ގައުމީ ފުޓްބޯޅަ ކޯޗުކަމުން އެފްއޭއެމުން އިހަށްދުވަހު ވަކިކުރި ބަލްގޭރިޔާގެ ކޯޗު ވެލީޒާ ޕޮޕޯފް އަކީ ނިއުރޭޑިއަންޓްގައި ކާމިޔާބު ކޯޗެކެވެ. އެކަމަކު ގައުމީ ޓީމަށް އައުމަށް ފަހު އޭނާގެ އުޅުން ހުރީ "ހައްދުފަހަނައަޅާފަ،" އެވެ. ކުޅުންތެރިން ލައްވައި ދިވެހި މުޖުތަމައާ ނުގުޅޭ އެތައް ގޯސްތަކެއް ހެދި އެވެ. ދިވެހިން އެކަންކަމަށް އަބަދުމެ އިހްތިރާމް ކުރާ ކަންކަމަށް ކޯޗު ޖޯކު ޖަހައި ހެދި އެވެ. ކުލަބުތަކުގެ ކޯޗުންނާ ވެސް ޖެހިގަތީ އެވެ. އެންމެ ފަހުން ކުޅުންތެރިންނަށް ދޮގުވެސް ހެދީ އެވެ. އޭގެ ސަބަބުން އޭނާ ސައިޒުވެ ކުޅުންތެރިންގެ ވެސް ދަށުވީ އެވެ.
މިއީ ވީ ގޮތެވެ.
ކޯޗު ކުޅުންތެރިންނާ ކޮށްފައިވާ އަހުލާގީގޮތުން ދަށުދަރައިގެ ބައެއް ޗެޓްލޮގްތަކާއި ފޮޓޯތައް މި ނޫހަށް ވެސް ވަނީ ލިބިފަ އެވެ. އެ ވާހަކަތަކާއި ފޮޓޯތަކަކީ މީގެ ކުރިން ދުވަހަކު ވެސް ގައުމީ ކޯޗެއްގެ ފުށުން ފެނިފައިވާ މަންޒަރުތަކެއްނޫނެވެ.
އެފްއޭއެމުން ބުނެފައިވަނީ ކޯޗު އުޅުނީ ކުޅުންތެރިން ހައްދަން ކަމަށާއި އޭނާގެ އަހުލާގީ ގިނަ މައްސަލަތަކެއް އެބަހުރި ކަމަށެވެ. އަދި އެއްގޮތަކަށް ވެސް ގަބޫލުނުކުރެވޭނެ ޒާތުގެ ވާހަކަ ކޯޗު ކުޅުންތެރިންނާ ދައްކާފައިވާ ކަމަށެވެ. ކުޅުންތެރިން ނިދާގަޑިއަކީ ރޭގަނޑު 10 ޖަހާއިރު ކަމަށް އޮންނައިރު ދަންވަރު އެކެއް ޖަހާއިރު ކޯޗު ކުޅުންތެރިންނާ ސޯޝަލް މީޑިޔާގައި ވާހަކަ ދައްކާފައި ވެސް އެބަހުއްޓެވެ.
މި ރިޕޯޓް މިލިޔަނީ ކޯޗުގެ ހަރަކާތްތައް ވަރަށް ގާތުން ބަލަމުންދިޔަ ގައުމީ ޓީމުގެ އޮފިޝަލުންގެ ފަރާތުން ލިބުނު މައުލޫމާތުގެ މައްޗަށް ބިނާކޮށެވެ. ނަން ނުޖަހަން ވަރަށް ބޮޑަށް އެދިފައިވާތީވެ މި ރިޕޯޓަށް މައުލޫމާތު ދިން އެއްވެސް އޮފިޝަލެއްގެ ނަމެއް ބޭނުމެއް ނުކުރާނަމެވެ.
ޓީމުގެ އޮފިޝަލަކު ބުނީ އިންޑިއަން އޯޝަން އައިލެންޑް ގޭމްސްގެ ފުރަތަމަ މެޗުގައި މަޔޯއްޓޭ އަތުން 3- 1އިން ބަލިވި މެޗަށް ފަހު ނޫސްވެރިންގެ ކުރިމަތީގައި ކުޅުންތެރިންގެ އަހުލާގީ މައްސަލަތަކުގެ ވާހަކަ ކޯޗު ދެއްކީ ދޮގުހަދައިގެން ކަމަށެވެ.
"ކުޅުންތެރިންނަށް ސިމް ލިބުނީ ވެސް އޭގެ ދެ ދުވަސް ފަހުން. ކުޅުންތެރިން އަނެއް ދުވަހު ޕްރެކްޓިހުގައި އެންމެ ފުރަތަމަ ވެސް ކޯޗާ ކުރީ އެ ސުވާލު. އޭނާ މެދަށް ލައިގެން ސުވާލުކުރީ ކީއްވެހޭ އަހަރުމެންނޭ ކިޔައިގެން ދޮގުހެދީ. އެހެން އެހީމަ ކޯޗު ބުނީ ތިމަންނަށް ނުބުނަމޭ. ތިމަންނަ ބުނިގޮތަކަށްނޫނޭ މީޑިޔާތަކުގައި ލިޔެފައިއޮތީ. ތިމަންނަށް ހުރިހާ މީޑިޔާތަކެއް ބަލާފައި ވީގޮތް އޮޅުފިލުވާނަމޭ. އެކަމަކު އަބަދު "ފުއްޕާފަ" ހުންނަ މީހާ އޭގެ ފަހުން އުޅުނީ ވަރަށް މަޑުމަޑުން. ކުޅުންތެރިއަކާ ދިމާލަށް ބަލާލަން ވެސް ނުކުރޭ އޭނާ އަށް އޭގެފަހުން،" އޮފިޝަލް ބުންޏެވެ.
