ރިޔޫނިއަންގައި މިއަދު ފަށާ އިންޑިއަން އޯޝަން އައިލެންޑް ގޭމްސް އަށް ރާއްޖޭގެ ވަފުދު ފުރުމުގެ ކުރިން ރައީސުލްޖުމުހޫރިއްޔާ އަބުދުﷲ ޔާމީން އަބުދުލްގައްޔޫމް ދިވެހި ޓީމަށް ދެއްވިފަދަ މެސެޖެއް މިގޭމްސްގައި ވާދަކުރާ ސީޝެލްސް ޓީމަށް އެ ގައުމުގެ ވެސް ދީފި އެވެ.
ގާތްގަނޑަކަށް ލައްކައެހާ މީހުން ދިރިއުޅޭ ސީޝެލްސްގެ ރައީސް ޖޭމްސް މިޝޭލް އާއި ކުޅިވަރާ ބެހޭ ވަޒީރު ވިންސެންޓް މެރިޓޮން އެބޭފުޅުންގެ ޓީމު ރިޔޫނިއަން އަށް ފުރުވާލުމުގެ ކުރިން އެ ގައުމުގެ އިންޓަނޭޝަނަލް ކޮންވެންޝަން ސެންޓަރުގައި ޓީމާ ބައްދަލުކުރި އެވެ. އަދި ކުޅުންތެރިންނާއި އޮފިޝަލުންނާ މުހާތަބްކޮށް މެރިޓޮން ވިދާޅުވީ "ސީޝެލްސްގެ ކުޅުންތެރިންގެ ކިބާގައި މޮޅުވުމުގެ ރޫހު ހުންނަންޖެހޭނެ،" ކަމަށެވެ.
މި ފަހަރުގެ ގޭމްސް އަށް ސީޝެލްސްއިން 1.9 މިލިއަން ޑޮލަރު ހަރަދު ކުރެއްވިކަމަށާއި މިހެންވެ 2011 ވަނަ އަހަރު އަމިއްލަ ގައުމުގައި ބޭއްވި ގޭމްސްއަށް ވުރެ ހުރިހާ ގޮތަކުން ވެސް ރަނގަޅަށް އެ ގައުމުން މި ފަހަރު ތައްޔާރުވެފައިވާތީވެ ކުރީ ފަހަރަށްވުރެ ގިނަ ކާމިޔާބީ ހޯދަންޖެހޭނެ ކަމަށް މިނިސްޓަރު ވިދާޅުވި އެވެ.
ސީޝެލްސްއިން ވަނީ ރަންމެޑަލް ހޯދާ ކުޅުންތެރިންނަށް 1924 ޑޮލަރު ދޭން ނިންމައިފަ އެވެ. އަދި ރިހިމެޑަލް ހޯދާ ކުޅުންތެރިންނަށް 1155 ޑޮލަރު އަދި ބްރޯންޒް މެޑަލް ހޯދާ ކުޅުންތެރިންގެ މެދުގައި 616 ޑޮލަރު ބެހުމަށް ވަނީ ނިންމައިފަ އެވެ.
ސީޝެލްސްގެ ބަސްމަގު މިފަދައިން ހުރިއިރު ރައީސް ޔާމީން ވަނީ ދިވެހި ޓީމުތަކުން މިފަހަރު ކާމިޔާބު ހޯދަންޖެހޭ ކަމަށް ވަރަށް ސާފުކޮށް އިއްޔެ ވިދާޅުވެ އެކަމަށް އެދިވަޑައިގެންފަ އެވެ.
