ދޮށީ އުމުރުގެ މީހުނާބެހޭ ގައުމީ އެކްޝަން ޕްލޭނެއް މިއަދު އިފުތިތާހު ކޮށްފި އެވެ. އެކްޝަން ޕްލޭން އިފްތިތާހް ކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދެވެ.
ހޮޓެލް ޖެންގައި މިއަދު ބޭއްވި ރަސްމިއްޔާތެއްގައި ގައުމީ އެ އެކްޝަން ޕްލޭން އިފްތިތާހު ކުރި އިރު ކޮންމެ އަހަރެއްގެ ސެޕްޓެމްބަރު މަހުގެ އެއްވަނަ ދުވަހަކީ މާމަ ކާފަގެ ދުވަހުގެ ގޮތުގައި ހަމަޖައްސާފައި ވެއެވެ.
ރަސްމިއްޔާތުގައި މިނިސްޓަރު ޝިދާތާ ޝަރީފު ވިދާޅުވީ އަޅާލުމާއި ރައްކާތެރިކަމާއި، ދުޅަހެޔޮ ސިއްހަތާއި މުޖުުތަމައުގެ ބައިވެރިވުން ދޮށީ އުމުރުގެ މީހުންނަށް ލިބެންޖެހޭނެ ކަމަށާއި އެކަންކަން ހިމެނޭ ގޮތަށް ގައުމީ އެކްޝަން ޕްލޭނެއް މިއަދު ގާއިމުވެގެން ދިޔުމަކީ ވަރަށް ބޮޑަށް އުފަލެއް ކަމަށެވެ.
ޝިދާތާ ވިދާޅުވީ މާމައިންނާއި ކާފައިންގެ ދުވަސް އަންނަ އަހަރުން ފެށިގެން ރާއްޖޭގައި ކުލަ ގަދަކޮށް ފާހަގަ ކުރައްވާނެ ކަމަށެވެ.
"އަޅުގަނޑުމެން ތެރޭގަ އެހާ ފަރިތަ ކަމަކަށް ނުވެދާނެ މާމައިންނާއި ކާފައިންނަށް ހާއްސަ ދުވަހެއް ފާހަގަ ކުރުން މިއީ. އެހެން ނަމަވެސް ގަބޫލު ކުރެވެންޖެހޭނެ އެއީ މުހިންމު ކަމެއް ކަން،" އޭނާ ވިދާޅުވި އެވެ.
ޖެންޑާ މިނިސްޓްރީން ބުނީ އެކްޝަން ޕްލޭނުގެ ތަސައްވުރަކީ، ދޮށީ އުމުރުގެ މީހުންނަށް ރައްކާތެރި، އަޅާލާ، އޯގާތެރި ވެއްޓެއް ހޯދައި ދިނުމާއި ދޮށީ އުމުރުގެ މީހުންނަކީ މުޖުތަމައުގައި ބައިވެރިވާ ބަޔަކަށް ހެދުމާއި، ދުޅަހެޔޮ ސިއްހަތެއްގައި މިނިވަންކަމާއެކު ދިރިއުޅެވޭނެ ބަޔަކަށް ހެދުން ކަމަށެވެ.
