ނޭޕާލްގައި ކުރިއަށްދާ ސާފް ޗެމްޕިއަންޝިޕް 19 އަހަރުން ދަށުގެ ފުޓްބޯޅަ މުބާރާތުގައި އިއްޔެ އަފްގާނިސްތާން އަތުން 3-1 އިން ރާއްޖެ ބަލިވީ އިސްކޮޅުން ކުރުވުމުން ކަމަށް ރާއްޖެއިން ބުނެފި އެވެ.
ޓީމުގެ ކޯޗު މުހައްމަދު އާތިފް މެޗަށް ފަހު ބުނީ ދެ ޓީމުގެ ތަފާތަކީ އިސްކޮޅު ކަމަށެވެ.
"އަފްގާނިސްތާނަށް އޮތީ އިސްކޮޅުގެ އެޑްވާންޓޭޖް. އެއީ ދެ ޓީމުގެ ތަފާތަކީ،" އާތިފް ބުންޏެވެ.
އޭނާ ބުނީ މެޗުގައި ކުޅުންތެރިން ދެއްކި ކުޅުމާމެދު ހިތްހަމަޖެހޭ ކަމަށެވެ.
"ކުޅުންތެރިން ވަރަށް ރަނގަޅަށް ކުޅުނު. އަހަރެން ވަރަށް ހިތްހަމަޖެހޭ ކުޅުންތެރިން ދެއްކި ކުޅުމަށް. އަހަރެން ވަރަށް ހިތްހަމަޖެހޭ އެމީހުންގެ މަސައްކަތާމެދު. އެމީހުންނަކީ އާ އަދި ދަސްކުރަމުން އަންނަ ކުޅުންތެރިން،" އާތިފް ބުންޏެވެ.
ކަނޑަށްވުރެ 1500 މީޓަރު އުހުގައި މެޗު ކުޅެން ޖެހުމުން އެއްވެސް ވަރަކަށް ކުޅުންތެރިންނަށް އުނދަގޫވިތޯ ނޭޕާލްގެ ނޫސްވެރިން ސުވާލުކުރުމުން އާތިފް ބުނީ އެއީ މައްސަލައެއްނޫން ކަމަށެވެ.
"ނޫން. އެއީ މުޅިން މައްސަލައެއް ނޫން، މިއީ ފުޓްބޯޅަ. ކޮންމެ ކަހަލަ ސިޓުއޭޝަނެއްގައި ވެސް ކުޅެން އަހަރުމެން ތައްޔާރުވާންޖެހޭނެ. އަދި މިއީ އަހަރުމެންނަށް މައްސަލައެއް ވެސް ނޫން،" އާތިފް ބުންޏެވެ.
އޭނާ ބުނީ އަންނަ ބުދަ ދުވަހު އިންޑިޔާ ބަލިކޮށް ސެމީ ފައިނަލަށް ދާން ވަރަށް މަސައްކަތް ކުރާނެ ކަމަށެވެ. އަދި އެ މެޗަކީ ވަރަށް ބޮޑު ޗެލެންޖެއް ކަމަށެވެ.
މުބާރާތަށް މާލެއިން ފުރުމުގެ ކުރިން އާތިފް ބުނީ ރާއްޖެގެ ޓީމަކީ ފައިނަލް ކުޅެވޭހާ ފެންވަރުހުރި ޓީމެއް ކަމަށާއި ފައިނަލަށްދާން ވަރަށް މަސައްކަތް ކުރާނެ ކަމަށެވެ.
ރާއްޖެ އަތުން މޮޅުވި ނަމަވެސް އަފްގާނިސްތާން ކޯޗު ލޮގަވާލް ބުނީ އޭނާގެ ޓީމު ޕްރެކްޓިސް ކުރިގޮތަށް މެޗުގައި ނުކުޅެވުނު ކަމަށެވެ. އަދި ބޭނުންވީ ވީހާ ބޮޑަށް ކުރިއަރައި ގިނަ ގޯލު ޖަހަން ކަމަށާއި ނަމަވެސް އެކަން ނުވި ކަމަށެވެ.
މި މެޗުގައި ރާއްޖެއިން ލަނޑު ޖެހީ އަފްގާނިސްތާން ތިން ލަނޑު ޖެހި ފަހުންނެވެ. އެ ގައުމުން މެޗުގެ ފުރަތަމަ ގޯލު ޖެހީ ފުރަތަމަ ހާފުގެ ފަހު މިނިޓްގައި ލިބުނު ކޯނަރަކުންނެވެ.
ތިން ޓީމު ހިމެނޭ ގްރޫޕުގައި އަފްގާނިސްތާން ދެން ކުޅެން ޖެހޭނީ އިންޑިޔާއާ އެވެ.