ތޫނު އެއްޗަކުން ހަމަލާދީ މަރާލި ޓެކްސީ ޑްރައިވަރު ގާސިމް ހަސަންގެ މަރާއި ގުޅުވައިގެން ކަނޑިތީމު ދާއިރާގެ މެމްބަރު އަބްދުﷲ ޝަހީމަށް ތުހުމަތުކޮށް ބައެއް ފަރާތްތަކުން ފަތުރަމުންދާ ވާހަކަތައް އޭނާ ދޮގުކޮށްފި އެވެ.
ބައެއްގެ ރަހުމްކުޑަ ހަމަލާތަކެއްގައި ވަރަށް ބޮޑަށް ޒަހަމްވެފައި އޮއްވާ ގާސިމް ފެނިފައިވަނީ ބުދަ ދުވަހުގެ ރޭ 21:07 އެހާކަންހާއިރު ހުޅުމާލެ ރީތިގަސްމަގުގައި އޮއްވައެވެ. ގާސިމް ހޮސްޕިޓަލަށް ގެންދިޔަތާ މާގިނަ އިރުތަކެއްނުވެ ވަނީ މަރުވެފައެވެ.
ގާސިމްގެ މަރާ ގުޅިގެން ތަފާތު ވާހަކަތައް ފެތުރެމުންދާއިރު، އެ މަރާ ކަނޑިތީމު ދާއިރާގެ މެމްބަރު އަބްދުﷲ ޝަހީމާއި ގުޅުވައިގެންވެސް ބަޔަކު ދަނީ ވާހަކަތައް ފަތުރަމުންނެވެ. އެގޮތުން ޝަހީމްގެ އަތުން ގާސިމް 480،000 ރުފިޔާ ނަގާފައިވާ ކަމަށާ އެ ފައިސާ ނުދީގެން މިދިޔަ ހަފްތާގެ ތެރޭގައި ގުރޫޕެއް ފޮނުވައިގެން ގާސިމަށް އިންޒާރު ދީފައިވާ ކަމަށެވެ.
ނަމަވެސް ޝަހީމް މިއަދު ނެރުއްވި ބަޔާނެއްގައި ވަނީ އެ ވާހަކަތައް ދޮގުކޮށްފައެވެ. ޝަހީމް ވިދާޅުވީ ގާސިމަށް އެއްވެސް ފައިސާއެއް ދީފައިނުވާނެ ކަމަށާ ގާސިމަކީ އޭނާ ދަންނަ މީހެއް ނޫން ކަމަށެވެ. އަދި އަނިޔާވެރި ގޮތަކަށް މަރާލި ގާސިމްގެ މަރާއި އޭނާއާއި ގުޅުވައި ވާހަކަދައްކަނީ މީގެ ކުރިންވެސް އޭނާއާއި ގުޅޭގޮތުން ދޮގު ވާހަކަތައް ފަތުރަމުންދާ ބައެއް ކަމަށްވެސް ވަނީ ބުނެފައެވެ.
ޝަހީމްގެ ބަޔާނުގައި ވަނީ ގާސިމްގެ މަރުގެ ހަގީގަތް ހޯދާ، އެ ގަތުލުގެ ފަހަތުގައިވާ މީހުން އިންސާފުގެ ކުރިމައްޗަށް ގެނައުމަށްވެސް ގޮވާލާފައެވެ.
ގާސިމްގެ މަރާއި ގުޅޭގޮތުން މިހާތަނަށް ފުލުހުން މާގިނަ މައުލޫމާތުތަކެއް ހާމަކޮށްފައެއް ނުވެއެވެ. އަދި މިހާތަނަށް މީހަކު ހައްޔަރުކޮށްފައިނުވާ ކަމަށްވެސް ވަނީ ބުނެފައެވެ.
ގާސިމްގެ ބައެއް ރަހްމަތެރިން ބުނީ އޭނާއަށް އެފަދަ އަނިޔާއެއް ދޭންޖެހޭ ސަބަބެއް ނޭންގޭ ކަމަށެވެ. މަޑުމައިތިރި މީހުންނާ ގުޅޭ ގާސިމްއަކީ މީގެ 20 އަހަރު ކުރިން ފެށިގެން ޓެކްސީ ކުރަމުންދާ މީހެކެވެ. ގާސިމް މަރާލި ދުވަހުގެ ކުރީ ދުވަހުގެ ހަވީރު މާލޭގައި ގާސިމް ދުއްވާ ޓެކްސީއާއި ސައިކަލެއް ޖެހި އެކްސިޑެންޓްވެފައިވާ ކަމަށް ބައެއް މީހުން ބުނެއެވެ. އަދި އެވަގުތު ސައިކަލްގައި ތިބި މީހުން ގާސިމަށް އިންޒާރު ދީފައިވާ ކަމަށްވެސް އަޑު ފެތުރިފައިވެއެވެ. އެކަމާ ގުޅޭގޮތުންވެސް ފުލުހުންގެ ބަހެއް އަދި ނުލިބެއެވެ.