ސާފް ޗެމްޕިއަންޝިޕް 19 އަހަރުން ދަށުގެ ފުޓްބޯޅަ މުބާރާތުގައި އިއްޔެ ރާއްޖެ އަތުން 3-1 އިން މޮޅުވި ނަމަވެސް އަފްގާނިސްތާނަށް ދެއްކުނީ އަސްލު ކުޅުމެއްނޫން ކަމަށް އެ ގައުމުން ބުނެފި އެވެ.
ކޯޗު ލޮގަވާލް ބުނީ އޭނާގެ ޓީމު ޕްރެކްޓިސް ކުރިގޮތަށް މެޗުގައި ނުކުޅެވުނު ކަމަށެވެ.
"މިއީ (މެޗުގައި ފެނިގެންދިޔައީ) އަހަރުމެންގެ (އަސްލު) ކުޅުމެއްނޫން. އަހަރުމެން ޕްރެކްޓިސް ކުރި ގޮތަށް އަހަރުމެންނަށް ނުކުޅެވުނު. އަހަރުމެން ބޭނުންވީ ވީހާ ބޮޑަށް ކުރިއަރައި ގިނަ ގޯލު ޖަހަން،" ކޯޗު ބުންޏެވެ.
މި މެޗުގައި ރާއްޖެއިން ލަނޑު ޖެހީ އަފްގާނިސްތާން ތިން ލަނޑު ޖެހި ފަހުންނެވެ. އެ ގައުމުން މެޗުގެ ފުރަތަމަ ގޯލު ޖެހީ ފުރަތަމަ ހާފުގެ ފަހު މިނިޓްގައި ލިބުނު ކޯނަރަކުންނެވެ.
ތިން ޓީމު ހިމެނޭ ގްރޫޕުގައި އަފްގާނިސްތާން ދެން ކުޅެން ޖެހޭނީ އިންޑިޔާއާ އެވެ.
ސާކުގެ އަށް ގައުމުގެ ތެރެއިން ހަ ގައުމަކުން ވާދަކުރާ މުބާރާތުގެ ސެމީ ފައިނަލަށް ދާނީ ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެ ޓީމެވެ.