ދިރާގުން ސްކޮލާޝިޕްތަކަށް އެދޭނަމަ އެކި ދާއިރާތަކުން ސޮކޮލާޝިޕްގެ ފުރުސަތު ހޯދައިދޭން މަސައްކަތް ކުރައްވާނެ ކަމަށް ހަޔާ އެޑިއުކެޝަން މިނިސްޓަރު އިބްރާހިމް ހަސަން ވިދާޅުވެއްޖެ އެވެ.
އޭނާ މިހެން ވިދާޅުވީ ދިރާގު އެޕްރެންޓިސްޝިޕް ޕްރޮގްރާމުގެ 10 ވަނަ ބުރު ނިންމުމުގެ ރަސްމިއްޔާތު ޝަރަފްވެރި ކޮށްދެއްވާ ވާހަކަފުޅު ދައްކަވަމުންނެވެ.
މިނިސްޓަރު ވިދާޅުވީ ދިރާގުން ކުރިޔަށް ގެންދާ އެޕްރެންޓިސްޝިޕް ޕްރޮގްރާމަކީ ބައިވެރިން އަތުން އެއްވެސް އެއްޗެއް ނުނަގައި ގައުމީ މަސައްކަތެއްގެ ގޮތު އެ ކުންފުނިން ކުރަމުން އަންނަ މަސައްކަތެއް ކަމަށެވެ. އެކަން ފުޅާ ކުރުމަށް، ދިރާގުން އެދޭ ދާއިރާތަކުން ސްކޮލާޝިޕްގެ ފުރުސަތު ހޯދައިދޭން މަސައްކަތް ކޮށްދެއްވާނެ ކަމަށެވެ.
މިއަދު ހޮޓެލް ޖެންގައި ކުރިއަށް ގެންދިޔަ ރަސްމިއްޔާތެއްގައި ދިރާގު އެޕްރެންޓިސްޝިޕް ޕްރޮގްރާމްގެ 11 ވަނަ ބުރުގައި ހޮވުނު 17 ކުދިންނަށް ރަސްމީކޮށް މަރުހަބާ ކިޔުމުގެ އިތުރުން ވޭތުވެދިޔަ އަހަރުގެ އެޕްރެންޓިސްޝިޕް ޕްރޮގްރާމްގެ 27 ކުދިންގެ ދަސްވެނިވުން ފާހަގަ ކޮށްފައި ވެއެވެ.
މީގެ 10 އަހަރު ކުރިން ދިރާގުން ފެށި އެޕްރެންޓިސްޝިޕް ޕްރޮގްރާމް މަސައްކަތުގައި އެކިކަންކަމާއި ފަންނީ ތަފާތު ދާއިރާތަކުގައި މަސައްކަތް ކުރުމުގެ ފުރުސަތު 214 ކުދިންނަށް ދީފައި ވެއެވެ.
ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއިލް ރަޝީދު ވިދާޅުވީ، މި ޕްރޮގްރާމް މެދުވެރިކޮށް، ޒުވާނުން ވަޒީފާގެ މާހައުލަށް ހޭލުންތެރި ކުރުމަށް ހާއްސަ ޓްރެއިނިން ޕްރޮގްރާމް ތައް ކުރިއަށް ގެންދާ ކަމަށެވެ. އަދި މި ޕްރޮގްރާމަކީ ދިރާގުގެ މުވައްޒަފުންގެ މަސައްކަތުން ހިންގާ ފުރިހަމަ ޕްރޮގްރާމެއް ކަމަށެވެ.