އެމްޑީޕީގެ ލީޑަޝިޕް އިންތިޚާބުގެ ވޯޓް ނަަގަން އެ ޕާޓީން އެންމެ ފަހުގެ ތައްޔާރީތައް ވެއްޖެ އެވެ.
އެމްޑީޕީގެ ވޯޓްލުން ކުރިއަށްދާނީ މާދަމާގެ މެންދުރު ފަހު 2:00 ފެށިގެން 6:00 އަށެވެ. މި އިންތިޚާބުގައި 87،439 މެންބަރަކަށް ވޯޓް ލުމުގެ ހައްގު ލިބިފައި ވެއެވެ. މިއީ ސިޔާސީ ޕާޓީއަކުން ބާއްވާ މިފަދަ އިންތިޚާބެއްގައި އެންމެ ގިނަ ބަޔަކަށް ވޯޓްލުމުގެ ހައްގު ލިބިފައިވާ އިންތިޚާބެވެ.
އެމްޑީޕީގެ ލީޑާޝިޕް އިންތިޚާބުގެ ވޯޓް ނެގުމަށް ރާއްޖޭގެ ހުރިހާ ރަށެއްގައި ވޯޓް ފޮށި ބަހައްޓާފައި ވެއެވެ. އަދި މާލޭގައި ދިރިއުޅޭ އެކި ރަށްރަށުގެ އެމްޑީޕީގެ މެންބަރުންނާއި، މާލެއަށް ނިސްބަތްވާ އެމްޑީޕީގެ މެންބަރުން ވޯޓްލުމަށް ވޯޓްފޮށި ބަހައްޓާފައި ވެއެވެ.
އައްޑޫއާއި ފުވައްމުލަކަށް ނިސްބަތްވާ އެމްޑީޕީގެ މެންބަރުން ވޯޓްލުމަށް ވޯޓްފޮށި ހުންނާނީ އެމްޑީޕީގެ މައި ހަރުގޭގަ އެވެ. އެެހެން ހުރިހާ ވޯޓް ފޮއްޓެއް އިސްކަންދަރު ސުކޫލް ހޯލުގަ އެވެ. ހުޅުމާލޭގައި ވޯޓްފޮށި ހުންނާނީ ގާޒީ ސުކޫލްގަ އެވެ. ވިލިމާލޭގައި އެމްޑީޕީގެ ހަރުގޭގަ އެވެ. ސްރީލަންކާގައި ވެސް މިފަހަރު ވޯޓް ފޮއްޓެއް ހުންނާނެ އެވެ.
މީގެ އިތުރުން ރަށްރަށުގައި ވޯޓް ފޮށި ބަހައްޓާފައި ހުންނާނީ އެ ރަށެއްގެ އެމްޑީޕީ ހަރުގޭގައެވެ.
މި އިންތިޚާބުގައި އެމްޑީޕީގެ ރައީސް ކަމަށް ކުރިމަތިލެއްވީ މިހާރު ވެސް އެ މަގާމުގައި ހުންނެވި މަޖިލީހުގެ ރައީސް މުހައްމަދު ނަޝީދެވެ. އެމްޑީޕީގެ ނާއިބު ރައީސް ކަމަށް ކުރިމަތިލެއްވީ މިހާރު ވެސް އެ މަގާމުގައި ހުންނެވި ރައީސް އޮފީހުގެ މިނިސްޓަރު މުހައްމަދު ޝިފާޒް (ޝިއްޕެ) އަދި މެންބަރު މުހައްމަދު އަސްލަމެވެ.
ޝިފާޒާއި އަސްލަމް ވަނީ ނާއިބު ރައީސް ކަމަށް ވާދަވެރި ކެންޕޭނެއް ކުރައްވާފަ އެވެ.