ގާތްގަނޑަކަށް 16 މިލިއަން ރުފިޔާ ހަރަދުކޮށްގެން ގޭމްސްގައި ބައިވެރިވާ ދިވެހި ޓީމުތައް ފުރުމުގެ ކުރިން އެމަނިކުފާނު މިކަމަށް އެދިވަޑައިގަތީ އިއްޔެ ރައީސް އޮފީހުގައި ޓީމަށް އަލްވަދާއު ކިއުމަށް ބޭއްވި ރަސްމިއްޔާތުގަ އެވެ. އެމަނިކުފާނު ވިދާޅުވީ ރާއްޖޭގެ މިނިވަންކަމަށް 50 އަހަރު ފުރުނު މި އުފާވެރި އަހަރު މި ގޭމްސްއިން ދިވެހިން ބޭނުންވާނީ އުފާވެރިކަން ކަމަށެވެ.
"ކުޅިވަރު ކުޅޭނީ މޮޅުވާން. ތަޖުރިބާ ހޯދަން ނުވަތަ އެކްސްޕީރިއަންސް ކުރާނީ ގޭމްސްގައެއް ނޫން. އެކްސްޕީރިއަންސް ކުރާނަމަ އެކަން ކުރާނީ ތަމްރީނު ކޭމްޕްތަކުގައި. މީގެ ކުރިން އަޅުގަނޑަށް ފެނިފަ އެބަހުރި ފަސް ސެޓް ކުޅޭއިރުގައި އަޅުގަނޑުމެންނަށް ދެ ސެޓް ލިބިފަ އޮންނައިރު ތިން ވަނަ ސެޓާއި ހަތަރު ވަނަ ސެޓް އަދި ފަސް ވަނަ ސެޓް ގެއްލިގެންދާތަން. މިއީކީ ގަބޫލު ކުރެވޭނެ ކަމެއްނޫން. އެކުޅިވަރެއްގައި އަޅުގަނޑުމެން މޮޅުނަމަ ކާމިޔާބު ލިބެންވާނެ،" ރައީސް ވިދާޅުވި އެވެ.
މި ގޭމްސްގައި ރާއްޖެއިން ނުވަޔަކާއި 15އާ ދޭތެރޭ އަދަދަކަށް މެޑަލް ހޯދަން އަމާޒުކުރެ އެވެ. ނަމަވެސް ރައީސް ވަނީ 15 އާއި 20 ދެމެދުގެ އަދަދަކަށް މެޑަލް ހޯދުމަށް އެދިވަޑައިގެންފަ އެވެ.
"އިންޑިއަން އޯޝަން [އައިލެންޑް] ގޭމްސް އަށް ތައްޔާރުވިއިރު ވަރަށް އުފާވެރި މާހައުލެއްގެ ތެރެއިން ރޯދަ މަހު އަޅުގަނޑާ ވެސް ދިމާވި ހުރިހާ ކުޅުންތެރިންނާހެން. ކުޅުންތެރިންނަށް ހުރި ދަތިތަކުގެ ވާހަކަ އަޅުގަނޑުމެންނާ ހަމައަށް އައި. ދެ ދުވަސްތެރޭގައި އެކަންކަން ރަނގަޅުކޮށްފައި ކޮށްދީފައި ހުންނާނީ. އެހެންވީމަ ތަކުރާރުކޮށް މި ބުނަނީ މި ފަހަރު މޮޅުވާންޖެހޭނެ. ކުޅިވަރު ކުޅޭނީ މޮޅުވާން. ދަނޑުގެ ހަވާސާގައި ތިބެލާކަށްނޫން. ތިޔަކުދިން މި ކާމިޔާބީ ހޯދައިފިނަމަ ސަރުކާރުން ވެސް އެކަން ބަލައިގަންނާނަން. އިނާމް ދޭނަން. ބޯނަސް ލިބޭނެ،" ރައީސް ޔާމީން ވިދާޅުވި އެވެ.
މި ފަހަރުގެ ގޭމްސްގައި ސީޝެލްސްއިން 14 ކުޅިވަރެއްގައި ވާދަކުރެ އެވެ. ރާއްޖެ ވާދަކުރަނީ 10 ކުޅިވަރުގަ އެވެ.