ގައުމީ ފުޓްބޯޅަ ޓީމުގެ ކޯޗުކަމުން ވަކިކުރި ބަލްގޭރިޔާގެ ވެލީޒާ ޕޮޕޯފް މަސައްކަތްކުރީ ކުޅުންތެރިން ހައްދައިގެން އުޅެން ކަމަށާއި އޭނާގެ ބައިވަރު އަހުލާގީ މައްސަލަތައް އެބަހުރި ކަމަށް އެފްއޭއެމުން ބުނެފި އެވެ.
ނޯމަލައިޒޭޝަން ކޮމިޓީގެ ޗެއާމަން މުހައްމަދު ޝަވީދު މިއަދު ވިދާޅުވީ "ކުޅުންތެރިން ހައްދައިގެން ކުޅުވަން (އެފްއޭއެމުން) ބޭނުންނުވާ،" ކަމަށެވެ.
"މީގެ ކުރިން މި ވާހަކަ ނުދެއްކީ ކޯޗަށް އިހްތިރާމް ކުރަންވެގެން. އެއީ އޭނާއަކީ މޮޅު ކޯޗެއް. އެކަމަކު އޭނާގެ ބައިވަރު އަހުލާގީ މައްސަލަތައް އެބަހުރި. އަޅުގަނޑުމެން އޭނާ ގެނައީ ނަތީޖާ ނެރެފަހުރި ކުޅުންތެރިން އެނގޭ ކޯޗަކަށްވީމަ. އެކަމަކު ކޯޗުގެ ކަންތައްތައް އިންވެސްޓިގޭޓް ކުރިއިރު އޭނާ ހުރެގެން ދެން ކުރިއަށް ގޮސްފިނަމަ ދެން ރަނގަޅުނުވާނެ ކަމަށް އަޅުގަނޑުމެންނަށް ގަބޫލު ކުރެވުނީ. ޓެކްނިކަލް ކޮމިޓީއަށް ވެސް ފެނުނީ އެހެން،" ޝަވީދު ވިދާޅުވި އެވެ.
އޭނާ ވިދާޅުވީ ކޯޗުގެ ބައިވަރު އަހުލާގީ ގިނަ މައްސަލަތައް ހުށަހެޅިފައިވާ ކަމަށާއި އެކަންކަން ބަލައި އަތުން ހިފާފައިވާ ކަމަށެވެ. އަދި ކޯޗު މަސައްކަތްކުރީ އާއްމުންގެ ސަމާލުކަން ލިބެގޮތަށް ވާހަކަ ދައްކައިގެން ކަމުގެ އަސްލު އޮޅުވާލައި އޭނާގެ އަމިއްލް ދިފާއުގައި ކަމަށެވެ.
"ކޯޗު ކުޅުންތެރިންނާއެކު ހަދައިގެން ގެންގުޅޭ ވައިބަ ގްރޫޕްތަކާއި، އެ ގްރޫޕުގައި ދައްކާފައިހުރި ވާހަކަތަކާއި ހުރި ފޮޓޯތައް ވެސް އަޅުގަނޑުމެން ބަލައިފިން. ބައިވަރު މައްސަލަތައް އެބަހުރި. މިސާލަކަށް މިދިޔަ އިންޑިއަން އޯޝަން އައިލެންޑް ގޭމްސްއަކީ އަޅުގަނޑުމެން ވެސް ގޮސް ބެލި ގޭމްސްއެއް. (ރޭގަނޑު) ކުޅުންތެރިން ނިދަން މި އޮންނަނީ 10 ޖަހާއިރު. އެކަމަކު (ދަންވަރު) އެކެއް ޖަހާއިރު ވެސް އެބަހުރޭ ވާހަކަ ދައްކާފައި،" އޮލިމްޕިކް ކޮމިޓީގެ ރައީސްކަން ވެސް ކުރައްވަމުން އަންނަ ޝަވީދު ވިދާޅުވި އެވެ.
އޭނާ އަދި ވިދާޅުވީ ކޯޗު ހުރީ ރާއްޖޭގެ އާއްމު ރައްޔިތުންނާ ވަރަށް ބޮޑަށް ގުޅިފައި ކަމަށާއި ނަމަވެސް ނޫސްތަކުގައި މީހުން ކުރާ ކޮމެންޓަށް ބަލައިގެން މެޗު ރާވަންވެއްޖެނަމަ "މިކަމެއްނުވާނެ،" ކަމަށެވެ.
