އަހުމަދު ރިލްވާން މަރުވެފައިވާ ކަމަށް މަރުތައް ތަހުގީގު ކުރާ ރިޔާސީ ކޮމިޝަނުން ހާމަކުރުމާ ގުޅިގެން، އެ ކަމުގައި ފުލުހުން ރަސްމީ ބަޔާނެއް ވަރަށް އަވަހަށް ނެރޭނެ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު މިއަަދު ވިދާޅުވެއްޖެ އެވެ.
އިނގިރޭސި ވިލާތަށް ކޮމިޝަނަރު ހަމީދު ކުރެއްވި ދަތުރުފުޅަށްފަހު، އޭނާ ކުރެއްވި ޓްވީޓެެއްގައި ވިދާޅުވީ އިނގިރޭސި ވިލާތުގައި ކައުންޓާ ޓެރަރިޒަމް ހުއްޓުމުގެ ސިޔާސަތުތަކާ ގުޅޭ ގޮތުން ކާމިޔާބު ބައްދަލުވުންތަކެއް ބޭއްވިފައިވާ ކަމަށެވެ.
ރިލްވާންގެ މައްސަލާގައި މަރުތައް ތަހުގީގު ކުރާ ރިޔާސީ ކޮމިޝަނުން ރާއްޖޭގައި ހިންގަމުންދާ ކަމަށް ފާހަގަކުރި ޓެރަރިޒަމް އަމަލުތަކާ ގުޅުވައި ހަމީދު ވިދާޅުވީ ރިޔާސީ ކޮމިޝަނުން ހޯދާފައިވާ ހޯދުންތައް ބަލައިގަނެ އެ ކަމާ ގުޅޭ ގޮތުން ފުލުހުން ރަސްމީ ބަޔާނެއް ވަރަށް އަވަހާ ނެރޭނެ ކަމަށެވެ.
"ފުލުހުންގެ މުއައްސަސާއަށް ރައްޔިތުންގެ އިތުބާރު ހޯދުމަށްޓަކައި ވަރަށް ގިނަ ކަންކަން ކުރަން އެބަހުރި." ހަމީދު ކުރެއްވި އެ ޓްވީޓްގައި ވިދާޅުވި އެވެ.
މަރުތައް ތަހުގީގު ކުރާ ރިޔާސީ ކޮމިޝަންގެ ރައީސް ހުސްނުއް ސުއޫދު އިއްޔެ ވަނީ ރިލްވާންގެ މައްސަލާގައި ކޮމިޝަނުން ކުރި ތަހުގީގުން ހޯދިފައިވާ ކަންކަން ހާމަ ކުރައްވައިފަ އެވެ. އެ ގޮތުން ދީނީ ހަރުކަށި ފިކުރުގެ ޖަމާއަތުން ރިލްވާން މަރާލި ކަމަށް އޭނާ ވިދާޅުވި އެވެ. ރިލްވާންގެ އިތުރުން ޔާމީން ރަޝީދާއި ޑރ. އަފްރާޝީމް އަލީގެ މަރުގެ ފަހަތުގައި ވެސް ވަނީ އެ ޖަމާއަތުން ކަމަށް އޭނާ ވިދާޅުވި އެވެ.