ބިދޭސީ އެއްގެ އަތުން ފައިސާ ފޭރެން އުޅުނު ފުލުހަކު ހައްޔަރު ކޮށްފި އެވެ.
ފުލުހުން ބުނީ އިއްޔެ ހިންގި އޮޕަރޭޝަނެއްގައި ބަންގްލަދޭޝް ރައްޔިތެއްގެ އަތުން ފައިސާ އާއި ވޯކް ޕާމިޓް ފޭރެން އުޅުނު ކަމުގެ ތުހުމަތުގައި ދެ މީހަކު ހައްޔަރު ކޮށްފައިވާ ކަމަށެވެ. އަދި އޭގެ ތެރެއިން އެކަކީ ފުލުހެއް ކަމަށާއި ދެވަނަ މީހަކީ ބަންގަލަދޭޝް މީހެއް ކަމަށެވެ.
ފުލުހުން ބުނީ މި މައްސަލާގައި ހައްޔަރު ކޮށްފައިވާ 26 އަހަރުގެ ފުލުސް މީހާ އަކީ ފުލުހުންގެ ލާންސް ކޯޕްރަލްގެ މަގާމުގައި ހުރި މީހެއް ކަމަށެވެ. މިހާރު އޭނާ ވަނީ ވަޒީފާގެ މަސްއޫލިއްޔަތުތަކާއި ދުރުކޮށްފައެވެ. އަދި އޭނާގެ މައްސަލަ ފުލުހުންގެ ޕްރޮފެޝަނަލް ސްޓޭންޑާޑް ކޮމާންޑުން ބަލަމުންދާ ކަމަށްވެސް ފުލުހުން ބުންޏެވެ.
މީގެ އިތުރުން ހައްޔަރު ކުރެވުނު 28 އަހަރުގެ ބަންގްލަދޭޝް މީހާއަކީ އިމިގްރޭޝަންގެ ގާނޫނާއި ހިލާފަށް ރާއްޖޭގައި ދިރިއުޅެމުންދާ މީހެއް ކަމަށްވެސް ފުލުހުން ބުންޏެވެ.
މި މައްސަލައިގެ ޖިނާއީ ތަހްގީގެއް ފުލުހުން ދަނީ ކުރަމުންނެވެ.