އަންނަ އާދީއްތަ ދުވަހު ރިޔޫނިއަންގައި ފަށާ އިންޑިއަން އޯޝަން އައިލެންޑް ގޭމްސްގައި ވާދަކުރާ ގައުމީ ޓީމުގެ ކެޕްޓަންކަން އަކުރަމް އަބުދުލްގަނީ އަށް އަދި ވައިސް ކެޕްޓަންކަން ޝާފިއު އަހުމަދަށް ދީފި އެވެ.
ވެލެންސިއާގެ މިޑްފީލްޑަރު އަކުރަމަށް ކެޕްޓަންކަން މިދިނީ ގައުމީ ކެޕްޓަން އަލީ އަޝްފާގް (ދަގަނޑޭ) އަށް އޭނާގެ ކުލަބުން ރިލީޒް ނުދޭތީވެ މި މުބާރާތުގައި ނުކުޅެވޭތީ އެވެ. އަކުރަމް މިހާތަނަށް ހުރީ ވައިސް ކެޕްޓަނަކަށެވެ.
ވައިސް ކެޕްޓަންކަން ޝާފިއު އަށް ދިން އިރު މިއީ ގައުމީ ޓީމުގެ މުހިންމު ޒިންމާ އެއް އޭނާ އަދާކުރާ ފުރަތަމަ ފަހަރެވެ. މިވަގުތު ރާއްޖޭގައި ހުރި އެންމެ އިތުބާރު ޑިފެންޑަރަކީ ވެސް އޭނާ އެވެ. އަދި ގައުމީ ޓީމުގެ ވައިސް ކެޕްޓަނަކަށް ހުރި މުހައްމަދު އާރިފް (ބަކާ) އަށް ވެސް އޭނާގެ ކުލަބު މިޔަންމާގެ ކޭބީޒެޑުން ރިލީޒް ނުލިބެތީވެ މި މުބާރާތުގައި ނުކުޅެވެ އެވެ.
ގައުމީ ޓީމު ރިޔޫނިއަންނަށް ދިއުމަށް މާދަމާ ނޫން އަނެއް ދުވަހު ފުރާއިރު ޓީމު ރޭ ވަނީ 20 ކުޅުންތެރިންނަށް މަދުކޮށްފަ އެވެ. ޓީމުން ބާކީވީ އެންމެ މުހިންމު ދެ ކުޅުންތެރިންނަކީ ހުންއައުމުގެ ސަބަބުން ބައެއް ޕްރެކްޓިސް ކަޓުވާލަން ޖެހުނު މާޒިޔާގެ އަހުމަދު ނާޝިދާއި އަނިޔާވެފައިވާ މާޒިޔާގެ ކެޕްޓަން އަސަދުﷲ އަބުދުﷲ އެވެ. ދެން ބާކީވީ މަހިބަދޫގެ ދެ ބެން ކަމަށްވާ ގާސިމް ސައްމާމް އާއި ސަމޫހް އަލީގެ އިތުރުން އޮސްޓްރޭލިޔާގެ ޔޫތު ލީގުގައި ކުޅޭ 18 އަހަރުގެ ކުޅުންތެރިޔާ މަނީއޫ ރައޫފް އެވެ.
މި ޓީމުގައި މި ފަހަރު އަނިޔާގެ ސަބަބުން ކީޕަރު އިމްރާނު މުހައަމަދަށް ވެސް ނުކުޅެވެ އެވެ.