މިއަދު ރިޔޫނިއަންގައި ފަށާ އިންޑިއަން އޯޝަން އައިލެންޑް ގޭމްސް އަށް ރާއްޖޭގެ ޓީމުތައް ދިޔައީ ހުރިހާކަމެއް ފުރިހަމަވެގެން ކަމަށް އޮލިމްޕިކް ކޮމިޓީން ބުނެފި އެވެ.
"މިއަދު އަޅުގަނޑުމެން ފުރާއިރު މި ކޮންޓިންޖެންޓްގައި ނުހުންނާނެ ބޭރު ގައުމެއްގައި ތަމްރީނު ހޯދާ އެންމެ ކުޅުންތެރިއެއް ވެސް. ހުރިހާ ޓީމުތަކުން ވެސް ރަނގަޅަށް ޕްރެކްޓިސްކޮށްފައި ވަރަށް ޔަގީންކަމާއެކު މިދަނީ. އިރާދަކުރެއްވިއްޔާ މި ގޭމްސް އަށް ދިވެހި ރައްޔިތުން މިހޭދަކުރި ފައިސާ (ގާތްގަނޑަކަށް 16 މިލިއަން ރުފިޔާ) އަކީ އަގެއް ނެތް އެއްޗަކަށް ވެގެންނުދާނެ. އިރާދަކުރެއްވިޔާ އަޅުގަނޑުމެން ނުވަޔަކާއި 15 އާ ދެމެދުގެ މެޑަލް ހޯދަން،" ޖެނެރަލް ސެކްރެޓަރީ އަހުމަދު މަރުޒޫގް ވިދާޅުވި އެވެ.
އޭނާ ވިދާޅުވީ ނާކާމިޔާބުވެގެން މި ފަހަރު ދެއްކޭނެ އެއްވެސް ބަހަނާއެއް ނޯންނާނެ ކަމަށާއި މީގެ ފަސް އަހަރުކުރިން ފެށި މި މަސައްކަތުގައި މިހާތަނަށް ވަރަށް ބުރަކޮށް މަސައްކަތް ކުރެވިފައިވާ ކަމަށެވެ.
ރާއްޖޭގެ ޓީމުތައް ފުރުމުގެ ކުރިން ރައީސުލް ޖުމުހޫރިއްޔާ އަބުދުﷲ ޔާމީން ވެސް ވަނީ މި ފަހަރު ދިވެހި ޓީމުތަކުން ބަލިވެގެން ނުވާނެކަމަށް ވިދާޅުވެ ކުޅުންތެރިންނަށް ހިތްވަރު ދެއްވައިފަ އެވެ.
ރައީސް ވިދާޅުވީ ކުޅުންތެރިން އެދުނު ކަންތައްތައް ސަރުކާރުން ވެސް ލަސްނުކޮށް ކޮށްދިން ކަމަށާއި މޮޅުވާން ޖެހޭނެ ކަމަށެވެ.
" ކުޅިވަރު ކުޅޭނީ މޮޅުވާން. ތަޖުރިބާ ހޯދަން ނުވަތަ އެކްސްޕީރިއަންސް ކުރާނީ ގޭމްސްގައެއް ނޫން. އެކްސްޕީރިއަންސް ކުރާނަމަ އެކަން ކުރާނީ ތަމްރީނު ކޭމްޕްތަކުގައި. މީގެ ކުރިން އަޅުގަނޑަށް ފެނިފަ އެބަހުރި ފަސް ސެޓް ކުޅޭއިރުގައި އަޅުގަނޑުމެންނަށް ދެ ސެޓް ލިބިފަ އޮންނައިރު ތިން ވަނަ ސެޓާއި ހަތަރު ވަނަ ސެޓް އަދި ފަސް ވަނަ ސެޓް ގެއްލިގެންދާތަން. މިއީކީ ގަބޫލު ކުރެވޭނެ ކަމެއްނޫން. އެކުޅިވަރެއްގައި އަޅުގަނޑުމެން މޮޅުނަމަ ކާމިޔާބު ލިބެންވާނެ. އިންޑިއަން އޯޝަން [އައިލެންޑް] ގޭމްސް އަށް ތައްޔާރުވިއިރު ވަރަށް އުފާވެރި މާހައުލެއްގެ ތެރެއިން ރޯދަ މަހު އަޅުގަނޑާ ވެސް ދިމާވި ހުރިހާ ކުޅުންތެރިންނާހެން. ކުޅުންތެރިންނަށް ހުރި ދަތިތަކުގެ ވާހަކަ އަޅުގަނޑުމެންނާ ހަމައަށް އައި. ދެ ދުވަސްތެރޭގައި އެކަންކަން ރަނގަޅުކޮށްފައި ކޮށްދީފައި ހުންނާނީ. އެހެންވީމަ ތަކުރާރުކޮށް މި ބުނަނީ މި ފަހަރު މޮޅުވާންޖެހޭނެ. ކުޅިވަރު ކުޅޭނީ މޮޅުވާން. ދަނޑުގެ ހަވާސާގައި ތިބެލާކަށްނޫން،" ކާމިޔާބު ހޯދައިފިނަމަ އިނާމް ދެއްވާނެ ކަން އިއުލާނުކުރައްވަމުން ރައީސް ވިދާޅުވި އެވެ." ރައީސް ވިދާޅުވި އެވެ.