ސާކު ގައުމުތަކުގެ 16 އަހަރުން ދަށުގެ ފުޓްބޯޅަ މުބާރާތުގައި ރާއްޖެއާއެކު ގްރޫޕް ބީގައި ނޭޕާލާއި އަފްގާނިސްތާން ހިމެނިއްޖެ އެވެ.
އަންނަ ހަފުތާގެ އާދީއްތަ ދުވަހު ބަނގްލަދޭޝްގައި ފަށާ މުބާރާތުގެ ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން އިންޑިޔާ އާއި ބަނގްލަދޭޝް އަދި ސްރީލަންކާ އެވެ.
ސާކުގެ އަށް ގައުމުގެ ތެރެއިން މުބާރާތުގައި ބައިވެރިނުވާން ކުރިން ވެސް ނިންމައިގެންތިބީ ބޫޓާނެވެ. ޕާކިސްތާނުން ބައިވެރިނުވާން ނިންމީ ގުރުނަގުމުގެ 11ގަޑިއިރު ކުރިންނެވެ. އެއީ އެ ގައުމުގެ ފުޓްބޯޅަ ފެޑަރޭޝަނުގެ އެތެރޭގެ ކޯޅުންތަކާހެދި އެވެ.
މި މުބާރާތުގައި ރާއްޖެއާއެކު ހިމެނޭ ނޭޕާލަކީ އެންމެ ފަހު މުބާރާތުގެ ފައިނަލް ކުޅުނު ޓީމެވެ.
ވެލެންސިއާގެ ކުރީގެ ކުޅުންތެރިޔާ އަދި ކޯޗު މުހައްމަދު ޝާހިދުގެ ބެލުމުގެ ދަށުން ފަރިތަކުރަމުން އަންނަ ރާއްޖޭގެ ޓީމު މުބާރާތަށް ފުރާނީ އަންނަ ބުރާސްފަތި ދުވަހު އެވެ.
މުބާރާތަށް ތައްޔާރުވާން ދެކުނު އޭޝިޔާގެ ފުޓްބޯޅަ ޖަމިއްޔާއިން ކޮންމެ ގައުމަކަށް 5000ޑޮލަރު، އަދި މުބާރާތް ބާއްވާ ބަނގަލްދޭޝް އަށް 50000 ޑޮލަރު ދޭން ވަނީ ނިންމާފަ އެވެ.