ކޮމަންވެލްތް ގޭމްސް ފެޑަރޭޝަންގެ ސްޕޯޓްސް ކޮމިޓީއަށް ކުރިމަތިލައްވަން މޯލްޑިވްސް އޮލިމްޕިކް ކޮމިޓީގެ ޖެނެރަލް ސެކްރެޓަރީ އަހުމަދު މަރުޒޫގް (މަރޭ) ނިންމަވައިފި އެވެ.
ކޮމަންވެލްތް ގޭމްސްގެ ސްޕޯޓްސް ކޮމިޓީ އަކީ ކޮންމެ ހަތަރު އަހަރުން އެއް އަހަރު ބާއްވާ ގޭމްސްގެ އެންމެހާ ކަންކަން ބަލަހައްޓައި ނިންމާނެ އެންމެ އިސް ކޮމިޓީ އެވެ. މި ކޮމިޓީ އަށް މެމްބަރުން އިންތިހާބު ކުރާނީ އަންނަ އަންގާރަ ދުވަހު އެވެ.
ކުލަބު ވެލެންސިއާ އާއި އައިއެފްސީ އަށް ކުޅުނު ކުރީގެ ފުޓްބޯޅަ ކުޅުންތެރިޔާ މަރޭ އަކީ ކުޅިވަރު ހިންގުމުގައި ރާއްޖޭގައި ގިނަ ތަޖުރިބާތަކެއް ހާސިލްކޮށްފައިވާ ބޭފުޅެކެވެ. އޮލިމްޕިކް ކޮމިޓީ އަށް ވަޑައިގަތުމުގެ ކުރިން އޭނާ ވަނީ ވީބީ އާއި ވިކްޓަރީގައި މަސައްކަތްކޮށްފަ އެވެ.
އޭނާގެ އިސް ނެގުމާއެކު މިހާތަނަށް ރާއްޖެ އަށް ލިބުނު އެންމެ ބޮޑު ކާމިޔާބަކީ އެންމެ ފަހުގެ އިންޑިއަން އޯޝަން އައިލެންޑް ގޭމްސްއިން ބާރު ދުވުންތެރިޔާ ހަސަން ސާއިދު ރަންމެޑަލް ހޯދުމެވެ. އެއްވެސް ބަޔަކު ގަބޫލު ނުކޮށް ތިއްބާ މީގެ ތިން އަހަރު ކުރިން ސާއިދު ތަމްރީނަށް ޖެމެއިކާ ހައިޕާފޯމަންސް ސެންޓަރަށް ފޮނުވުމުގެ އިސް މީހަކީ ވެސް އޭނާ އެވެ.