ފޯނުން ގުޅައި ޕާރުސަލެއް ހަވާލުކޮށް، އޭގެ ޝިޕިން ޗާޖަށް މަކަރާއި ހީލަތުން މީހުންގެ އަތުން ފައިސާ ހޯދުމުގެ މައްސަލަތައް އިތުރުވެފައިވާ ކަމަށް ފުލުހުން ބުނެފި އެވެ.
ފުލުހުން ވަނީ އޭގެ އެއްމައްސަލަ ހިއްސާކޮށްފަ އެވެ. ބުނީ ސަރުކާރުގެ މުއައްސަސާއެއްގެ ޒިންމާދާރު ވަޒީފާއެއްގައި ހުރި މީހެއްގެ ނަމުގައި މީހަކަށް ފޯނުން ގުޅައި މީހަކާ ހަވާލުކޮށްގެން މާލެ އިން ތިން ފޮށިގަނޑު ފޮނުވާނެ ކަމަށް ބުނި ކަމަށެވެ. އަދި އެތަކެތި ހަވާލު ކުރުމުން އޭގެ ސިޕިން ޗާޖުގެ ގޮތު 13،500 ރުފިޔާ ހަވާލު ކޮށްދިނުމަށެވެ.
އެ ފޮށިގަނޑުތައް ހިފައިގެންދާ މީހާއަށް އެއަދަދަށް ފައިސާ ދެއްކުމަށްފަހު އެފޮށިގަނޑުތައް ހަވާލުކުރަން ޖެހޭ ފަރާތާއި ބައްދަލު ކުރުމުން އޭނާގެ އެއްޗެއް ނޫން ކަމަށް ބުނެފައިވާ ކަމަށް ވެސް ފުލުހުން ބުންޏެވެ. އަދި އެފޮށިގަނޑުތައް ފުލުހުން ބަލާ ފާސް ކުރުމުން އޭގައި ހުރީ ކުނި ބުނި ކަމަށްވެސް ފުލުހުން ބުންޏެވެ.
ފުލުހުން ބުނީ، އެކަމަކީ މަކަރާއި ހީލަތުން ފައިސާ ހޯދަން ކޮށްފައިވާ ކަމެއް ކަމަށް ބެލެވޭ ކަމަށާއި އެކަމަށް ސަމާލު ވުމަށެވެ. އެއްވެސް މީހަކު ފޯނުން ގުޅާފައި ގިނަ އަދަދެއްގެ ފައިސާ އަތުލާފައި ޕާރުސަލަކާއި ހަވާލުވާން އެދޭ ނަމަ އެފައިސާ ނުދީ އެކަން ފުލުހަށް ރިޕޯޓް ކުރުމަށްވެސް އެދިފައި ވެއެވެ.