ފުލުހުން އިންތިޒާމު ކޮށްގެން ބާއްވާ "ސައިބާ އެކްސްޕޯ 2024" ގެ ޑިޖިޓަލް ޕާޓްނަރަކަށް ދިރާގުން ސޮއިކޮށްފި އެވެ.
ސައިބާ އެކްސްޕޯ އޮންނާނީ ހުޅުމާލެ ސެންޓްރަލް ޕާކުގައި މިއަދުން ފެށިގެން ހުކުރު ދުވަހުގެ ނިޔަލަށެވެ.
މި އެކްސްޕޯގައި ސައިބާ ސެކިއުރިޓީގެ ދާއިރާއާ ގުޅޭ މީހުންނަށް ޕްލެޓްފޯމެއް ގާއިމުކޮށް، ސައިބާ ސެކިއުރިޓީއާ ގުޅޭ ގޮތުން އާންމުންނަށް މައުލޫމާތު ދިނުމަށް ވަނީ ހަމަޖެހިފަ އެވެ.
ސައިބާ ސެކިއުރިޓީއަށް ހޭލުންތެރިކަން އިތުރުކޮށް އެންމެފަހުގެ ޓެކްނޮލޮޖީ ކުރިއެރުވުމަށް ދިރާގުން ދަނީ ހާއްސަ އިސްކަމެއް ދެމުންނެވެ.
އެކްސްޕޯގައި ދިރާގުގެ ހެޑް އޮފް ސައިބާ ސެކިއުރިޓީ އިސްމާއިލް ފާއިޒްގެ ކީނޯޓް ސްޕީޗެއް މާދަމާ ދިނުމަށް ވަނީ ހަމަޖެހިފަ އެވެ. މި ކީނޯޓް ސްޕީޗްގެ މައުލޫއަކީ "ދިރާގު ނެޓްޕްރޮޖެކްޓް: ސޭފްގާޑް ޔޯ ޗައިލްޑްސް އޮންލައިން ވޯލްޑް" އެވެ.
އެ ގޮތުން ދިރާގުގެ ސޭފް ސޮލިއުޝަންތަކާ ގުޅޭ ގޮތުން މި ކީނޯޓް ސްޕީޗްގައި އަލިއަޅުވާލާނެ ކަމަށް ދިރާގުން ވަނީ ބުނެފަ އެވެ.
މީގެ އިތުރުން މި އެކްސްޕޯގައި ހުންނަ ދިރާގުގެ ސްޓޯލުން ދިރާގުގެ އެންމެ ފަހުގެ އުފެއްދުންތަކާއި ސައިބަ ސެކިއުރިޓީ ސޮލިޝަން އަދި ބިޒްނަސް ޓު ބިޒްނަސް ހިދުމަތްތަކުގެ މައުލޫމާތު ލިބޭނެ ކަމަށްވެސް ދިރާގުން ބުންޏެވެ.
ދިރާގުން އަންނަނީ ސައިބާ ސެކިއުރިޓީގެ މުހިންމުކަމާ ގުޅޭ ގޮތުން މައުލޫމާތުތައް ފޯރުކޮށްދީ އެކި ހަރަކާތްތަކުގައި ބައިވެރިވަމުންނެވެ. މީގެ އިތުރުން ދިރާގުން އަންނަނީ ޑިޖިޓަލް ކޮމިއުނިޓީއަށް އެކި ގޮތްގޮތުން އެހީތެރިކަން ފޯރުކޮށްދެމުންނެވެ.