ދުނިޔެއަށް މަޝްހޫރު ނުރައްކާތެރި ބައެކެވެ. ނަމަވެސް ރާއްޖެ އިން ފެނުނީ ކަނޑުފޭރޭ ބައެއް ކަމެއް އަދި އެނގިފައެއް ނުވެ އެވެ.