މާލެ އަތޮޅުގައި ހިންގާ، ކުޑަހިތި ރިސޯޓު ވިއްކާލުމަށް، ދަރަންޏެއް ނުވަތަ މައްސަލައެއް އޮތްތޯ ބަލަން އިއުލާން ކޮށްފި އެވެ.
ޓޫރިޒަމް މިނިސްޓްރީން ކޮށްފައިވާ އިއުލާނެއްގައި ބުނީ ޓޫރިސްޓް ރިޒޯޓެއް ތަރައްގީ ކުރަން ކުއްޔަށް ދޫކޮށްފައިވާ ކ. ކުޑަހިތި (ކޮކޯ ޕްރިވޭ ކުޑަހިތި އައިލެންޑް) ލީސް އެގްރީމަންޓްގެ ދަށުން އެރަށް ކުއްޔަށް ހިފާފައިވާ ފަރާތަށް ލިބިދީފައިވާ އެންމެހާ ޙައްގުތައް އެހެން ފަރާތަކަށް ބަދަލު ކުރުމުގެ ހުއްދައަށް އެދި އެފަރާތުން ހުށަހަޅާފައިވާ ކަމަށެވެ.
އެހެންކަމުން އެ ރަށާއި ގުޅިގެން އެއްވެސް ދަރަންޏެއް ނުވަތަ މައްސަލައެއް އޮތް ފަރާތެއް ވާނަމަ 14 ދުވަހުގެ ތެރޭގައި އެ މިނިސްޓްރީ އަށް އަންގަން އެދޭ ކަމަށެވެ.
ދަރަންޏެއް ނުވަތަ މައްސަލައެއް އޮތްތޯ ބަލަން ޓޫރިޒަމް މިނިސްޓްރީން އިއުލާނު ކުރަނީ އެ ރިސޯޓު ކުއްޔަށް ހިފާފައިވާ ފަރާތުން ރިސޯޓު ވިއްކާލާށެވެ. ނަމަވެސް ކުޑަހިތި ރިސޯޓު ގަންނަނީ ނުވަތަ ވިއްކާލަނީ ކޮން ފަރާތަކަށް ކަމެއް ނޭނގެ އެވެ.
ރާއްޖޭގެ ރިސޯޓުތައް ވިއްކާލުމަކީ އާއްމު ކަމެވެ. މި އަހަރުތެރޭގައި ވެސް ދެ ރިސޯޓެއް ވިއްކާލާފައިވެ އެވެ.