އެކުވެރިކަމުގެ ފުޓްބޯޅަ މެޗުގައި މިއަދު ހަވީރު ރާއްޖެއާ ދެކޮޅަށް ކުޅޭ މެޗުން ބަލިވާން ބޭނުންނުވާ ކަމަށާއި މިއީ ފައިނަލް މެޗެއް ކަމަށް ޕިލިޕީންސް ކޯޗު ތޯމަސް ޑޫލޭ ބުނެފި އެވެ.
ރާއްޖެ ގަޑިން މިއަދު ހަވީރު 5:00 ޖަހާއިރު ފިލިޕީންސްގެ ރިޒާލް މެމޯރިއަލް ސްޓޭޑިއަމުގައި ކުޅޭ މެޗާބެހޭ ގޮތުން ވާހަކަ ދައްކަމުން ކޯޗު ބުނީ ރާއްޖެ އަތުން ބަލިވާން ބޭނުން ނުވަނީ އަންނަ އަންގާރަ ދުވަހު އުޒުބަކިސްތާނާ ދެކޮޅަށް ވޯލްޑް ކަޕް ކޮލިފައިންގައި ކުޅުމުގެ ކުރިން ކުޅުންތެރިންގެ ފޯރީގައި ބައިތިއްބަން ބޭނުންވާތީ ކަމަށެވެ.
"އަހަރުމެންނަށް މިއީ ވަރަށް މުހިންމު މެޗެއް. އަހަރުމެން ހަގީގަތުގައި ވެސް ތައްޔާރުމިވަނީ ވޯލްޑް ކަޕް ކޮލިފައިންފައި އުޒުބަކިސްތާނާ ދެކޮޅަށް ކުޅެން. އަހަރެން ކުޅުންތެރިން ގާތުގައި ބުނިން މިނޫނީ [އެ މެޗުގެ ކުރިން] ރަހުމަތްތެރިކަމުގެ މެޗެއް ނެތްކަމަށް. އަހަރުމެން ކޮންމެ މެޗެއް ވެސް ނަގާނީ ސީރިއަސްކޮށް. އަހަރުމެން ބޭނުން ކޮންމެ މެޗަކުން ވެސް މޮޅުވާން،: ޑޫލޭ ބުންޏެވެ.
މި މެޗާ ބެހޭ ގޮތުން ޕިލިޕީންސް ޓީމުގެ އެންމެ އިސް ފޯވަޑް ފިލް ޔަންގަހަސްބަންޑް ވެސް ބުނީ ރާއްޖެ އަތުން މޮޅުވުން ވަރަށް މުހިންމު ކަމަށެވެ.
"އެންމެ މުހިންމީ ވޯލްޑް ކަޕް ކޮލިފައިން. އެކަމަކު އުޒުބަކިސްތާނާ ދެކޮޅަށް ކުޅުމުގެ ކުރިން ރަނގަޅު ނަތީޖާއެއް ބޭނުންވޭ. ވޯލްޑް ކަޕް ކޮލިފައިންގެ ކުރިން އަހަރުމެން ގޯސް ނަތީޖާއެއް ބޭނުމެއްނޫން. އަހަރުމެން ބޭނުންވަނީ މޮޅުވުމުގެ ރޫހު އަށަގަންނުވަން. އަހަރުމެންނަށް މިހާރު ވެސް [ދެ މެޗެއްގައި] ރަނގަޅު ނަތީޖާތައް ލިބިއްޖެ. އުޒުބަކިސްތާނާ ދެކޮޅަށް ކުޅުމުގެ ކުރިން އެކަން ތަކުރާރުކުރަން ބޭނުން،" މިދިޔަ އަހަރުގެ ޗެލެންޖް ކަޕުގައި ވެސް މޮޅަށް ކުޅުނު ކުޅުންތެރިޔާ ބުންޏެވެ.
މި މެޗަށް ނުކުންނައިރު ރާއްޖެއިން ވެސް ވަނީ މެޗުން ބަލިވާން ބޭނުންނުވާ ކަމަށް ބުނެފަ އެވެ. ރާއްޖެ ވެސް މި މެޗު ބޭނުންމިކުރަނީ ވޯލްޑް ކަޕް ކޮލިފައިންގައި އަންނަ އަންގާރަ ދުވަހު ޗައިނާއާ ދެކޮޅަށް ކުޅޭ މެޗަށް ތައްޔާރުވުމަށެވެ.
މި މެޗަށް ރާއްޖެ ނުކުންނައިރު އެފްއޭއެމުގެ ނޯމަލައިޒޭޝަން ކޮމިޓީގެ ޗެއާމަން މުހައްމަދު ޝަވީދު ވަނީ މީގެ ފަހުން ގައުމީ ޓީމު މޮޅުވާ ކޮންމެ މެޗަކަށް ކޮންމެ ކުޅުންތެރިއަކަށް 10000ރ. ބޯނަސްއެއް ދޭނެ ކަމަށް ވިދާޅުވެފަ އެވެ.