އެމްޑީޕީއަކީ ލާދީނީ ޕާޓީއެއް ނޫން ކަމަށާ އެމްޑީޕީގެ މެންބަރުންނަކީ ލާދީނީ ބައެއް ކަމަށް ގަބޫލު ކޮށްގެން ނުވާނެ ކަމަށް އެޕާޓީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ އެމްޑީޕީގެ ރައީސްކަމުގެ އާ ދައުރަކަށް ކުރިމަތިލައްވާ ޕާޓީގެ މެންބަރުންގެ ތާއީދަށް އެދިވަޑައިގެން ބޭއްވެވި ބައްދަލުވުމެއްގައި މިރޭ ވާހަކަފުޅު ދައްކަވަމުންނެވެ. އަދި ވިދާޅުވީ އެމްޑީޕީގެ މެންބަރުންނަށްވުރެ ގިނައިން ނަމާދަށް އަރާ، ޒަކާތްދޭ އަދި ރޯދަ ހިފާ، ހެޔޮ ލަފާ ނަސޭހަތް ދޭ ބަޔަކު ވެސް ނޫޅޭނެ ކަމަށެވެ.
"އަޅުގަނޑުމެންނަކީ އިނގޭތޯ އެއްވެސް ހާލެއްގައި ލާދީނީ ޕާޓީއެއް ކަމަށް، ލާދީނީ ބައެއް ކަމަށް ތީގެ އެއްވެސް ބޭފުޅަކު ގަބޫލު ކޮށްގެން ނުވާނެ އިނގޭތޯ. އެއީކީ އަޅުގަނޑުމެނެއް ނޫން. އަޅުގަނޑުމެން، އަޅުގަނޑުމެންގެ ޕާޓީގެ މެންބަރުންނާ އެއްވަރަށް މިސްކިތަށް ނަމާދަށް އަރާ ބައެއް ވެސް، ޒަކާތްދޭ ބައެއް ވެސް، ރޯދަ ހިފާ ބައެއް ވެސް، ހެޔޮ ލަފާ ނަސޭހަތްދޭ ބައެއް ވެސް، ރަނގަޅަށް އުޅޭ ބައެއްވެސް އަޅުގަނޑަށް ޔަގީން ކަށަވަރު މިރާއްޖޭގައި ވަކި ނޫޅޭނެ! އެ ބޭފުޅުން، އެހެން ބޭފުޅުން އަޅުގަނޑުމެންނާ ވާދައަށް އެ ދައްކާ ވާހަކަތަކަށް އަޅުގަނޑުމެން އަޅާލާކަށް ނުޖެހޭ. އެެއްގޮތަކަށް ވެސް ނުޖެހޭ. އަޅުގަނޑުމެން ސޯލިހުންގެ ގޮތުގައި، ރަނގަޅު ގޮތުގައި ކުރަމުން ގެންދިޔައީމަ އެ ނިމުނީ." ރައީސް ނަޝީދު ވިދާޅުވި އެވެ.
އެމްޑީޕީއަކީ ލާދީނީ ޕާޓީއެއް ނޫން ކަމަށާ އެމްޑީޕީގެ މެންބަރުންނަކީ ލާދީނީ ބައެއް ކަމަށް ގަބޫލުކޮށްގެން ވެސް ނުވާނެ ކަމަށް ރައީސް ނަޝީދު ވިދާޅުވެފައި ވަނީ ބައެއް ފަރާތްތަކުން އެމަނިކުފާނާ، އެމްޑީޕީއަށް އަމާޒުކޮށް އެފަދަ ވާހަކަތައް ދައްކަމުން ގެންދާތީ އެވެ.
އަޅުގަނޑުމެންނަކީ އިނގޭތޯ އެއްވެސް ހާލެއްގައި ލާދީނީ ޕާޓީއެއް ކަމަށް، ލާދީނީ ބައެއް ކަމަށް ތިއިން އެއްވެސް ބޭފުޅަކު ގަބޫލު ކޮށްގެން ނުވާނެ އިނގޭތޯ. އެއީކީ އަޅުގަނޑުމެނެއް ނޫން. އަޅުގަނޑުމެން، އަޅުގަނޑުމެންގެ ޕާޓީގެ މެންބަރުންނާ އެއްވަރަށް މިސްކިތަށް ނަމާދަށް އަރާ ބައެއްވެސް، ޒަކާތް ދޭ ބައެއް ވެސް، ރޯދަ ހިފާ ބައެއް ވެސް، ހެޔޮ ލަފާ ނަސޭހަތްދޭ ބައެއް ވެސް، ރަނގަޅަށް އުޅޭ ބައެއް ވެސް އަޅުގަނޑަށް ޔަގީން ކަށަވަރު މި ރާއްޖޭގައި ވަކި ނޫޅޭނެ. އެ ބޭފުޅުން، އެހެން ބޭފުޅުން އަޅުގަނޑުމެންނާ ވާދައަށް އެ ދައްކާ ވާހަކަތަކަށް އަޅުގަނޑުމެން އަޅާލާކަށް ނުޖެހޭ. އެެއްގޮތަކަށް ވެސް ނުޖެހޭ. އަޅުގަނޑުމެން ސޯލިހުންގެ ގޮތުގައި، ރަނގަޅު ގޮތުގައި ކުރަމުން ގެންދިޔައީމަ އެ ނިމުނީ،މުހައްމަދު ނަޝީދު | އެމްޑީޕީގެ ރައީސް
ރައީސް ނަޝީދު ވިދާޅުވީ އެމަނިކުފާނު ވެސް އަދި އެމްޑީޕީންގެ ވެސް ބޭނުމަކީ ތަރައްގީ ހޯދުން ކަމަށެވެ. އަދި އެންމެންނަށް ބޯހިޔާވަހިކަމާ ވަޒީފާ ވެސް ހޯދުން ކަމަށެވެ.
މިހާރު ކުރިއަށްދާ ސަރުކާރަކީ އެންމެ ކާމިޔާބު ސަރުކާރަށްވާނެ ކަމަށާ އަދި އެމްޑީޕީން އެދޭ އަމާޒު ހާސިލުވާނެ ކަމަށް ގަބޫލު ކުރައްވާ ކަމަށްވެސް ވިދާޅުވިއެވެ.