އިއްޔެ ބޭއްވި ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގައި މަޖިލީހުގެ ކުރީގެ ރައީސް މާމިގިލީ ދާއިރާގެ މެމްބަރު ގާސިމް އިބްރާހިމާއި، އެ ކޮމިޓީގެ މުގައްރިރު މަރަދޫ ދާއިރާގެ މެމްބަރު އިބްރާހިމް ޝަރީފާއި ދެމެދު ޒުވާބެއް ހިނގައިފި އެވެ.
އެ ކޮމިޓީން އޭރު ދިރާސާ ކުރަމުން ދިޔައީ ރާއްޖެއާއި އިންޑިއިން ގާއިމު ކުރަން އުޅޭ ކުށްވެރިން ބަދަލު ކުރުމުގެ އެއްބަސްވުމާ ގުޅޭ ގޮތުންނެވެ. އެ އެއްބަސްވުމުގައިވާ ގޮތުން، އިންޑިއާއިން ކުށްވެރިއަކު ކަމުގައި ކަނޑައަޅާ މީހަކު، އިންވެސްޓެއް ރާއްޖެއަށް ކޮށްފައިވާނަމަ އެ އިންވެސްޓެއްގެ ފައިސާ އިންޑިއާއިން ހިފެހެއްޓޭނެ ކަމަށެވެ.
މި އެއްބަސްވުމުގައި އެހެން އޮތުމުން ގާސިމް ވިދާޅުވީ ދިވެހިންގެ މިނިވަންކަމާއި އިސްތިގުލާލަށް ބުރޫ އަރާނެ ގޮތަކަށް އެއްބަސްވުން އޮތުމުން އެއީ ބަލައިގަނެވޭނެ ކަމެއް ނޫން ކަމަށެވެ. އަދި އެފަދަ އެއްބަސްވުންތަކުގެ ތެރެއިން ގައުމުން އެހެން ގައުމުތަކަށް "މަޅިފަތި" އަޅުވާ ގޮތް އެނގިވަޑައިގަންނަވާ ކަމަށާއި އެ ފުރުސަތު ދެވިގެން ނުވާނެ ކަމަަށެވެ.
އެ އެއްބަސްވުމާއި މެދު ގާސިމް ހިތްހަމަނުޖެހުން ފާޅުކޮށް، ވާހަކަ ދައްކަން ފެށުމުން، ޝަރީފު ވަނީ ގާސިމަށް ފުރުސަތު ނާރުވާ ކަމަށާއި، ވާހަކަ ދައްކަންވާނީ ފުރުސަތު އެރުވުމުން ކަމަށް ވިދާޅުވެފަ އެވެ. އެއާ އެކު ގާސިމް ވިދާޅުވީ، ފުރުސަތު ނޭރުވިޔަސް ވާހަކަ ދައްކަވާނެ ކަމަށެވެ.
އެއާއެކު ޝަރީފު ވާހަކަ ދައްކަވަން ފެށުމުން ގާސިމް "ކޮން އަޅުގަނޑެއް ކިޔާކަށްހޭ" ބުނުމާއެކު ޝަރީފު ވަނީ އެތަނުގައި ކަން ހިނގާނީ ގާސިމް ބޭނުންހާ ގޮތަކަށް ނޫން ކަަމަށް ވިދާޅުވެފަ އެވެ. އަދި ވާހަކަ ދައްކަންވާނީ ފުރުސަތު ދިނުމުން ކަމަށް ވިދާޅުވެ، އެހެން މެމްބަރަކަށް ވާހަކަ ދައްކަން ފުރުސަތު ދީފަ އެވެ.
އެހެން ނަމަވެސް ގާސިމް ހުއްޓާ ނުލާ ވާހަކަ ދައްކަން ފެށުމުން ޝަރީފު ވަނީ އެކޮމިޓީ ހުއްޓާލަން ޖެހޭނެ ކަމުގެ އިންޒާރުދީފަ އެވެ. އެއާއެކު ގާސިމް ވިދާޅުވީ، "ހުއްޓާލިއަސް އަހަރުންނަށް ވަރިހަމަ" ކަމަށެވެ. އަދި ހަދަން ބޭނުންވާ ގޮތެއް ހަދަންވީ ކަމަށާއި، އެކަމަކީ ޝަރީފު ބޭނުންވާހާ ގޮތަކަށް ކުރިޔަށް ގެންދަން އޭނާގެ އަމިއްލަ މުދަލާއި ތަރިކައެއް ނޫން ކަމަށް ގާސިމް ވަނީ ވިދާޅުވެފަ އެވެ.
ގާސިމް އެގޮތަށް ވިދާޅުވުމުން އަނެއްކާވެސް ޝަރީފު ވިދާޅުވީ ފުރުސަތެއް ދިނީމަ ވާހަކަ ދައްކަންށެވެ. އެހެން ނަމަވެސް ގާސިމް ހުއްޓާ ނުލުމުން ޝަރީފު ވަނީ ގާސިމް ކޮމިޓީ ދޫކުރައްވާ ނިކުންނަން އަންގާފަ އެވެ. ޖަވާބުގައި ގާސިމް ވިދާޅުވީ ނުނިކުންނާނެ ކަމަށެވެ. އެހެން ނަމަވެސް ގާސިމް ވަނީ ފަހުން އެކޮމިޓީ ދޫކުރައްވާ ވަޑައިގެންފަ އެވެ.
އެ އެއްބަސްވުން ދިރާސާ ކުރުމަށްޓަކައި ކުޑަ ކޮމިޓީއެއް ނެގުމަށްފަހު އެ ކޮމިޓީގެ ރިޕޯޓް މައި ކޮމިޓީއަށް ވަނީ ހުށަހަޅާފަ އެވެ. އެހެން ނަމަވެސް އެ އެއްބަސްވުމާއި މެދު ގޮތެއް ނުނިންމި އޮތީ ގާސިމާއި، އިދިކޮޅު މެމްބަރުންގެ ދެކޮޅުހެދުންތަކާއި ގުޅިގެންނެވެ.