ފިރިހެނަކު ގެސްޓް ހައުސްއަކަށް ވައްދައި އަންހެނަކު، އޭނާގެ އަތުން ވޮލެޓަކާއި ފޯނެއް މިއަދު ފޭރި ގަނެފި އެވެ.
ފުލުހުންގެ މީޑިޔާ އޮފިޝަލް ވިދާޅުވީ މާލޭގެ ގެސްޓް ހައުސްއަކަށް "ހައްދާލައިގެން" ފިރިހެނަކު ވައްދައި އޭނާގެ އަތުގައި އޮތް ފޯނާއި ވޮލެޓު ފޭރިގަނެގެން ފިލަން އުޅުނު 37 އަހަރުގެ އަންހެނަކު މިހާރު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
މި އަންހެން މީހާ އެ އަމަލު ހިންގާފައިވަނީ ފިރިހެނެއްގެ ކައިރީގައި "އެހީތެރިކަމަށް" ބޭނުންވާ ކަމަށް ބުނެ އޮޅުވާލައިގެން އެ ފިރިހެން މީހާ ގެސްޓް ހައުސް އަށް ވެއްދުމަށް ފަހު ކަމަށް ފުލުހުން ބުނެ އެވެ. މި އަންހެން މީހާ ހައްޔަރުކޮށްފައިވަނީ މާފަންނުގައި ހުންނަ ގެސްޓް ހައުސްއަކުންނެވެ.
ފުލުހުން ބުނީ މި މައްސަލަ ފުލުހުންނަށް ހުށަހެޅުމާ ގުޅިގެން އެ ސަރަހައްދު ޕެޓްރޯލް ކުރަން އުޅުނު ފުލުހުން ގެސްޓް ހައުސް އަށް ވަދެ އެ އަންހެން މީހާ އެ ވަގުތު އުޅުނު ކޮޓަރި ފާސްކުރިއިރު ފޭރިގެންފައިވާ ފޯނު ޑަސްބިން ތެރެއިން ފެނިފައިވާ ކަމަށެވެ. އަދި މި މައްސަލާގައި ހައްޔަރު ކުރި އަންހެން މީހާއަކީ މަސްތުވާ ތަކެއްޗާއި ފޭރުން އަދި ބަދުއަހްލާގީ އަމަލު ހިންގުމުގެ ތަފާތު އެކި ރިކޯޑު އޮތް މީހެއް ކަމަށެވެ.