ނަވާރަ ވަނަ ރައްޔިތުންގެ މަޖިލީހުގެ ތިން ވަނަ ދައުރުގައި މަޖިލީހަށް އެންމެ މަދުން ހާޒިރުވީ މެންބަރަކަށް މީދޫ ދާއިރާގެ މެންބަރު އަހުމަދު ސިޔާމް މުހައްމަދު އަދި އެންމެ ގިނައިން ސަލާމުގައި ހުންނެވި މެންބަރަކަށް ފުނަދޫ ދާއިރާގެ މެންބަރު މުހައްމަދު ޝާހިދު ވެއްޖެ އެވެ.
މަޖިލީހުން އާންމުކޮށްފައިވާ ނިމުނު ދައުރުގެ ހާޒިރީއަށް ބަލާއިރު 11 ޖަލްސާއަށް ސިޔާމް ވަޑައިގެންފައެއް ނުވެއެވެ. އަދި ފަސް ޖަލްސާއަށް ސަލާމް ވިދާޅުވެފައިވެއެވެ. ފުނަދޫ ދާއިރާގެ މެންބަރު މުހައްމަދު ޝާހިދު 11 ޖަލްސާއަށް ސަލާމް ވިދާޅުވެފައިވެއެވެ. އެއީ ނޮވެންބަރު މަހު ބޭއްވި 13 ޖަލްސާގެ ތެރެއިން 11 ޖަލްސާއަށެވެ. ނަމަވެސް އޮކްޓޫބަރު މަހު ބޭއްވި ހުރިހާ ޖަލްސާއަކަށްވެސް އޭނާ ހާޒިރުވެފައިވެއެވެ. މެންބަރު ޝާހިދު ސަލާމް ވިދާޅުވީ އާލާސްކަންފުޅާ އުޅުއްވާތީއެވެ.
ހާޒިރީގެ ފުލުގައި ދެން އުޅެނީ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލްލަތީފެވެ. އޭނާވެސް 9 ޖަލްސާއަށް ސަލާމް ވިދާޅުވެފައިވެއެވެ. ޔާސިރުވެސް ސަލާމްގައި ހުންނެވީ ފަރުވާއަކަަށެވެ. މަނަދޫ ދާއިރާގެ މެންބަރު އަހުމަދު ހާރޫން ހަތް ޖަލްސާއަށް ވަޑައިނުގެން ސަލާމް ވިދާޅުވެފައިވާއިރު ކާށިދޫ ދާއިރާގެ މެންބަރު އަބްދުﷲ ޖާބިރު ހަ ޖަލްސާއަށް ވަޑައިނުގަންނަވައެވެ.
ތުޅާދޫ ދާއިރާގެ މެންބަރު ހިސާން ހުސައިން ދަތުރުފުޅެއްގައި ރާއްޖެއިން ބޭރުގައި ހުންނެވުމުގެ ސަބަބުން 13 ޖަލްސާއަށް ހާޒިރުވެވިފައެއް ނުވެއެވެ. އަދި އެއް ޖަލްސާއަށް ސަލާމް ވިދާޅުވެފައިވެއެވެ.
މަޖިލީހުގެ ނިމިގެންދިޔަ ދައުރުގައި 33 ޖަލްސާ ވަނީ ބާއްވާފައެވެ. މި ދައުރުގައި މެންބަރުންގެ ހާޒިރީ ބޮޑުތަނުން ރަނގަޅުކަން ފާހަގަކޮށްލެވެއެވެ.