ފަސް ސެޓް ކުޅޭއިރު ދެ ސެޓް ލިބިފަ އޮއްވައި ދެން ރާއްޖެ މެޗުން ބަލިވެގެންނުވާނެ ކަމަށާއި މި ފަހަރުގެ އިންޑިއަން އޯޝަން އައިލެންޑް ގޭމްސްއިން 15 ނުވަތަ 20 މެޑަލް ހޯދުމަށް ރައީސުލްޖުމުހޫރިއްޔާ އަބުދުﷲ ޔާމީން އަބުދުލް ގައްޔޫމް ދިވެހި ޓީމުތަކުގެ ކިބައިން އެދިވަޑައިގެންފި އެވެ.
ރިޔޫނިއަން މާދަމާ ނޫން އަނެއް ދުވަހު ފަށާ ގޭމްސްގައި ވާދަކުރުމަށް 271 މީހުންގެ ދިވެހި ކޮންޓިންޖެންޓް (ޓީމް މޯލްޑިވްސް) ފުރުމުގެ ކުރިން ރައީސް އޮފީހުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ "ކުޅިވަރު ކުޅެނީ މޮޅުވާން،" ކަމަށެވެ.
"ކުޅިވަރު ކުޅޭނީ މޮޅުވާން. ތަޖުރިބާ ހޯދަން ނުވަތަ އެކްސްޕީރިއަންސް ކުރާނީ ގޭމްސްގައެއް ނޫން. އެކްސްޕީރިއަންސް ކުރާނަމަ އެކަން ކުރާނީ ތަމްރީނު ކޭމްޕްތަކުގައި. މީގެ ކުރިން އަޅުގަނޑަށް ފެނިފަ އެބަހުރި ފަސް ސެޓް ކުޅޭއިރުގައި އަޅުގަނޑުމެންނަށް ދެ ސެޓް ލިބިފަ އޮންނައިރު ތިން ވަނަ ސެޓާއި ހަތަރު ވަނަ ސެޓް އަދި ފަސް ވަނަ ސެޓް ގެއްލިގެންދާތަން. މިއީކީ ގަބޫލު ކުރެވޭނެ ކަމެއްނޫން. އެކުޅިވަރެއްގައި އަޅުގަނޑުމެން މޮޅުނަމަ ކާމިޔާބު ލިބެންވާނެ،" ރައީސް ވިދާޅުވި އެވެ.
ޖުމުލަ 10 ކުޅިވަރަކުން 12 ޓީމު ވާދަކުރާ ގޭމްސްގައި އޮލިމްޕިކް ކޮމިޓީން އުއްމީދު ކުރަނީ ނުވައެއް ނުވަތަ 15 މެޑަލް ހޯދުމަށެވެ. ނަމަވެސް ރައީސް ވިދާޅުވީ 15 ނުވަތަ 20 މެޑަލް ހޯދަން އުއްމީދު ކުރަންވާނެ ކަމަށެވެ. އަދި ރާއްޖޭން ބޭރުން ހުރިހާ ޓީމުތައް ތަމްރީނު ހޯދާފައިވާއިރު ކުޅުންތެރިން އެދުނު ކަންތައްތައް ސަރުކާރުން ވެސް ކޮށްދީފައިވާނެ ކަމަށެވެ. މިހެންވެ މި ފަހަރު ބަލިވެގެން ނުވާނެ ކަމަށް ތަކުރާރުކޮށް ރައީސް ވިދާޅުވި އެވެ.
"އިންޑިއަން އޯޝަން [އައިލެންޑް] ގޭމްސް އަށް ތައްޔާރުވިއިރު ވަރަށް އުފާވެރި މާހައުލެއްގެ ތެރެއިން ރޯދަ މަހު އަޅުގަނޑާ ވެސް ދިމާވި ހުރިހާ ކުޅުންތެރިންނާހެން. ކުޅުންތެރިންނަށް ހުރި ދަތިތަކުގެ ވާހަކަ އަޅުގަނޑުމެންނާ ހަމައަށް އައި. ދެ ދުވަސްތެރޭގައި އެކަންކަން ރަނގަޅުކޮށްފައި ކޮށްދީފައި ހުންނާނީ. އެހެންވީމަ ތަކުރާރުކޮށް މި ބުނަނީ މި ފަހަރު މޮޅުވާންޖެހޭނެ. ކުޅިވަރު ކުޅޭނީ މޮޅުވާން. ދަނޑުގެ ހަވާސާގައި ތިބެލާކަށްނޫން،" ރައީސް ވިދާޅުވި އެވެ.
މި ފަހަރުގެ ގޭމްސްގައި މަދުވެގެން 15 މެޑަލް ހޯދައިފިނަމަ ސަރުކާރުން ކުޅުންތެރިންނަށް އިނާމް ދެއްވާނެކަން ވެސް ރައީސް އިއުލާނުކުރެއްވި އެވެ. މި ގޭމްސް އަށް 16 މިލިއަނެއްހާ ރުފިޔާ ހަރަދު ކޮށްފައިވެ އެވެ.