ފ. ނިލަންދޫގެ މައްޗަށް 5-0 ގެ ނަތީޖާއަކުން ކާމިޔާބު ހޯދައި، ދިވެހި ޕްރިމިއާ ލީގްގައި މާޒިޔާއިން އަލުން ފަސް ޕޮއިންޓްގެ ލީޑް ނަގައިފި އެވެ.
ފުރަތަމަ ބުރުގައި މާޒިޔާއިން ވަނީ ނިލަންދޫކޮޅަށް 13-0 މޮޅު ވެފަ އެވެ. އެހެންނަމަވެސް މި ބުރުގެ މެޗުގައި ތަފާތު ބޮޑު ނަތީޖާއެއް ނުނެރެވޭނެ ކަމަށް މާޒިޔާގެ ކޯޗް މަރުޔާން ސްކްލޮވްސްކީ މެޗުގެ ކުރިން ވެސް ބުންޏެވެ. އޭނާ ބުނެފައި ވަނީ މިހާރު ނިލަންދޫގެ ޓީމުން ކުރި އެރުންތަކެއް ހޯދައިފި ކަމަށެވެ. ސަސްޕެންޝަންގެ ސަބަބުން ނިލަންދޫގެ ފުލު ބެކް ކިންގްސްލީ އާއި ސަޖާހްވެސް ނުލައި ކުޅުނު މެޗުގައިވެސް ނިލަންދޫގެ ފަރާތުން މާޒިޔާގެ ޓީމަށް އުނދަގޫ ކުރިމަތި ކުރި އެވެ. ފުރަތަމަ ހާފަުގައި މާޒިޔާ ކުޅެމުން ދިޔައީ ޕްރެޝަރުގަ އެވެ.
މާޒިޔާގެ ފުރަތަމަ ލަނޑު، މެޗުގެ 10 ވަނަ މިނެޓްގައި ކާމިޔާބު ކުރީ ހުސައިން ޝިފާޒް (ޑުންގާ) އެވެ. ނިލަންދޫގެ ޕެނަލްޓީ އޭރިއާ ތެރެއިން އޭނާ އަށް ލިބުނު ބޯޅަ ފޮނުވާލީ ނިލަންދޫގެ ގޯލްގެ ތިރީ ކަނަށެވެ. އޭގެ ކުރިން ލަނޑު ޖަހާނެ ފުރުސަތު އިބްރާހިމް މަހްދީ ހުސައިން (ހަބޭސް އިއްބެ) އަށްވެސް ލިބިގެން ދިޔަ އެވެ. މާޒިޔާއިން ނެގި ހުރަސް އޭނާ ބޮލުން ފޮނުވާލުމުން އެ ބޯޅަ ދިޔައީ ދަނޑިކައިރިން ބޭރަށެވެ.
މާޒިޔާގެ ދެ ވަނަ ލަނޑު ކާމިޔާބު ކުރީ ކޯނޭލިއަސް ސްޓްވާޓް (ކޯނޭ) އެވެ. އެ ލަނޑު ޖެހުމުގެ ކުރިންވެސް ލަނޑު ޖަހާނެ އެހެން ފުރުސަތުތެއްވެސް އޭނާ އަށް ލިބުނެވެ. އޭރިއާގެ ތެރެއަށް ވަދެފައި އޭނާ ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ. ދެ ވަނަ ލަނޑު އޭނާ ކާމިޔާބު ކުރީ 44 ވަނަ މިނެޓްގަ އެވެ.
ދެ ވަނަ ހާފު ފަށައިގެން، ނިލަންދޫވެސް ވަނީ ލަނޑު ޖަހާނެ ފުރުސަތުތައް ތަނަވަސް ކޮށްފަ އެވެ. ނިލަންދޫގެ ކޯޗް އަހްމަދު މުޖުތޮބާ (ފެސްކޯ) ބުނީ، އޭނާ ގޭމް ބިނާ ކުރީ ޕޮއިންޓެއް ހޯދަން ކަމަށެވެ. އެހެންނަމަވެސް ގިނަ ގޯލްތަކެއް ކޮޅަށް ވަނީ ނިލަންދޫއަށް ލިބުނު ފުރުސަތުތައް ބޭނުން ނުކުރެވިގެން ޓީމުގެ ކުޅުމަށް އައި ބަދަލުތަކުން ކަމަށެވެ.
މާޒިޔާގެ ތިން ވަނަ ލަނޑު، 64 ވަނަ މިނެޓްގައި ކާމިޔާބު ކުރީ ކެޕްޓަން އަސަދުﷲ އަބްދުﷲ އެވެ. ކޯނޭ ފޮނުވާލި ބޯޅަ ނިލަންދޫގެ ކީޕަރު މުހައްމަދު ޝަފީއު (ޗެކް) ޑައިވްކޮށް ދިފާއު ކުރުމުން ރީބައުންސަށް ނިކުތް ބޯޅަ ވެއްޓުނީ ހުހަށް އޮތް ގޯލްގެ ކުރިމައްޗަށެވެ. އަސަދުﷲ ވަނީ އެ ބޯޅަ ގޯލްގެ ތެރެއަށް ފޮނުވާލާފަ އެވެ.
އެ ލަނޑާ ހަމައަށް، ނިލަންދޫއިން ވަރަށް ރަނގަޅަށް ކުޅެމުން ދިޔަ ނަމަވެސް އެ ލަނޑަށް ފަހު އެ ޓީމުގެ ޓެކްޓިކަލް ގޭމް މުޅިން ގެއްލިގެން ދިޔަ އެވެ. ޖެހިގެން އައި މިނެޓްގައި ހަމްޒާ މުހައްމަދު (ހަމްޕް) ވަނީ މާޒިޔާގެ ހަތަރު ވަނަ ލަނޑު ކާމިޔާބު ކޮށްފަ އެވެ. ނިލަންދޫގެ އޭރިއާ ތެރެއަށް ބޯޅަ ހިފައިގެން ވަން ގޮތަށް ހަމްޕް ވަނީ ގޯލްގެ ދުރު ކަނަށް ބޯޅަ ވައްދާލާފަ އެވެ. މެޗުގެ މޮޅު ކުޅުންތެރިޔަކަށްވެސް ހޮވުނީ ހަމްޕް އެވެ.
ފަސް ވަނަ ލަނޑު ކާމިޔާބު ކުރީ ހަބޭސް އިއްބެ އެވެ. އޭނާ ލަނޑު ޖެހުމުން މާޒިޔާގެ އެޓޭކިން ލައިނަށް ކުޅުނު ހުރިހާ ކުޅުންތެރިން މެޗުގައި ލަނޑު ޖެހި އެވެ. މެޗުގެ ނިލަޔަށް ދެ ވަނައިގައި އޮތް އީގަލްސް އޮތީ މާޒިޔާ އާ ދެ ޕޮއިންޓް ކައިރީގަ އެވެ. މާޒިޔާގެ ކޯޗް ސެކްލޮވްސްކީ ބުނީ އެހެން ތާވަލުގައި އޮންނަ ހިސާބު ބަލަން އޭނާ ބޭނުން ނުވާ ކަމަށާއި އޭނާ މުހިންމީ މާޒިޔާ އެއް ވަނައިގައި އޮތުން ކަމަށެވެ.