އިސްލާމް ދީނަށާއި ރަސޫލާއަށް ފުރައްސާރަކޮށް މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އިން ނެރުނު ރިޕޯޓާއި ގުޅިގެން އަގޮޅިތީމުގައި މުޒާހަރާކުރި ބަޔަކު އަނިޔާވެރިކަމަށް ގޮވާލާފައިވާ މައްސަލައާއި ގުޅިގެން އެ މީހުން ފުލުހަށް ހާޒިރުވާން އަންގައިފި އެވެ.
އަގޮޅިތީމުގައި މުޒާހަރާކުރި ބަޔަކު އަނިޔާވެރިކަމަށް ގޮވާލާފައިވާ މައްސަލައާއި ގުޅިގެން ފުލުހަށް ހާޒިރުކުރުމަށް ޗިޓް ފޮނުވާފައިވާ ކަން ފުލުހުން ވަނީ ޔަގީންކޮށްދީފައެވެ. ނަމަވެސް އެއީ ކިތަށް މީހުން ކަމެއް ފުލުހުން ނުބުނެއެވެ. އަދި އެމީހުން ހާޒިރުވާން އަންގާފައިވަނީ ފުލުހުންގެ ކޮން އިދާރާއަކަށް، ކޮން ދުވަހަކު ކަމެއްވެސް ފުލުހުުން ނުބުނެއެވެ.
އިސްލާމް ދީނަށާއި ރަސޫލާއަށް ފުރައްސާރަކޮށް މޯލްޑިވިއަން ޑިމޮކްރަސީ ނެޓްވޯކުން ނެރުނު ރިޕޯޓާއި ގުޅިގެން އަގޮޅިތީމުގައި ކުރި މުޒާހަރާގައި އަނިޔާވެރިކަމަށް ގޮވާލާފައިވާ ކަމަށް ބުނާ މައްސަލަ ބެލުމަށް ބައެއް މީހުން ދަނީ ގޮވާލަމުންނެވެ. މުޒާހަރާގެ ބައެއް ބައިވެރިން ވަނީ ލާދީނީ މީހުން އަންދާލަށް ގޮވާލާ އަޑު އުފުލާފައެވެ. އަދި ބައެއް މީހުންގެ ނަންތައް ކިޔާ އެމީހުންނަށް އަދަބުދޭންވެސް ވަނީ ގޮވާލާފައެވެ.
ރާއްޖޭގައި އިސްލާމްދީން އޮތް ގޮތުގެ މައްޗަށް ކަމަށް ބުނެ އެމްޑީއެން އިން ނެރުނު ރިޕޯޓްގެ މައްސަލަ ބަލަން އިސްލާމިކް މިނިސްޓްރީން ވަނީ ފުލުހުންގެ އިދާރާއަށް ހުށައަޅާފައެވެ. އަދި އެ މައްސަލަ ފުލުހުން ދަނީ ބަލަމުންނެވެ.
އެމްޑީއެންގެ ރިޕޯޓްގައި ހުރި އިސްލާމީ އަގީދާއާ އިސްލާމީ ޝަރީއަތާއި ޚިލާފު ވާހަކަތަކާއި އިސްލާމްދީނަށާއި މާތް ރަސޫލާއަށް ފުރައްސާރަކޮށްފައި ހުރި ވާހަކަތައް ތަހުގީގު ބޭނުމަށްޓަކައި ދިރާސާ ކުރުމުގެ މަސައްކަތް ފަށާފައިވާ ކަމަށް ފުލުހުން ރޭ ވަނީ ބުނެފައެވެ. ފުލުހުން ބުނީ އެމްޑީއެންގެ ރިޕޯޓްގެ މައްސަލަ ބަލާ ގާނޫނީ ފިޔަވަޅު އަޅާނެ ކަމުގެ ޔަގީންކަން ދޭ ކަމަށެވެ. އަދި ފުލުހުން އިލްމުވެރިން މެދުވެރިކޮށް ފަށާފައިވާ ދިރާސާ ރިޕޯޓް ނިމުމުން އެމްޑީއެންގެ ރިޕޯޓާއި ގުޅިގެން އިދާރީގޮތުން އަޅަންޖެހޭ ފިޔަވަޅު އަޅަން ކަމާބެހޭ ފަރާތްތަކަށް ހުށައަޅާނެ ކަމަށެވެ.