ވެރިކަމަށް 90 ދުވަސް ހަމަވާއިރު، ޖަލުގައި ހުރި މީހަކު މިނިވަން ކުރުމަށް ނިންމެވުނު ނިންމެވުމަކާ މެދު މިހާރުވެސް ހިތާމަކުރައްވާ ކަމަށާއި އެކަން ނުކުރެއްވުނު ނަމައޭ ހިތައް އަރާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރާއްޖެ ޓީވީގެ ހެނދުނު ޕްރޮގްރާމް "ފަށާއިރު"ގައި ވާހަކަދައްކަވަމުން ރައީސް ސޯލިހު ވިދާޅުވީ، އެމަނިކުފާނުގެ ވެރިކަމުގެ ކުރީ ކޮޅު ގާނޫނީ އިމުގެ ތެރެއިން ނަމަވެސް ނިންމެވުނު ނިންމެވުމަކުން މިއަދާ ހަމައަށްވެސް އެކަމާއި ހިތާމަކުރައްވާ ކަމަށެވެ. އެމަނިކުފާނު ވިދާޅުވި ގޮތުގައި، މާ އަވަހަށް ކުރެއްވުނީތީ ހިތާމަކުރައްވާ ކަމަކީ ޖަލުގައި ހުރިި މީހަކު ގާނޫނީ އިމުގެ ތެރެއިން ނަމަވެސް ޖަލުން މިނިވަން ކުރެއްވުން ކަމަށެވެ. އެހެން ނަމަވެސް އެއީ ކާކު ކަމެއް އެމަނިކުފާނު ވިދާޅެއް ނުވެ އެވެ.
"އެ ނިންމުން އެގޮތަށް ނުނިންމުނު ނަމައޭ އަޅުގަނޑު ހިތައް އަރާ މިއަދު. މާ އަވަހަށް އެކަން ނުކުރެވުނު ނަމައޭ ހިތައް އަރާ. އެކަމާ އަޅުގަނޑު މިއަދުވެސް ހިތާމަ ކުރަން،" ރައީސް ސޯލިހު ވިދާޅުވި އެވެ. "ނިންމުމެއް ނިންމުމަށް ފަހު، ފަހުން އެކަން ބަދަލުކުރަން ޖެހުނީމަ ލިބޭ ގެއްލުން މާ ބޮޑުވާނެ،"
ރައީސް ސޯލިހުގެ ވެރިކަމުގެ ކުރީކޮޅު ޖަލުން މިނިވަން ކުރީ، ކުޑަ ކުއްޖަކާ ބަދު އަޙުލާގީ އަމަލު ހިންގައިގެން ޖަލަށް ހުކުމްކޮށްފައި ހުރި އެމްޑީޕީގެ އިސް އެކްޓިވިސްޓެއް ކަމަަށްވާ، އިބްރާހިމް ރަޝީދު، ހޯރަ އިއްބެ އެވެ. އެކަމާ ގުޅިގެން ސަރުކާރުގެ ފަރާތްތަކާއި އިދިކޮޅު ފަރާތްތަކުގެ ފާޑުކިޔުން ސަރުކާރަށް އަމާޒުވި އެވެ.
ސަރުކާރުގެ ދުވެލި މަޑުކަމަށް ދެކެވޭ ވާހަކަތަކާ ގުޅިގެން ރައީސް ސޯލިހު ވިދާޅުވީ ކަންކަން މާ އަވަސް އަރުވާލައިގެން ކުރުމަކީ އެމަނިކުފާނު ގެންގުޅުއްވާ އުސޫލެއް ނޫން ކަމަށެވެ. އެމަނިކުފާނު ވިދާޅުވި ގޮތުގައި، ކަންކަން ނިންމަން ވާނީ ވަރަށް ރަނގަޅަށް ބެލުމަށް ފަހު އެންމެ ރަނގަޅު ގޮތަށް ކަމަށެވެ. ކަމެއް ރަނގަޅަށް ކުރަން ވަގުތު ނެގުމަކީ މައްސަލައެއް ކަމަށް ގަބޫލު ނުކުރައްވާ ކަމަށް ވެސް ރައީސް ސޯލިހު ވިދާޅުވި އެވެ.
"ސަރުކާރުގެ ދުވެލި މަޑެއް ނޫން. ވެރިކަމުގެ 100 ދުވަހުގެ ތެރޭގައި ކުރަން ނިންމާފައިވާ ވަރަށް ގިނަ ކަންކަން ކާމިޔާބު ކަމާއެކު އަޅުގަނޑުމެންނަށް މި އޮތީ ނިންމިފައި،" ރައީސް ސޯލިހު ވިދާޅުވި އެވެ.