ސޯޅަ އަހަރުން ދަށުގެ ސާފް ޗެމްޕިއަންޝިޕުގައި މިއަދު ރާއްޖެއާ ދެކޮޅަށް ނުކުންނައިރު ނޭޕާލް އޮތީ ވަރަށް ރަނގަޅަށް ތައްޔާރުވެފައި ކަމަށް އެ ޓީމުން ބުނެފި އެވެ.
ކޯޗު އުޕެންދުރާ ސިންގް ބުނީ އޭނާގެ ޓީމުން މުބާރާތުގައި ވަރަށް ރަނގަޅު ފެށުމެއް ބޭނުންވާތީވެ ރާއްޖެ ބަލިކުރަން ބޭނުން ކަމަށެވެ.
"ކުޅުންތެރިން ތިބީ ވަރަށް ފޯރީގައި މެޗަށް ނުކުންނަން. އެމީހުން މިދިޔަ ދުވަސްތަކުގައި ދަސްކުރި ކަންތައްތައް މުބާރާތުގައި ދައްކާލަން ކެތްމަދުވެފައިތިބީ. އަހަރުމެން ވަރަށް ރަނގަޅު ފެށުމެއް މި މުބާރާތުގައި ބޭނުންވޭ،" ކޯޗު ބުންޏެވެ.
ނޭޕާލަކީ މުބާރާތުގެ އެންމެ ފަހުގެ ރަނަރަޕް ޓީމެވެ. ގްރޫޕް އޭގައި މި ދެ ގައުމުގެ އިތުރުން ދެން އޮތީ އަފްގާނިސްތާނެވެ. ސާކުގެ އަށް ގައުމުގެ ތެރެއިން ހަ ގައުމު ކުޅޭ މުބާރާތުގެ ސެމީ ފައިނަލަށް ދާނީ ކޮންމެ ގްރޫޕެއްގެ ވެސް ގަދަ ދެ ޓީމެވެ.