"އަޅުގަނަޑުމެން ކޯޗަށް އެއްވެސް ކަމެއްގައި ޕްރެޝަރ ނުކުރަން. ވަކި ކުޅުންތެރިއަކު ނަގާފައި ނުގަނަން ނުބުނަން. ކޯޗަށް ފުރިހަމަ އިހްތިޔާރުދީފައި އޮންނަނީ. އެކަމަކު ނޫސްތަކުގައިޖަހާ ކޮމެންޓްތައް ކޮންމެ ދުވަހަކު އަޅުގަނޑުމެން ކިޔާފައި މިތަން ހިންގަންވެއްޖެނަމަ ނުވަތަ ޓީމު ރާވަންވެއްޖެނަމަ މިކަމެއް ނުވާނެ. ކޯޗު ކުޅުންތެރިން އަންހެންކުދިންނާ ވާހަކަ ދައްކާވާހަކަ އާއި ފޭސްބުކާއި ޝޯޝަލް މީޑިޔާގައި އުޅޭ ވާހަކަ އާއި އިސްތަށިގަނޑު ސްޓައިލްކުރާ ވާހަކަ ދެއްކިއިރު ކުޅުންތެރިންނަށް (ފޯނު) ސިމް ލިބުނީ ވެސް (ފުރަތަމަ މެޗު ކުޅުނުތާ) ދެ ދުވަސްފަހުން. ކުޅުންތެރިންގެ ވެސް މައްސަލަ އެބަހުރި. އެކަމަކު އަޅުގަނޑުމެންގެ އެންމެ ބޮޑު ޓާގެޓަކީ ސާފް ޗެމްޕިއަންޝިޕް ކަމަށްވާއިރު އޭނާ އިތުރަށް ބަހައްޓައިގެން ކުރިއެރުމެއް ނުލިބޭނެ ކަމަށް ޓެކްނިކަލް ކޮމިޓީ އަށް ފެނުނީ،" ޝަވީދު ވިދާޅުވި އެވެ.
އޭނާ އަދި ވިދާޅުވީ ޕޮޕޯފް އެދުނު ހުރިހާ ކަމެއް ކޮށްދިން އިރު އެކުވެރިކަމުގެ މެޗު ކުޅެން ކޯޗު ދެކޮޅު ހަދާ ކަމަށެވެ.
"މި ކޯޗު ވާނެ އޭނާ އެދުނު ކޮންމެ ކަމެއް ކޮށްދިން ކޯޗަކަށް. އެކަމަކު ފްރެންޑްލީ ކުޅެން އޭނާ އެއްބަހެއްނުވޭ. އަޅުގަނޑުމެންނަށް ލިބުނު އޮމާން، ސިންގަޕޫރު އިންޑިއާ، އަފްގާނިސްތާން ފަދަ ގައުމުތަކާއެކު މެޗު ކުޅެން. އެކަމަކު ކޯޗު ރިޖެކްޓްކުރީ. ދެން ސައުތު ކޮރެޔާ އަށް ކުރި ކޭމްޕްގައި ކޮރެޔާގެ އެންމެ ގަދަ ޓީމާ ދެކޮޅަށް ވެސް މެޗު ކުޅެން ލިބުނު. އެކަމަކު ކޯޗު ބޭނުންނުވާތީ އެކަން ނުވީ. ރާއްޖެއައި އެހެން ކޯޗުން އަބަދުވެސް ޖައްސާ މައްސަލައަކީ ފްރެންޑްލީ ކުޅެން ނުލިބޭތީވެ. އެކަމަކު ޕޮޕޯފް ފުރުސަތުލިބި ބޭނުންނުކުރީ. އަޅުގަނޑުމެން އެކަނި މިފަހަރު ވޯލްޑް ކަޕް ކޮލިފައިން އަށް ޕްލޭއޯފް ނުކުޅެ ހޮވުނީ ސާކް ސަހަރައްދުން. އެއީ ގިނަ މެޗުތަކެއް ކުޅެ އަޅުގަނޑުމެން ރޭންކިންގައި ކުރިއެރުން ހޯދީމަ،" ޝަވީދު ވިދާޅުވި އެވެ.
ކޯޗު ވަކިކުރުމުން އާ ކޯޗަކު ހަމަޖެހެންދެން ގައުމީ ޓީމުގެ ކޯޗަކަށް ހުންނާނީ އެސިސްޓެންޓް ކޯޗު އިސްމާއީލް މަހުފޫޒް (އިންމަ) އެވެ. ގައުމީ ޓީމަށް ދެން އޮތީ ވޯލްޑް ކަޕް ކޮލިފައިންގައި އަންނަ މަހު އަށެއްގައި ޗައިނާއާ ދެކޮޅަށް ކުޅެން ޖެހޭ މެޗެވެ.