ނޭޕާލްގައި މިހާރު ކުރިއަށްދާ ސާފް ޗެމްޕިއަންޝިޕް 19 އަހަރުން ދަށުގެ މުބާރާތުގެ ފުރަތަމަ މެޗުގައި އަފްގާނިސްތާން އަތުން 3-1 އިން ރާއްޖެ މިއަދު ބަލިވެއްޖެ އެވެ.
މި މެޗުގައި ރާއްޖޭގެ ހަމައެކަނި ލަނޑު ޖެހީ މެޗު ނިމެން ތިން މިނިޓެއްވެފައި ވަނިކޮށް ހަމްދާން އަލީ އެވެ. މީގެ އިތުރުން ކައުންޓައެޓޭކެއްގައި ރާއްޖޭގެ އަލީ ސޮލާހު 34 ވަނަ މިނިޓްގައި ފޮނުވާލި ބޯޅަ އަފްގާނިސްތާން ކީޕަރު ހުށިހާރުކަމާއެކު ދިފާއު ކުރި އެވެ.
މި މެޗުގެ ފުރަތަމަ ގޯލު އަފްގާނިސްތާން ޖެހީ ލިބުނު ކޯނަރަކުން ފުރަތަމަ ހާފުގެ ފަހު މިނިޓްގައި މަސްއޫދު ހަބީބީ އެވެ. ދެ ވަނަ ލަނޑު 71 ވަނަ މިނިޓްގައި ޖެހީ އަލީ އަހުމަދު މަންސޫރީ އެވެ. ތިން ވަނަ ލަނޑު މުހައްމަދު އަހުމަދީ ޖެހީ 82 ވަނަ މިނިޓްގަ އެވެ.
ސާކުގެ އަށް ގައުމުގެ ތެރެއިން ހަ ގައުމަކުން ވާދަކުރާ މުބާރާތުގައި ރާއްޖެ ގްރޫޕް ސްޓޭޖުގައި ކުޅޭ ފަހު މެޗުގައި އަންނަ ބުދަ ދުވަހު ކުޅޭނީ އިންޑިޔާއާ ދެކޮޅަށެވެ. އެ މެޗުން ބަލިވެއްޖެނަމަ ރާއްޖެ ސެމީ އަށް ނުހޮވި ކަޓާނެ އެވެ.