އަމީނިއްޔާ ސްކޫލްގެ 75 ވަނަ އަހަރީ ދުވަހުގެ ފެއާއަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި އެ މަނިކުފާނުގެ އަނބިކަނބަލުން ރޭ ރިޔާރަތް ކުރައްވައިފި އެވެ.
"އަމީނިއްޔާ ޑައިމަންޑް ޖުބްލީ ފެއާ" ގެ ނަމުގައި ފެއާ ފެށީ އިއްޔެ ހަވީރު އެވެ. އެ ފެއާ އަށް ރައީސްގެ ދެކަނބަލުން ވަޑައިގެންނެވީ ރޭގަ އެވެ. ފެއާއަށް ވަޑައިގެން ފެއާގެ ބައިވެރިންގެ މަސައްކަތްތައް ރައީސްގެ ދެކަނބަލުން ބައްލަވައިލެއްވި އެވެ.
މި ފެއާ އިންތިޒާމްކުރުމުގައި ހަރަކާތްތެރިވި އަމީނިއްޔާ ސްކޫލްގެ އިސް ދަރިވަރު އަދި ފަހުން ސްކޫލްގެ ޕްރިންސިޕަލް ކަން ކުރައަވާފައިވާ ޑރ. އާމާލް އަލީ ވިދާޅުވީ ފެއާއަކީ އަމީނިއްޔާގެ އިސް ދަރިވަރުންނަށް އެމީހުންގެ ވިޔަފާރިތަކާއި ވިޔަފާރީގެ ހުނަރު ދައްކާލުމަށް ދިން ފުރުސަތެއް ކަމަށެވެ.
ފެއާއިން ލިބުނު ފައިސާ ހަރަދުކުރަން ނިންމާފައި ވަނީ ސްކޫލްގައި މި އަހަރު ކުރިއަށް ރާއްވާފައި ހުރި ހަރަކާތްތަކަށެވެ.
އަމީނިއްޔާއކީ ރާއްޖޭގެ އެންމެ ދުވަސްވީ ސްކޫލްތަކުގެ ތެރެއިން އެންމެ ފަހުރުވެރި އެއް ސްކޫލެވެ. އަދި އެއީ ހަމައެކަނި އަންހެން ކުދިންނަށް ހާއްސަކޮށްގެން ކުރިން ހިންގި ހަމައެކަނި ސްކޫލްވެސް މެއެވެ.