މިދިޔަ އަހަރު ނުކުތް ކަރަން ޖޯހަރް ޕްރޮޑިއުސްކުރި ބޮޑު ބަޖެޓް ފިލްމު ރިލީޒްކުރުމުގެ ކުރިން އެ ފިލްމު ކާމިޔާބުވާނެކަމުގެ އުންމީދު ގިނަ ބަޔަކަށް އޮތެވެ. ފިލްމުގެ ކާމިޔާބީގެ އުންމީދު ބޮޑުވީ ވަރުން ދަވަން އާއި އާލިއާ ބަޓް ފަދަ ކާމިޔާބު އަދި ގިނަ ބައެއްގެ މަގްބޫލުކަން ހޯދާފައިވާ ޖޯޑެއް ފިލްމުގެ ލީޑު ރޯލު ކުޅޭތީ އެވެ. އަދި މި ދެ ތަރިން ފިޔަވައި ވެސް އިތުރު ގިނަ ތަރިން ތަކެއް ފިލްމުގައި މުހިއްމު ރޯލުތައް ކުޅޭތީ ފިލްމާ މެދު ކުރެވުނު އުންމީދުތައް އޮތީ އިތުރު ވެފަ އެވެ.
"ކަލަންކް" ގައި މާދުރީ ޑިކްޝިޓް، ސަންޖޭ ދަތު، ސޮނާކްޝީ ސިންހާ އަދި އަދިތުޔާ ރޯއި ކަޕޫރު ވެސް މަސައްކަތް ކުރި އެވެ.
ނަމަވެސް މިހުރިހާ ތަރިން އެކުވެގެން ވެސް ފިލްމަށް ބެލުންތެރިންގެ ޝައުގުވެރިކަން ހޯދޭނެ ގޮތެއް ނުވެ ފިލްމު ވަނީ ފްލޮޕްވެފަ އެވެ.
އިއްތިފާގުން "ކަލަންކް" ވެފައިވަނީ ވަރުންގެ ހަތް އަހަރުވީ ފިލްމީ ކެރިއަރުގައި ވެސް ނާކާމިޔާބީ އާ ކުރިމަތިވި ފުރަތަމަ ފިލްމަށެވެ.
މިކަމާ ގުޅޭ ގޮތުން ވާހަކަ ދައްކަމުން ދާދިފަހުން ދިން އިންޓަވިއު އެއްގައި ވަރުން ބުނެފައިވަނީ ކާމިޔާބީ އާއި ނާކާމިޔާބީ އަކީ ކޮންމެ އިންސާނަކަށް ވެސް ކުރިމަތިލާން ޖެހޭނެ ކަންތައްތައް ކަމަށާއި ނާކާމިޔާބީ އަކީ ކަންކަން އިތުރަށް ދަސްކުރަން ލިބޭ ފުރުސަތެއް ކަމަށް ދެކޭ ކަމަށެވެ.
"އެކްޓަރެއްގެ ހައިސިއްޔަތުން 'ކަލަންކް' އަކީ އަހަރެންގެ ފުރަތަމަ ނާކާމިޔާބީ. އެ ނާކާމިޔާބީން އަހަރެންނަށް ލިބުނު ޕޮޒިޓިވް އެނާޖީ އަހަރެން ބޭނުންކުރީ "ސްޓްރީޓް ޑާންސާ 3ޑީ" އަށް. އެ ފިލްމުގައި އަހަންނަށް ޑައިރެކްޓަރު ރޭމޯ ޑިސޫޒާ އާއި ޝްރައްދާ އާއެކު މަސައްކަތް ކުރުމުގެ ދެ ވަނަ ފުރުސަތެއް ލިބުމުން އަހަރެން ވަރަށް ހިތްހަމަޖެހުނު،" ވަރުން ބުންޏެވެ.
"ކަލަންކް" ވެފައިވަނީ ވަރުންގެ ހަތް އަހަރުވީ ފިލްމީ ކެރިއަރުގައި ވެސް ނާކާމިޔާބީ އާ ކުރިމަތިވި ފުރަތަމަ ފިލްމަށެވެ.