މި މަހުގެ 15 ވަނަ ދުވަހު ފަށާ ޕްރެޒިޑެންޓްސް ކަޕް ފުޓްބޯޅަ މުބާރާތުގައި ވާދަކުރާ ކޮންމެ ޓީމަކަށް ވެސް ތައްޔާރުވުމަށް 70000ރ. ދިނުމަށް އެފްއޭއެމުން ނިންމައިފި އެވެ.
މި ފައިސާ އަކީ މި ފަހަރުގެ މުބާރާތް އައްޑޫސިޓީ އާއި ހދ. ކުޅުދުއްފުށީގައި ބާއްވަން ޖެހޭތީވެ ގައުމީ ފުޓްބޯޅަ އިދާރާއިން ކުލަބުތަކަށް އެހީއެއްގެ ގޮތުން ދޭ ފައިސާ އެވެ.
އެފްއޭއެމުން ބުނީ މި ފަހަރުގެ މުބާރާތް އަތޮޅުތެރޭގައި ބާއްވަން ޖެހުމުން ގާތްގަނޑަށް ހަތް މިލިއަނަށްވުރެ ގިނަ ފައިސާ މުބާރާތަށް ހަރަދުވާނެ ކަމަށެވެ.
ގައުމީ މުބާރާތުގެ ޗެމްޕިއަން ޓީމަށް ދޭން ނިންމާފައިވަނީ ބައިމިލިއަން ރުފިޔާ އެވެ. މި މުބާރާތުގެ ޗެމްޕިއަން ޓީމަށް އަންނަ އަހަރުގެ އޭއެފްސީ ކަޕުން ވެސް ފުރުސަތު ލިބޭނެ އެވެ. އެއީ ގަލޮޅު ދަނޑުގެ ވިނަގަނޑު ހަލާކުވެފައިވާތީއާއެކު ޝެޑިއުލް ބިޒީވެ އެފްއޭކަޕް މި އަހަރު ނުބާއްވަން ނިންމުމުންނެވެ.
ގައުމީ މުބާރާތް ހުޅުވާނީ ކުޅުދުއްފުށީގަ އެވެ. އެ ރަށުގައި ކުޅޭނީ އެންމެ ފަހުގެ ތިން އަހަރުގެ ޗެމްޕިއަން ނިއު އާއި ޓީސީ އަދި ބީޖީ އާއި މަހިބަދޫ ހިމެނޭ ގްރޫޕުގެ މެޗުތަކެވެ. ވެލެންސިއާ އާއި މާޒިޔާ އަދި ވިކްޓަރީ އާއި އީގަލްސް ހިމެނޭ ގްރޫޕުގެ މެޗުތަކާއި ސެމީ ފައިނަލް ދެ މެޗާއި ފައިނަލް މެޗު ކުޅޭނީ އައްޑޫގަ އެވެ.