ގއ. ވިލިނގިލީގައި ވަގުން ހިފަން ޖަހާފައިހުރި ކަރަންޓް ދަންތުރައެއްގައި ޖެހި މަރުވި ހުސެއިންް ސިމާދުގެ މައްސަލާގައި ތުހުމަތުވާ މީހާ މިހާތަނަށްވެސް ހައްޔަރުކޮށްފައިނުވާ ކަމަށް ފުލުހުން ބުނެފި އެވެ.
ސިމާދު މަރުވެފައިވަނީ މިދިޔަ މަހުގެ 17 ދުވަހު ހަރުގޭގައި ޖަހާފައި ހުރި ކަރަންޓް ދަންތުރައިގައި ޖެހިގެނެވެ. ސިމާދަކީ އައްޑޫ އަތޮޅަށް ނިސްބަތްވާ މީހެކެވެ. ސިމާދަކީ އައްޑު އަތޮޅު މީހެއް ނަމަވެސް އޭނާ ދިރިއުޅެމުން އައީ ވިލިނގިލީގަ އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ވަނީ ތިން މަރަކާއި ގުޅޭ ތަފްސީލްތައް ހާމަކޮށްފަ އެވެ. އެގޮތުން ސިމާދުގެ މަރުގެ މައްސަލައިގެ ތަފްސީލްތައް ހާމަކުރައްވަމުން ސީރިއަސް އަދި އޮގަނައިޒް ކްރައިމް ޑިޕާޓްމެންޓްގެ ހެޑް ސްޕްރިންޓެންޑް އޮފް ޕޮލިސް ހަސަން ޝިފާއު ވިދާޅުވީ، ކަރަންޓް ދަންތުރައިގައި ޖެހި މަރުވި ސިމާދު ގެއްލިގެން ހަބަރެއް ނުވެގެން އޭނާ ފުލުހުންގެ ބެލުމުގެ ދަށުގައި ހުރިތޯ ބެލުމަށް އޭނާގެ އަންހެނުން ފުލުހުންގެ އިދާރާއަށް ހާޒިރުވެ ބަލާފައިވާ ކަމަށެވެ. އަދި އޭނާގެ އަންހެނުން ނެތް ކަމަށް ބުނަމުން ދިޔަ ކަމަށްވެސް ޝިފާއު ވިދާޅުވި އެވެ.
ޝިފާއު ވިދާޅުވީ، ސިމާދުގެ ހަބަރެއް ނުވެގެން އެނާގެ އަންހެނުން އެރޭގެ 11:00ގައި ގެއްލިގެން ފުލުހަށް ރިޕޯޓް ކޮށްފައިވާ ކަމަށެވެ. އަދި އޭގެ ފަހުންވެސް ރަށުގެ ބައެއް ސަރަހައްދުތަކުން އޭނާ ފެނިފައިވާ ކަމުގެ މައުލޫމާތު ލިބުނު ކަމަށެވެ. ސިމާދަކީ އާންމު ގޮތެއްގައި އާއިލާއަށް ނާންގައި ގިނައިރުވަންދެން ބޭރުގައި އުޅޭ މީހެއް ކަމަށްވެސް ޝިފާއު ވިދާޅުވި އެވެ.
"17 ވަނަ ދުވަހުގެ ހެނދުނު ސައީދު ހަސަން ފުލުހަށް ހާޒިރުވެ، ހަރުގެ ތެރެއަށްވާ ގޮތަށް ޓިނުގަނޑުގެ ދޭތެރޭގައި މީހަކު ތާށިވެފައިވާ ކަމަށްބުނެ މައްސަލަ ހުށަހެޅުމުން ފުލުހުން ހާދިސާ ހިނގި ތަނަށް ގޮސް ބެލިއިރު، ހަރުގޭގެ އުތުރުފަރާތު މެދެއްހާ ހިސާބުގައި މީހަކު ތާށިވެފައި އޮތްވާ ފެނިފައިވޭ، ފެނުނު އިރު ހަރަކާތެއްނެތް،" ޝިފާއު ވިދާޅުވި އެވެ.
ޝިފާއު ވިދާޅުވީ، ހަރުގެ އަށް ހަމައެކަނި ވަދެނިކުމެވޭ ގޮތަށް ހުރިތަނަކީ ސިމާދުއޮތް ބާގަނޑު ކަމަށާއި ސިމާދުއޮތް ތަނުން އިތުރު މީހަކަށް ވަދެވޭނެ ޖާގައެއްނެތް ކަމަށެވެ. އަދި އެހެން ހުރިހާ ތަނެއް ހުރިހާ ތަޅުލާފައި ކަމަށެވެ.
ޝިފާއު ވިދާޅުވީ، ތަހްގީގް ކުރުމުން ސިމާދު ހަރުގެއަށް ވަދެ އޮތް ބާގަނޑާ ދިމާލުގައި ކަރަންޓް ދީފައިވާ ދެނަރު އޮތް ކަމަށެވެ. އެނަރުގަނޑު ފެނިފައިވަނީ ސިމާދުއޮތް ދިމާލާ 40 ވަރަކަށް ފޫޓް ދުރުން ކަމަށެވެ. ކަރަންޓްގައި ޖެހުމުން ނަރުގަނޑު ދުރަށް އެއްލާލާފައިވާ ކަމަށާއި އެނަރުގަނޑުގައި ސިމާދުގެ ޑީއެންއޭވެސް ފެނިފައިވާ ކަމަށް ޝިފާއު ވިދާޅުވި އެވެ.
