ގައިދީންނަށް އެކަހެރި ބައްދަލްވުން ދެވޭނެ އިންތިޒާމު ހަމަޖައްސައިފި

ހުޅުމާލެއާ މާލެ ޖަލުގައި ތިބި ގައިދީންނާއި ބަންދުގައިވާ މީހުންނަށް އެކަހެރި ބައްދަލުވުމުގެ ފުރުސަތު ދިނުމުގެ އިންތިޒާމު ހަމަޖައްސައިފި އެވެ.

އެކަހެރި ބައްދަލުވުން ދެނީ ޝަރުއީ ކައިވެންޏެއް ކޮށްފައިވާ ފަރާތްތަކަށެވެ.

ހުޅުމާލެ ޖަލުގައި އެކަހެރި ބައްދަލުވުމަށް ހާއްސަކޮށް އިމާރާތްކުރެވުނު ތަން މިއަދު ހުޅުވައިދެއްވީ ކޮމިޝަނަރު އޮފް ޕްރިޒަންސް އަހްމަދު މުހައްމަދުފުޅުއެވެ.

މި ތަނުގެ ބޭނުމަކީ ހުޅުމާލެ އަދި މާލެ ޖަލުގައި ބަންދުކުރެވިފައިވާ މީހުންގެ ތެރެއިން އެކަހެރި ބައްދަލުވުން ދޭންޖެހޭ ގައިދީންނަށް އެ ފުރުސަތު ދިނުމުގައި މިހާރު ދިމާވަމުންދާ ދަތިތަކަށް ހައްލު ހޯދައިދިނުން ކަމަށް ކަރެކްޝަނުން ބުނެއެވެ.

އެކަހެރި ބައްދަލުވުން ދިނުމުގައި އަމަލުކުރެވޭނީ ގައިދީންނާއި، ކުށުގެ ތުހުމަތުގައި ހައްޔަރުގައި ތިބޭ މީހުންނާއި، ކޯޓު އަމުރެއްގެ ދަށުން ބަންދުގައި ބައިތިއްބަންޖެހޭ މީހުންނަށް ލިބިދޭންޖެހޭ އަސާސީ ހިދުމަތްތަކާއި އިނާޔާތްތަކާބެހޭ ގަވާއިދާއި އެ ގަވާއިދަށް އިސްލާހު ގެނައުމުގެ ގަވާއިދުގައި ބުނާގޮތަށް ކަމަށް ކަރެކްޝަނުން ބުނެއެވެ. މިގޮތުން އެކަހެރި ބައްދަލުވުން ދެވޭނީ މަހަކު ދެ ފަހަރު ކޮންމެ ފަހަރަކު 24 ގަޑިއިރަށެވެ.

އެކަހެރި ބައްދަލުވުމަށް އެދި ފޯމް ހުށަހަޅާނީ ސަރުކާރު ބަންދުނޫން ކޮންމެ ދުވަހެއްގެ ހެނދުނު 8:30 ން ފެށިގެން މެންދުރު 2:30 އާ ދެމެދު މާލޭ ޖަލުގެ ރިސެޕްޝަނަށެވެ.