މިނިވަން ފަންސާހުގެ ކުޅިވަރުތައް ބާއްވައިގެން ވަރަށް ބޮޑަށް މަރުވެފައިވާ ރަސްމީ ދަނޑުގެ ވިނަގަނޑު މި މަހުގެ 14 ވަނަ ދުވަހު ދިވެހި ޕްރެމިއާ ފުޓްބޯޅަ ލީގު އަލުން ފަށަންވާއިރަށް ރަނގަޅުކުރަން ހޯމް މިނިސްޓްރީން ނިންމައިފި އެވެ.
ދަނޑުގެ ވިނަގަނޑުގެ ބޮޑުބައެއް ހާއްސަކޮށް ދަނޑުގެ ވަށައިގެން ވިނަގަނޑު މަރުވީ ހޫނުގަދަވެގެން ކަމަށް ދަނޑު ބަލަހައްޓަމުން އަންނަ އޮފިޝަލުން ބުންޏެވެ. ނަމަވެސް ގަސްކާނާ އަޅައި ފެންދީ ހަދަން ފެށުމުން އަލުން ވިނަގަނޑު ހެދި ރީތިވެލަން މާގިނަ ދުވަސްތަކެއް ނުނަގާނެ ކަމަށް ވެސް އޮފިޝަލް ވިދާޅުވި އެވެ.
"ބޮޑެތިފަތްތައް ހުރި ވިނަތައް ގިނައިން މަރުވެފައިވަނީ. އެހެންނޫނީ ރަނގަޅު. ވިނަގަނޑުގައި އަޅާފައިއޮތް ޕްރޮޓެކްޓާގެ ދޭތެރެތަކުން ވިނަތައް ކުރިފަޅައިހެދިފައި ވެސް އެބަހުރި. އެހެންވީމަ މާގިނަ ދުވަހެއް ނުނަގާނެ ރަނގަޅުކޮށްލާކަށް." އޭނާ ވިދާޅުވި އެވެ.
ވިނަގަނޑު މަރުވާން ދިމާވީ މައިގަނޑު ދެ ސަބަބަކުން ކަމަށް އޭނާ ވިދާޅުވި އެވެ. ފުރަތަމަކަމަކީ މާގިނަ ދުވަހު ގްރާސް ޕްރޮޓެކްޓާ އަޅާފައި ބޭއްވުމެވެ. ދެ ވަނަ ކަމަކީ އެހާގިނަ ދުވަހު ބާއްވާފައިއޮތްއިރު ބަރު ވެހިކަލްތައް ދުއްވައި ހެދުމެވެ.
"ވިނައަކީ އަވިބޭނުންވާ އެއްޗެއް. އަވި ނުލިބި މިދިޔައީ މިވީހާ ދުވަހު. އަސްލު މީތި އަޅަންޖެހެނީ ގިނަވެގެން 10 ދުވަހު. އަހަރުމެންނަށް މިފަހަރު ދިމާވިގޮތުން 16 ވަރަކަށް ދުވަސްވެއްޖެ މިއަޅާފައި އޮންނަތާ. އެހެންވީމަ ހޫނުގަދަވެގެން ވެސް ގޮސް މަރުވީ،" އޮފިޝަލް ވިދާޅުވި އެވެ.
ހޯމް މިނިސްޓްރީން މިހާރު ވަނީ ދަނޑަށް ގަސްކާނާއަޅައި ދަނޑު ތައްޔާރުކުރުމުގެ މަސައްކަތް ރޭ ފަށައިފަ އެވެ.
ގަލޮޅު ދަނޑަކީ އާއްމުކޮށް މިނިވަން ދުވަހުގެ ކުޅިވަރުތައް ބާއްވާ މައިދާނެވެ. މިއިން ކޮންމެ ފަހަރަކު ވެސް ދަނޑުގެ ވިނަގަނޑަށް ބޮޑެތި ގެއްލުންތައްލިބެ އެވެ.