ނިއުގެ ކުރީގެ ކޯޗު ބަލްގޭރިޔާގެ ވެލީޒާ ޕޮޕޯފް ގައުމީ ޓީމުން ވަކިކުރުމަށްފަހު އެފްއޭއެމުން މިހާރު ވަނީ އެ މަގާމަށް ގެންނާނެ މީހަކު ނިންމައިފަ އެވެ. އެއީ ކާކުކަން ނުބުނި ނަމަވެސް އެފްއޭއެމުން ބުނާގޮތުގައި ގައުމީ ކޯޗުކަމަށް ދެން ގެންނާނީ އޭޝިޔާގެ ފުޓްބޯޅަ އެނގޭ އަދި ވޯލްޑް ކަޕަށް ގައުމެއް ކޮލިފައިކޮށްދިން ކޯޗެކެވެ. އެހެންވިއްޔާ އެމީހަކީ ނިއުޒީލޭންޑްގެ ކުރީގެ ގައުމީ ކޯޗު ރިކީ ހާބަޓް ހެއްޔެވެ؟
އުމުރުން މިހާރު 54 އަހަރުގެ ރިކީ ހާބަޓް އަކީ 2005 ވަނަ އަހަރުން ފެށިގެން 2013 ވަނަ އަހަރުގެ ނިޔަލަށް ނިއުޒީލޭންޑްގެ ގައުމީ ކޯޗެވެ. ދެހާސް ދިހަވަނަ އަހަރު ދެކުނު އެފްރިކާގައި ބޭއްވި ވޯލްޑް ކަޕް ފުޓްބޯޅަ މުބާރާތަށް ނިއުޒީލޭންޑް ކޮލިފައިކޮށްދީ ދުނިޔޭގެ އެންމެ ޝަރަފުވެރި މުބާރާތުގައި އެ ގައުމަށް ކޯޗުކޮށްދިނީ ވެސް އޭނާ އެވެ. އޭނާ ގައުމީ ކޯޗުކަމުން ވަކިވީ 2014 ވަނަ އަހަރުގެ ވޯލްޑް ކަޕަށް ނިއުޒީލޭންޑް ކޮލިފައިކޮށްނުދެވުމުންނެވެ، ރިކީ ހާބަޓް މި ވަގުތު ހުރީ ވަޒީފާއެއްނެތި ހުސްކޮށެވެ. ކޯޗާއެކު މިހާރު އެއްބަސްވެވިއްޖެކަމަށް އެފްއޭއެމުން ބުނާއިރު ރާއްޖެ އަށް އަންނަން އޭނާ އެއްބަސްވެދާނެ ސަބަބަކީ ވެސް މިވަގުތު ވަޒީފާއަކަށް ބަލަމުންދިއުމެވެ.
ކޯޗިން ކެރިއަރުގައި މިދިޔަ އަހަރު އިންޑިއަން ސުޕަލީގުގައި އިންޑިޔާގެ ނޯތް އީސް ޔުނައިޓެޑަށް ކޯޗުކޮށްދީ ލީގުގެ އަށް ވަނަ މަގާމު އެ ޓީމަށް ހޯދައިން ރިކީ ހާބަޓް އަކީ ފުންނާބު އުސް ކުރީގެ ޑިފެންޑަރެކެވެ. އޭނާ ވަނީ 20 އަހަރުން ދަށުގެ ގައުމީ ޓީމުން ފެށިގެންގޮސް ނިއުޒީލޭންޑްގެ ގައުމީ ޓީމަށް ވެސް 1980 އިން 1989 ވަނަ އަހަރާ ހަމައަށް ކުޅެފަ އެވެ. ގައުމީ ޓީމަށް ކުޅުނު 61 މެޗުގައި ފަސް ގޯލު ވެސް ޖެހި އެވެ.
މީގެ އިތުރުން 1982 ވަނަ އަހަރު ސްޕޭނުގައި ބޭއްވި ވޯލްޑް ކަޕުގައި ކުޅުނު ނިއުޒީލޭންޑް ޓީމުގައި ވެސް އޭނާ ކުޅުނެވެ. އެ މުބާރާތުގައި ސްކޮޓްލޭންޑް އަތުން ނިއުޒީލޭންޑް ބަލިވި މެޗުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް ނަމަވެސް ސޯވިއެޓް ޔޫނިއަން އާއި ބްރެޒިލާ ދެކޮޅަށް ކުޅެ ބަލިވި ދެ މެޗުގައި އޭނާ ފުރަތަމަ 11ގައި ކުޅުނެވެ.
ކުޅުންތެރިއެއްގެ ގޮތުގައި ހާބަޓް ވަނީ އިނގިރޭސިވިލާތުގެ މަޝްހޫރު ސައުތެމްޓަނުގެ ބީ ޓީމުގައި ވެސް ދުވަސްކޮޅަކު ކުޅެފަ އެވެ. އަދި ކުރީގެ މަޝްހޫރު ކުލަބު ވޮލްވަހެމްޓަންގައި 1984 އިން 1986 އަށް އޭނާ ވަނީ 45 މެޗު ކުޅެފަ އެވެ.
ގައުމީ ޓީމާ ހަވާލުވުމުގެ ކުރިން 20 އަހަރުން ދަށުގެ ގައުމީ ކޯޗުކަން ވެސް ކުރި ހާބަޓް ވަނީ އޭނާގެ 1980 ވަނަ އަހަރު ނިއުޒީލޭންޑްގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމާއި 2007 އަދި 2010 ވަނަ އަހަރު ނިއުޒީލޭންޑްގެ އެންމެ މޮޅު ކޯޗުގެ މަގާމު ވެސް ހޯދައިފަ އެވެ.
އިތުބާރުހުރި ގޮތަކަށް އެނގިފައިވާ ގޮތުގައި ގައުމީ ޓީމަށް ގެންނަ ކޯޗު ޓީމާ ބައްދަލުކުރާނީ އަންނަ މަހުގެ އަށް ވަނަ ދުވަހު ވޯލްޑް ކަޕް ކޮލިފައިންގައި ޗައިނާއާ ދެކޮޅަށް ރާއްޖެ ކުޅޭ މެޗަށް ފަހު އެ ގައުމުންނެވެ.