މިނިވަން 50 ޗެމްޕިއަންޝިޕް ފުޓްބޯޅަ މުބާރާތުގައި ގދ އަތޮޅު މުބާރާތުގައި ތިނަދޫ އާއި ހޯނޑެއްދޫ މިއަދު ކުޅުނު މެޗު ނިމެންދަނިކޮށް ދެ ޓީމުގެ ކުޅުންތެރިންނާއި ސަޕޯޓަރުން ދަނޑަށް އަރައި ހަމަނުޖެހުން ހިންގުމުން މެޗު ހުއްޓާލައިފި އެވެ.
ހޯނޑެއްދޫގައި ކުޅުނު މި މެޗުގައި ދެ ޓީމުން ހަމަނުޖެހުން ހިންގީ އިތުރު ވަގުތުގެ ފަސް މިނިޓް ކުޅެމުންދަނިކޮށް ހޯނޑެއްދޫ ކުޅުންތެރިއަކު ކުރި ފައުލަކާ ގުޅިގެން ކަމަށް އެފްއޭއެމުން ބުނެ އެވެ. އެއިރު 2-1އިން ކުރީގައި އޮތީ ތިނަދޫ އެވެ.
މިމެޗު ހުއްޓާލަންޖެހުމާ ގުޅިގެން އެފްއޭއެމުން ދަނީ އެކަން ބަލަމުންނެވެ.
މި މުބާރާތުގައި މިއަދު ހަވީރު ށ. އަތޮޅުގައި ކުޅުނު މެޗު 5-0އިން ކާމިޔާބު ކުރީ ށ. މިލަންދޫ އެވެ. އެއީ ޅައިމަގާ ވާދަކޮށެވެ.
ހަފުތާ ބަންދުގައި ހޯމް އެންޑް އަވޭ އުސޫލުން ކުޅޭ މުބާރާތުގައި މިއަދު ނ. އަތޮޅު ޅޮހީ ޓީމާއި މާފަރު ބައްދަލުކޮށް 1-0އިން މެޗު ކާމިޔާބު ކުރީ މާފަރެވެ. އަދި . އަތޮޅުގައި ވޭވަށާއި ދިގުރަށް ބައްދަލުކުރި މެޗު 3-1އިން ކާމިޔާބު ކުރީ ވޭވަށެވެ.