އެކްސްޓްރާޓައިމްގައި ރޮބާޓޯ ފިރުމީނޯ ކާމިޔާބު ކުރި ލަނޑުން ފްލެމިންގޯގެ މައްޗަށް 1-0 ގެ ނަތީޖާ އަކުން ކާމިޔާބު ހޯދައި ކުލަބު ވޯލްޑް ކަޕްގެ ޗެމްޕިއަންކަން ލިވަޕޫލް ހޯދައިފި އެވެ.
ލިވަޕޫލްގެ މި ކާމިޔާބާ އެކު އެ ޓީމު ވެފައި ވަނީ އެއް އަހަރު ތެރޭ އިންޓަނޭޝަލް ތިން ތަށި ހޯދި އިނގިރޭސި ފުރަތަމަ ކުލަބަށެވެ. އެއީ ޗެމްޕިއަންސް ލީގާއި، ޔޫއެފާ ސުޕާ ކަޕް އަދި ރޭ ހޯދި ކުލަބު ވޯލްޑް ކަޕް ހިމަނައިގެންނެވެ.
ޕްރިމިއާ ލީގްގެ އެއް ވަނައިގައި އޮތް ޓީމަށް އިނގިރޭސި ޕްރިމިއާ ލީގް ކާމިޔާބު ކުރުމުގެ ފުރުސަތުވެސް ވަރަށް ބޮޑެވެ.
ބްރެޒިލަށް ނިސްބަތްވާ ފްލެމިންގޯގެ ހިތް ލިވަޕޫލްގެ ބްރެޒިލްގެ ފޯވަޑް ރޮބާޓޯ ފިރުމީނޯ ހަލާކު ކޮށްލީ އެކްސްޓްރާ ޓައިމްގެ ނުވަ ވަނަ މިނެޓްގައި ކާމިޔާބު ކުރި ލަނޑުންނެވެ.
އޭގެ ކުރިންވެސް ލަނޑު ޖަހާނެ ތިން ފުރުސަތެއް ފިރުމީނޯއަށް ލިބިގެން ދިޔަ އެވެ. ސެޑިއޯ މާނޭ، ތަނަވަސްކޮށްދިން ފުރުސަތަކުން ފިރުމީނޯ ލަނޑު ޖެހިނަމަވެސް އެ ބޯޅަ ސަޕްލައި ކޮށްދިނުމުގައި ޖޯޑަން ހެންޑަސް މިޑްފީލްޑްގެ ތެރެއިން އަދާ ކުރި ދައުރުވެސް ފާހަގަ ކުރަން ޖެހެ އެވެ.