އަހުލާގީ މައްސަލަތަކާހުރެ ގައުމީ ކޯޗުކަމުން ވަކިކުރި ނިއުގެ ކުރީގެ ކޯޗު ބަލްގޭރިޔާގެ ވެލީޒާ ޕޮޕޯފް ދެން އެކުލަބަށް ނުގެންނާނެ ކަމަށް ނިއުއިން ބުނެފި އެވެ.
ޑިރެކްޓަރ އޮފް ފުޓްބޯލް އަންވަރު އަލީ މިހެން ވިދާޅުވީ ޕޮޕޯފްއާއެކު ނިއުގައި މަސައްކަތްކުރި ބައެއް ފަރާތްތަކުން އޭނާ އަލުން ކުލަބަށް ގެނައުމަށް މަސައްކަތް ކުރަމުންދާ ވަގުތެއްގަ އެވެ.
"ޕޮޕޯފް ނުގެންނާނަން. މިކުލަބާ ދުރުގައި ތިބި ބަޔަކު އަދި އެހެން އޭނާ ގެންނަން އުޅުނަސް ނިއު އަށް މީހަކު ގެންނަންޏާ (މިވަގުތު) އެކަން ކުރާނީ އަހަރެން. ޕޮޕޯފް ގެނައުމުގެ ވިސްނުމެއް ނިއުރޭޑިއަންޓަކު ނެތް،" އަންވަރު ވިދާޅުވި އެވެ.
ނިއުރޭޑިއަންޓްގައ 2013 ވަނަ އަހަރު ކާމިޔާބު ކޯޗު ހޯދި ގައުމީ ޓީމަށް އައީ މި އަހަރު ކުރީކޮޅު އެވެ. ނަމަވެސް އޭނާ ގައުމީ ކޯޗުކަމުން ވަކިކުރީ ނަތީޖާ ނުނެރެވުމުގެ އިތުރަށް އަހުލާގީ ބޮޑެތި މައްސަލަތަކާހުރެ އެވެ.
އެ ގޮތުން ކުޅުންތެރިންނާ މާގާތްގުޅުން ބޭއްވުމާއި އެފްއޭއެމުން ކުޅުންތެރިންނަށް އަންގަން ބޭނުންވާ މުހިންމު އެންގުންތައް އެންގުމަށް ހެދި ވައިބާ ގްރޫޕުގައި ބަދުއަހުލާގީ ފޮޓޯ އާއި ވާހަކަ ދައްކައި ކުޅުންތެރިން އެކަމުގައި އޭނާ ވަނީ ބައިވެރިކުރުވައިފަ އެވެ. މީގެ އިތުރުން އެތައް ވިޔާނުދާ ކަމެއް އޭނާ ވަނީ ކުޅުންތެރިން ބޭނުންކޮށްގެން ކުރުވައިފާ ކަމުގެ ތުހުމަތު ވަނީ އޭނާގެ ބޮލުގައި އެޅިފަ އެވެ.