ބަނގްލަދޭޝްގައި މާދަމާ ފަށާ ސާކު ގައުމުތަކުގެ 16 އަހަރުން ދަށުގެ ފުޓްބޯޅަ މުބާރާތުގައި ބައިވެރިވުމަށް ގައުމީ ޓީމު އެ ގައުމަށް ރޭ ފުރައިފި އެވެ.
ސާކުގެ އަށް ގައުމުގެ ތެރެއިން ހަ ގައުމު ކުޅޭ މުބާރާތުގައި ރާއްޖެއާއެކު ގްރޫޕް ބީގައި ހިމެނެނީ ނޭޕާލާއި އަފްގާނިސްތާން އެވެ. މި މަހުގެ 18 ގައި ނިމޭ މުބާރާތުގެ ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން އިންޑިޔާ އާއި ބަނގްލަދޭޝް އަދި ސްރީލަންކާ އެވެ.
މުބާރާތުގައި ކުޅޭ ފުރަތަމަ މެޗުގައި ރާއްޖެ ނުކުންނާނީ ހޯމަ ދުވަހު އެންމެ ފަހުގެ މުބާރާތުގެ ފައިނަލް ކުޅުނު ނޭޕާލާ ދެކޮޅަށެވެ. އަދި ގްރޫޕުގެ ފަހު މެޗުގައި އަފްގާނިސްތާނާ ދެކޮޅަށް ކުޅޭނީ ބުދަ ދުވަހު އެވެ. ރާއްޖޭގެ ޓީމުގެ ކޯޗަކީ ވެލެންސިއާގެ ކުރީގެ ކޯޗު މުހައްމަދު ޝާހިދެވެ.
މުބާރާތުގެ ސެމީ ފައިނަލަށްދާނީ ކޮންމެ ގްރޫޕެއްގެ ވެސް ގަދަ ދެ ޓީމެވެ. ސާކުގެ އަށް ގައުމުގެ ތެރެއިން މި ފަހަރުގެ މުބާރާތުގައި ބައިވެރިނުވާން ކުރިން ވެސް ނިންމައިގެންތިބީ ބޫޓާނެވެ. ޕާކިސްތާނުން ބައިވެރިނުވާން ނިންމީ ގުރުނަގުމުގެ 11ގަޑިއިރު ކުރިންނެވެ. އެއީ އެ ގައުމުގެ ފުޓްބޯޅަ ފެޑަރޭޝަނުގެ އެތެރޭގެ ކޯޅުންތަކާހެދި އެވެ.
މުބާރާތަށް ތައްޔާރުވާން ދެކުނު އޭޝިޔާގެ ފުޓްބޯޅަ ޖަމިއްޔާއިން ކޮންމެ ގައުމަކަށް 5000 ޑޮލަރު، އަދި މުބާރާތް ބާއްވާ ބަނގަލްދޭޝް އަށް 50000 ޑޮލަރު ދޭން ވަނީ ނިންމާފަ އެވެ.