ކޯޗު ކުޅުންތެރިންނާ ބެހޭ ގޮތުން ދެއްކި ވާހަތަކުގެ ސަބަބުން އޭނާއާއި ކުޅުންތެރިންގެ މޫނުކެނޑުނެވެ. ހޮޓަލުގައި ތިބޭ އިރުގައި ވެސް ކޯޗުގެ ބަސް މަދުވި އެވެ. ގިނައިން ހުންނަނީ އެއްގޮތަކަށް ވެސް ވާހަކަ ނުދައްކަ އެވެ.
"ކޯޗު އެއްގޮތަކަށް ވެސް ވާހަކަ ދައްކާތަނެއް ނުފެނޭ. މެޗަށް ދާއިރުވެސް އޭނާ ވާހަކަ ދައްކާނީ ވަރަށް މަދުން މެނޭޖަރާއެކަނި. މެނޭޖަރު ކައިރީގައި ބުނެގެން ކުޅުންތެރިން ގާތުވެސް އެއްޗެއް ބުނަނީ. ދެން އޭނާ ދެ ވަނަ މެޗަށް ފަހު ފުރަތަމަ ބުނީ ނޫސްވެރިންނާ ވާހަކަ ނުދައްކާނަމޭ. ފަހުން ބުނީ ތިމަންނަ ބުނާގޮތަށް ޖަހަންޏާއޭ ވާހަކަ ދައްކާނީ،" ގޭމްސް ކަވަރު ކުރަން ރިޔޫނިއަން އަށް ދިޔަ ނޫސްވެރިއަކު ކިޔާދިނެވެ.
ގައުމީ ޓީމުގެ އޮފިޝަލަކު ބުނީ ކުޅުންތެރިން ކޯޗާ ސުވާލުކުރުމުން ކޯޗަށް ހަދާނެގޮތް ހުސްވި ކަމަށާއި އޭނާގެ އުޅުން ކަންކަންހުރި ގޮތާބެހޭގޮތުން މި ނޫހުގައި ޖެހި ރިޕޯޓާގުޅިގެން ނޫހަށް މައުލޫމާތުދިނީ ކޮންކުޅުންތެރިންނެއްތޯ ބަލަން ކޯޗު ވަކިވަކިން ބައެއް ކުޅުންތެރިން ކައިރީގައި އެވާހަކަ އެހި ކަމަށެވެ.
"ބައެއް ކުޅުންތެރިންނާ ދިމާލަށް ވަރަށް މަޑުމައިތިރިކޮށް ބުނެފައި އެބަހުރި މީނަ ވަރަށް ވައްތަރޭ އެކަހަލަ ކަމެއް ކޮށްފާނެހެން. ކުޅުންތެރިންނާ އޭނާ ސުވާލުކޮށް ހަދާ އިންޓަވިއުދިން ކުޅުންތެރިން ހޯދަން. އެކަމަކު މިއީ ބޮޑު މުބާރާތެއްގެ ތެރެ. ދެން ފަހުން އޭނާ ކުރި ކަމަކީ ސޯޝަލް މީޑިޔާގައި އޭނާ ދައްކާފައިހުރި ހުރިހާ ވާހަކަތަކާއި ފޮޓޯތައް ޑިލީޓްކުރީ. ކުޅުންތެރިން ފޭސްބުކަށް ވަންނަ ވާހަކަ ދައްކާއިރު ކޯޗު މިކަންތައް އެންމެ ބޮޑު މީހަކީ. އޭނާ ބައެއް ކުޅުންތެރިން އެއްކޮށްގެން އެންމެ ބޮޑަށް އެ ސަކަރާތްޖަހަނީ،" އޮފިޝަލް ބުންޏެވެ.
އިތުރަށް ވާހަކަ ދައްކަމުން އޭނާ ބުނީ ޕޮޕޯފް އަކީ އިސްލާމްދީނުގެ ކަންކަމަށް ވެސް ޖޯކުޖަހާ މީހެއް ކަމަށެވެ.
