ދުބާއީގެ ވަލީއަހުދު ޝެއިހް ހަމްދާން ބިން މުހައްމަދު ބިން ރާޝިދު އަލް މަހްތޫމް، ހަނީމޫނަށް ރާއްޖެ ވަޑައިގެންފި އެވެ.
ޝެއިހް ހަމްދާން މި މަހު ކައިވެނި ބައްލައިގަތުމަށް ފަހު އަނބިކަނބަލުން ޝައިހާޝައިހާ ސައީދު ބިން ތާނީ އަލް މަހްތޫމްއާއެކު ރާއްޖޭގައި ހަނީމޫން ހޭދަ ކުރައްވަމުން ގެންދަވަނީ ނ. އަތޮޅުގައި އޮންނަ މަތީ ފަންތީގެ ރިސޯޓެއް ކަމަށްވާ ވެލާ ޕްރައިވެޓް އައިލެންޑުގަ އެވެ. ހައްމާދު ދަނީ ރާއްޖޭގެ ރީތި މަންޒަރުތައް ސޯޝަލް މީޑިއާގައި ހިއްސާ ކުރައްވަމުންނެވެ.
ހަމްދާން ދުބާއީގެ ވަލީއަހުދުގެ މަގާމަށް އައްޔަން ކުރައްވާފައިވަނީ 2008 ވަނަ އަހަރު އެވެ. އުމުރުން 36 އަހަރުގެ ހަމްދާނަކީ ދުބާއީގެ ޒުވާންގެ ކުރިއެރުމަށް ގިނަ މަސައްކަތްތަކެއް ކުރައްވާ ބޭފުޅެކެވެ. އޭނާއަކީ އެ ގައުމުގެ ޒުވާން ވިޔަފާރިވެރިންގެ ކުރިއެރުމަށް މަސައްކަތް ކުރާ ޖަމާއަަަތެއް ކަމަށްވާ ޝެއިހް މުހައްމަދު ބިން ރާޝިދު އެސްޓަބްލިޝްމަންޓުގެ ވެސް ވެރިޔާ އެވެ.
އަދި އެކްސްޓްރީމް ސްޕޯޓްސްއަށް ލޯބި ކުރައްވާ ބޭފުޅެކެވެ. އެގޮތުން އަސް ރޭސް ޖެއްސެވުމާއި ސްކައި ޑައިވް ކުރުން ފަދަ ގިނަ ކުޅިވަރުތަކެއްގައި ބައިވެރިވެ ވަޑައިގަންނަވަ އެވެ.