ގަލޮޅު ދަނޑުގެ ވިނަގަނޑު ހަލާކުވެފައިވާތީވެ މި އަހަރުގެ އެފްއޭކަޕް ފުޓްބޯޅަ މުބާރާތް ނުބާއްވަން ނިންމައި އަންނަ އަހަރުގެ އޭއެފްސީ ކަޕަށް ޕްރެޒިޑެންޓްސް ކަޕް ނުވަތަ ގައުމީ ޗެމްޕިއަން ފޮނުވަން ނިންމައިފި އެވެ.
މިއީ ދިވެހި ލީގާއި އެފްއޭކަޕް ޗެމްޕިއަނުން ވާދަކުރާ އޭއެފްސީ ކަޕަށް ގައުމީ ޗެމްޕިއަން ޓީމު ފޮނުވަން ނިންމި ފުރަތަމަ ފަހަރެވެ. އެފްއޭއެމުގެ ނޯމަލައިޒޭޝަން ކޮމިޓީގެ ޗެއާމަން މުހައްމަދު ޝަވީދު މިއަދު ވިދާޅުވީ އަންނަ މަހު އައްޑޫ ސިޓީ އާއި ކުޅުދުއްފުށީގައި ކުޅޭ މުބާރާތުގެ ޗެމްޕިއަން އޭއެފްސީ ކަޕަށް ފޮނުވަން ނިންމީ އެނޫން ގޮތެއް ނެތުމުން ކަމަށެވެ.
"އެނޫން އެއްވެސް ގޮތެއްނެތް. އެނގިވަޑައިގަންނަވާނެ މި އަހަރަކީ ސީޒަން އަޅުގަނޑުމެންނަށް ވަރަށް ފަހުން ފެށުނު އަހަރެއް. އަނެއްކާ ދަނޑު ހަލާވުވީމަ ސީޒަން ވަރަށް ބޮޑަށް ދިގުދެމިގެންދާނެ. އަނެއްކާ ޑިސެމްބަރު މަހު ސާފް ޗެމްޕިއަންޝިޕް އެބައޮތް. ދަނޑު ރަނގަޅު ކުރަން ދެ މަސްބޭނުންވޭ. މިހެންވެ މި ގޮތަށް ނިންމީ،" ޝަވީދު ވިދާޅުވި އެވެ.
އޭނާ އަދި ވިދާޅުވީ ދަނަޑުގެ ވިނަގަނޑު މިހާރު ރަނގަޅު ކުރަމުންދަނީ ގަތަރުގެ މާހިރުންގެ ލަފާގެ މަތިން ކަމަށެވެ. އަދި ދެ މަސްތެރޭގައި ވިނަގަނޑު އެއްކޮށް ނިމޭއިރު ފެނިގެންދާނީ ވަރަށް ފުރިހަމަ ވިނަގަނޑެއް ކަމަށެވެ.
ގަލޮޅު ދަނޑުގެ ވިނަގަނޑު ހަލާކުވީ މިނިވަން50ގެ ކުޅިވަރުތައް ބާއްވަން އެޅި ގްރާންސް ޕްރޮޓެކްޓާ މާގިނަ ދުވަހު ބޭއްވުމުންނެވެ. ވިނަގަނޑު ހަލާކުވުމުން ދިވެހި ލީގު ވެސް ވަނީ އޮކްޓޫބަރު މަހަށް ފަސްކޮށްފަ އެވެ.