ހާވާޑް ޔުނިވާސިޓީގެ ސައިންސްވެރިންގެ ފަހުގެ ހޯދުމަކުން ދައްކާފައިވާ ގޮތުގައި ޕްރޮޓޮން ޕަމްޕް އިންހިބިޓާޒް (ޕީޕީއައިއެސް) ބޭނުން ކުރުމަކީ ބަނޑުގެ ކެންސަރު ޖެހުމުގެ ނުރައްކާ ދެ ގުނައަށް އިތުރުވާ ކަމެކެވެ.
ބަނޑަށް ޖެހޭ ކެންސަރުގެ ތެރެއިން ގިނަ ކެންސަރަކީ ޖަރާސީމަކުން ބަނޑުގެ އެތެރެ ފަށަލަ ހަލާކުވެގެން ޖެހޭ ކެންސަރެކެވެ.
ޕީޕީއައިއެސް އުފައްދާފައި ވަނީ ބަނޑުގައި ހުންނަ އެސިޑްތައް ގޮހޮރުން ބޭރު ކޮށްލުމަށެވެ. އަދި އެސިޑް އުފެދުނަ ނުދީ ހިފަހައްޓާށެވެ. ބަނޑުގައި ހުންނަ އެސިޑަކީ ހަގީގަތުގައި ބަނޑުގައި ހުންނަ ޖަރާސީމު ގިނަވިޔަ ނުދީ ހިފެހެއްޓުމުގައި ބޭނުމުގައި ހުންނަ އެއްޗެކެވެ.
ޕީޕީއައިއެސްގެ ބޭސްތައް ބޭނުން ކުރުމުން ބަނޑުގެ އެތެރެ ދުލި ހަލާކުވެ ކެންސަރަށް ބަދަލުވުމުގެ ނުރައްކާ އިތުރުވެ އެވެ. މިއީ މި ފަދަ ބޭހެއްގެ ޑޯޒެއް ބޭނުންކުރުމުން ނުވަތަ ބޭސް ބޭނުން ކުރަމުންދާ ދުވަސްވަރު ވެސް ދިމާވެދާނެ ކަމެކެވެ.
ހަފުތާއަކު އެއް ފަހަރު ކަހަލަ ގޮތަކަށް މި ބޭސް ބޭނުންކުރާ މީހުންނަށް ވުރެ ކޮންމެ ދުވަހަކު ގަވާއިދުން މި ބޭސް ބޭނުންކުރާ މީހުންގެ ބަނޑަށް ކެންސަރު ޖެހުމުގެ ނުރައްކާ ހަތަރު ގުނަ އިތުރު ކަމަށް ވެސް ސައިންސްވެރިން ބުނެ އެވެ.
ހަމަ އެގޮތަށް އަހަރެއްހާ ދުވަހަކުގެ ދިގު މުއްދަތަކަށް މި ވައްތަރުގެ ބޭސްތައް ބޭނުންކުރުމުން ކެންސަރުގެ ނުރައްކާ ފަސް ގުނަ އިތުރުވެ އެވެ. އަދި ހަތަރު ފަސް ވަރަކަށް އަހަރު ގަވާއިދުން މި ބޭސް ކާނަމަ ކެންސަރުގެ ނުރައްކާ އަށް ގުނަ އިތުރުވާ ކަމަށް ވެއެވެ.
މި ދިރާސާގައި ފާހަގަކޮށްފައިވާ އެންމެ ޝައުގުވެރިވާ އެއް ކަމަކީ މި ބޭސް ބޭނުންކުރާ އެންމެންނަކީ ވެސް ގޭހުގެ މައްސަލަތައް ޖެހިގެން ގިނަ ދުވަސްތަކަކު މި އުނދަގުލުގައި އުޅޭ މީހުންނަށް ވުމެވެ.
ހަގީގަތުގައި ބަނޑުގައި ގޭސް އުފެދުމުގެ މައްސަލަ އަކީ ހަޖަމުކުރުމާ ގުޅޭ ކަމެއް ނޫނެވެ. މި މައްސަލަ އަސްލު ދިމާވަނީ ބަނޑުގެ އެތެރޭގައި ލެވިފައިވާ ތުނި ފަށަލައަށް ގެއްލުން ވެގެންނެވެ. އެހެންކަމުން ގޭހުގެ މައްސަލަތަކަށް ހުންނަ އެންޓޭސިޑް، އެސިޑް ރިޑިއުސާ، ޕީޕީއައިއެސް، އަދި މި ނޫނަސް މިފަދަ ހުރިހާ ވައްތަރެއްގެ ބޭހަކީ ވެސް މި މައްސަލައަށް ވަގުތީ ހައްލެއް ހޯދައިދޭނެ އެއްޗިއްސެވެ. މީގެން އެއްވެސް ބޭހެއް ކައިގެން ދާއިމީ ހައްލެއް ނުލިބޭނެ އެވެ.
ޕީޕީއައިއެސް ބްރޭންޑް ނަމުގެ ދަށުން އުފައްދާ ބޭސްތަކުގެ ތެރޭގައި ޕްރިލޯސެކް، ނެކްޒިއަމް، ޕްރިވޭސިޑް، ޕްރޮޓޮނިކްސް، ޕެންޓޮލޮކް އަދި އެސިޕެކްސް ހިމެނެ އެވެ.