"އަހަރުމެންގެ ތެރޭގައި ދީނީ ކަންކަމަށް ވަރަށް ސަމާލުކަންދޭ ކުޅުންތެރިން އުޅޭ. އެކަމަކު އެކުޅުންތެރިން އެކަމާ އުޅޭތީވެ އޭނާ އަށް ކަމަކުނުދޭ. ވަގުތަށް ނަމާދަށް ދާތީ އޭނާ އެބަހުރި ކުޅުންތެރިންނަށް ޖޯކު ޖަހާފައި އެކަމަށް. މިފެންވަރަށް އޭނާ ވެއްޓިފައި އެބަހުރި. އަދިވެސް ކިތަންމެ ކަމެއްގެ އޭނާ ކޮށްފައި އެބަހުރި،" ގިނަ ދުވަސްތަކެއް ވަންދެން ގައުމީ ޓީމަށް ކުޅެފައިވާ ކުޅުންތެރިޔާ ކިޔައިދިނެވެ.
ގޭމްސްގެ ދެ ވަނަ މެޗުގައި ރާއްޖެ މޮޅުވީ ސީޝެލްސް އަތުން 2-1އިންނެވެ. އެ މެޗަށް ފަހު ޕޮޕޯފް ބުނީ އެއީ އޭނާ މިހާތަނަށް ދުށް އެންމެ މޮޅު މެޗު ކަމަށެވެ. މި ރިޕޯޓަށް ވާހަކަ ދެއްކި އޮފިޝަލުން ވެސް އެކަމަށް އެއްބަސްވެ އެވެ.
"އެއީ ތެދެއް. މަ ވެސް ނުދެކެން އެހާ މޮޅަށް ގައުމީ ޓީމު ކުޅުނުތަނެއް. ކުޅުންތެރިން 90 މިނިޓްގައި ހަމަ މަރަށް ކުޅުނީ. މީގަ ވީގޮތަކީ ކޯޗު ދެއްކި ވާހަކަތަކުގެ ސަބަބުން ކުޅުންތެރިން ބޭނުންވީ އޭނާ އެ ދައްކަނީ ދޮގުކަން ސާބިތުކޮށްދޭން. އެހެންވާނެ އެއްނު. އެމީހުންގެ މައިންބަފައިން، އަނބިން، އާއިލާމީހުން ގުޅާފައި އެބަ ސުލާކުރޭ ތިއީއޭ ތިތަނަށް ގޮސް ތިކުރާ ކަމަކީ. މިހެންވީމަ ކޯޗު ދެކެ ރުޅިއައިސްފައި އެންމެވެސްތިބީ،" އޮފިޝަލް ތަފްސީލުކޮށްދިނެވެ.
މި ރިޕޯޓަށް ވާހަކަ ދެއްކި އޮފިޝަލުން ބުނީ ކޯޗު ވަކިކުރަން މާލަސްވެއްޖެ ކަމަށެވެ. އެކަމަކު އާއްމުން ކޯޗަށް ތައުރީފްކޮށް ވާހަކަ ދައްކަނީ ކީއްވެތޯ އެހުމުން އެމީހުން ބުނީ "ހަގީގަތް ނޭނގެނީ،" ކަމަށެވެ.
"އާއްމުންނަކަށް ނޫނީ ނޫހަށް ކޮމެންޓް ކުރާ މީހުންނަކަށް ނޭނގޭނެ ދޯ ކޮންމެ ދުވަހަކު މިތާގައި ވާގޮތެއް. މިކަންކަން ބަލާހަދާ މީގެ ތެރޭގައި އުޅޭބަޔަކަށްތާ އެނގޭނީ. ކޯޗު މިހުންނަނީ އަބަދުވެސް އާއްމުންނާ ވަރަށް ގުޅިފައި. އޭނާ ދައްކަނީ އާއްމުންގެ ސަޕޯޓްލިބޭ ކަހަލަ ވާހަކަ. އެކަމަކު އޭނާ ގޯސް ހަދަން ފެށީ ވެސް. އަސްލު އޭނާ ބެލީ ކުޅުންތެރިންނާ ގުޅާލައިގެން އޭނާ މަގާމުގައި ހުންނަން. އޭނާ އެއްގޮތަކަށް ވެސް ހިޔެއް ނުކުރޭ މިހެން ކަންކަން ވެދާނެ ކަމަށް. މިސާލަކަށް ބުނެބަލަ އޭނާ މިތަނުގައި ކުޅުންތެރިންނާއެކު މަޖާނަގާފަ ގޮސް ކުޅުންތެރިން ކައިރީގައި އެކަން ނުކުރާށޭ ބުނީމަ ހައްލުވާނެތަ. ފުރަތަމަ ކޯޗެއްނު ޑިސިޕްލިން ވާންޖެހޭނީ. އަހަރުމެންނަށް ދަސްވެފައި ހުރި ޑިސިޕްލިން އަކީ އިހުތިރާމް ހޯދަން ބޭނުންމީހާ ފުރަތަމަ އިހުތިރާމްކުރަން،" އޮފިޝަލް ބުންޏެވެ.
އެފްއޭއެމުން ބުނީ ގައުމީ ޓީމަށް ދެން ކޮންމެ ކޮންމެ ކޯޗަކު ނުގެންނާނެ ކަމަށެވެ. އޭގެ ބަދަލުގައި ހަރުދަނާ މޮޅު ކޯޗަކު ގެނައުމަށް ވަނީ މަސައްކަތް ފަށައިފަ އެވެ.