ބަނގްލަދޭޝްގައި އިއްޔެ ފެށި ސާކު ގައުމުތަކުގެ 16 އަހަރުން ދަށުގެ ފުޓްބޯޅަ މުބާރާތުގައި މިއަދު ނޭޕާލާ ދެކޮޅަށް ނުކުންނައިރު އެއީ ވަރަށް ހަލުވި ޓީމެއް ކަމަށް ރާއްޖޭގެ ކޯޗު މުހައްމަދު ޝާހިދު ބުނެފި އެވެ.
ކުރިން ވެލެންސިއާގެ ކޯޗުކަމާއި ވީބީގެ އެސިސްޓެންޓް ކޯޗުކަން ކުރި ޝާހިދު ބުނީ އަފްގާނިސްތާނުގެ ކުޅުންތެރިންނަކީ ޖިސްމާނީ ގޮތުން ބިޔަ ކުޅުންތެރިން ކަމަށެވެ.
"މި ދެ ޓީމާއެކު ކުޅޭއިރު ވަރަށް ތަފާތު ދެ ވިސްނުމެއް ގެންގުޅެން މިޖެހެނީ. އެއީ ތަފާތު ދެ ސްޓައިލެއްގެ ދެ ޓީމުވީމަ،" ޝާހިދު ބުންޏެވެ.
ނޭޕާލާ ދެކޮޅަށް މިއަދު ކުޅުމަށްފަހު ގްރޫޕުގެ ފަހު މެޗުގައި ރާއްޖެ ނުކުންނާނީ ބުދަ ދުވަހު އަފްގާނިސްތާނާ ދެކޮޅަށެވެ.
ސާކުގެ އަށް ގައުމުގެ ތެރެއިން ހަ ގައުމު ކުޅޭ މުބާރާތުގައި ރާއްޖެއާއެކު ގްރޫޕް ބީގައި ނޭޕާލާއި އަފްގާނިސްތާން ހިމެނޭއިރު މި މަހުގެ 18 ގައި ނިމޭ މުބާރާތުގެ ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން އިންޑިޔާ އާއި ބަނގްލަދޭޝް އަދި ސްރީލަންކާ އެވެ.
މުބާރާތުގެ ސެމީ ފައިނަލަށްދާނީ ކޮންމެ ގްރޫޕެއްގެ ވެސް ގަދަ ދެ ޓީމެވެ. ސާކުގެ އަށް ގައުމުގެ ތެރެއިން މި ފަހަރުގެ މުބާރާތުގައި ބައިވެރިނުވާން ކުރިން ވެސް ނިންމައިގެންތިބީ ބޫޓާނެވެ. ޕާކިސްތާނުން ބައިވެރިނުވާން ނިންމީ ގުރުނަގުމުގެ 11ގަޑިއިރު ކުރިންނެވެ. އެއީ އެ ގައުމުގެ ފުޓްބޯޅަ ފެޑަރޭޝަނުގެ އެތެރޭގެ ކޯޅުންތަކާހެދި އެވެ.
މުބާރާތަށް ތައްޔާރުވާން ދެކުނު އޭޝިޔާގެ ފުޓްބޯޅަ ޖަމިއްޔާއިން ކޮންމެ ގައުމަކަށް 5000 ޑޮލަރު، އަދި މުބާރާތް ބާއްވާ ބަނގަލްދޭޝް އަށް 50000 ޑޮލަރު ދޭން ވަނީ ނިންމާފަ އެވެ.