ސަފާރީއެއް ބަނުމަށް ހަދާފައިވާ ހަރުގެ ބަލަހައްޓަމުން ދިޔައީ ސައީދު ހަސަން ކަމަށާއި އޭނާއަކީ ފެނަކާގައި 10 އަހަރު ދުވަސް ވަންދެން މަސައްކަތް ކޮށްފައިވާ ފަރާތެއް ކަމަށެވެ. އަދި ކަރަންޓްގެ ދާއިރާގައި 40 އަހަރަށްވުރެ ގިނަ ދުވަހުގެ ތަޖްރިބާހުރި ފަރާތެއް ކަމަށްވެސް ޝިފާއު ވިދާޅުވި އެވެ.
އޭނާ ވިދާޅުވީ، މައްސަލާގައި ތުހުމަތުވާ ސައީދު ހަަސަން މިހާތަނަށްވެސް ހައްޔަރު ކޮށްފައިނުވާ ކަމަށާއި ނަމަވެސް ސުވާލުކޮށްފައިވާ ކަމަށެވެ. އޭނާ މިހާތަނަށް ހައްޔަރު ކޮށްފައިނުވަނީ ބަންދުގައި ބަހައްޓައިގެން ތަހްގީގް ކުރަންޖެހޭ ފަރާތަކަށް ނުވާތީ ކަމަށެވެ. އަދި އޭނާއަށް ހެއްކަށް ނުފޫޒު ފޯރުވާނެ ކަމަށް ގަބޫލު ނުކުރެވޭތީ ކަމަށެވެ.
އެމައްސަލަ އަދިވެސް އަންނަނީ އިތުރަށް ތަހްގީގް ކުރަމުން ކަމަށާއި އެމައްސަލަ ވަރަށް ސީރިއަސް މައްސަލައެއްގެ ގޮތުގައި ފުލުހުން ބަލަމުން އަންނަ ކަމަށްވެސް އޭނާ ވިދާޅުވި އެވެ.
ފުލުހުން ވަނީ އެމްއެމްއޭ ކައިރިން ހަމަލާދީ މަރާލި ގދ. ފަރެސްމާތޮޑާއަށް އުފަން އުމުރުން 18 އަހަރުގެ އިބްރާހިމް އާގިލުގެ މަރާއި ގުޅޭ ތަފްސީލްތައްވެސް ހާމަކޮށްފަ އެވެ. އެގޮތުން ސަބް އިންސްޕެކްޓަރު އޮފް ޕޮލިސް މުހައްމަދު ސާމިހް ވިދާޅުވީ، އާގިލްގެ މަރާއި ގުޅިގެން ތިން މީހަކު ހައްޔަރު ކުރެވުނު ކަމަށެވެ. އެމީހުންގެ މައްޗަށް ދައުވާ ކުރުމަށް ކުރިމިނަލް ކޯޓަށް ފޮނުވާފައިވާ ކަމަށްވެސް ސާމިހް ވިދާޅުވި އެވެ.
އެމައްްސަލާގައި ހައްޔަރުކޮށްފައިވަނީ ސ. ހިތަދޫ، 19 އަހަރުގެ އަލީ މިޖްވާދު މާޖިދު އިބްރާހިމާއި ލ. ފޮނަދޫ، 19 އަހަރުގެ ހަމްދޫން އަމްޖަދާއި ހއ. ސްނޯޕާކް އިބްރާހިމް ވިޝާމެވެ. އެތިން މީހުންވެސް ތިބީ ކަރެކްޝަނަލް ސާވިސްގެ ބަންދުގައި ކަމަށް ސާމިހް ވިދާޅުވި އެވެ.
މީގެ އިތުރުން ފުލުހުން ވަނީ، އޮޓޯ ގަރާޖް ކައިރިން މިދިޔަ އަހަރުގެ އޮކްޓޯބަރު މަހުގެ 11 ވަނަ ދަވަހު ވަޅިން ހަމަލާދީ މަރާލި 14 އަހަރުގެ އިސްމާއިލް ޝައްފާން ޝަރީފްގެ މަރުގެ ތަހްގީގްތައްވެސް ހާމަކޮށްފަ އެވެ. އެގޮތުން އޭނާގެ އަށް ތަނަކަށް ވަޅިން ހަމަލާދީފައިވާ ކަމަށެވެ. އަދި އެމައްސަލާގައި ހަތަރު މީހަކު ހައްޔަރުކޮށްފައިވާ ކަމަށްވެސް ސާމިހް ވިދާޅުވި އެވެ.
އެގޮތުން ހައްޔަރުކޮށްފައިވަނީ، ސ. ހިތަދޫ 27 އަހަރުގެ މުހައްމަދު އައިމަންއާ މަރަދޫ، 19 އަހަރުގެ ހަސަން ނަބާހާއި ހިތަދޫ، 27 އަހަރުގެ ހުސެން ނިހާދު އަދި 19 އަހަރުގެ ހުސެން ޖައިލަމެވެ. އެމީހުންގެ މައްސަލަތައްވެސް މިހާރު ޝަރީއަތަށް ފޮނުވާފައިވާ ކަމަށާއި އެހަތަރު މީހުންވެސް ތިބީ ބަންދުގައި ކަމަށް ސާމިހް ވިދާޅުވި އެވެ.