ދައުލަތުގެ ބަޖެޓުގެ އެންމެ މަތީ އިންސައްތައެއް ހާއްސަ ކުރެވިފައިވަނީ ތައުލީމީ ދާއިރާއަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ރިނބުދޫ ސްކޫލްގެ ރަން ޔޫބީލް މުނާސަބަތުގައި މިރޭ ބޭއްވި ޖަލްސާގައި ދެއްކެވި ވާހަކަފުޅުގައެވެ.
ރައީސް ވިދާޅުވީ ރިނބުދޫ ސްކޫލްގެ އުމުރުން މިވީ 50 އަހަރުގެ ތެރެއިން، އެތައް އަހަރެއް ވަންދެން، ސްކޫލްގެ ހުރިހާ ކަމެއް ރާވައި ހިންގީ، ރަށުގެ ވެރިންނާއި ރައްޔިތުން ކަމަށެވެ. ނަމަވެސް މިއަދު ހާލަތު ބަދަލުވެ ސިޔާސަތުތައްވެސް ބަދަލުވެފައިވާކަން ފާހަގަކުރައްވާ ދަރިންނަށް ކިޔަވައިދިނުމަކީ ދައުލަތުގެ ޒިންމާއެއްގެ ގޮތުގައި ހަމަޖެހި، ދައުލަތުގެ ބަޖެޓުގެ އެންމެ މަތީ އިންސައްތައެއް، މިހާރު ޚާއްސަ ކުރެވިފައި އެކަމަށް ކަމަށް ރައީސް ވިދާޅުވިއެވެ.
"އަޅުގަނޑުމެންގެ ތައުލީމީ ސިޔާސަތު މިގޮތަށް ބަދަލުކުރީ، ވަރަށް ގިނަ ކަންކަމަށް ވިސްނުމަށްފަހު، އަދި ވަރަށް މަތިވެރި މަގްސަދެއް ހާސިލުކުރުމުގެ ބޭނުމުގައި. އެއީ ރާއްޖެ ހަލުވިމިނުގައި ތަރައްގީކޮށް ކުރިއެރުވުމަށް. އިގްތިސާދީ ގޮތުން ދުނިޔެއަށް އަންނަ ބަދަލުތަކާއި ތަރައްގީއާ އެއް ހަމައެއްގައި، އަޅުގަނޑުމެންގެ އިގްތިސާދީ ދުވެލި ބެހެއްޓޭނީ، އާންމު ރައްޔިތުންގެ ކިބައިގައި ތަރައްގީގެ ވިސްނުން އުފެދިގެން. އެކަން އަޅުގަނޑުމެންނަށް ހާސިލުކުރެވޭނީ، ދަރިންނަށް ޒަމާނީ ތައުލީމް އުނގަންނައިދީގެން." ރައީސް ވިދާޅުވިއެވެ.
ރައީސް ވިދާޅުވީ ދުނިޔެ އަންނަނީ ހުރިހާ ދާއިރާތަކަކުންވެސް، ވަރަށް ބޮޑަށް ކުރިއަރަމުން، ވަރަށް ބޮޑަށް ބަދަލުވަމުން ކަމަށާ އެހެންވީމާ، މިއަދު ދަރިންނަށް ދޭންޖެހެނީ މިޒަމާނުގެ ތައުލީމް ކަމަށެވެ. މިޒަމާނުގައި މަސައްކަތްތެރިކަމާއި ފަންނުވެރިކަންވެސް ކުރިއަރަމުން އަންނަނީ، ތައުލީމީ ފަލްސަފާގެ ތެރެއިން ކަމަށާ މިޒަމާނުގައި އިލްމާ ނުލައި ކުރާ އެއް ކަމެއްވެސް ނެތް ކަމަށެވެ.
"ވަޑާންކުރުންވެސް، އޮޑިދޯނިފަހަރު ބަނުންވެސް، ގެދޮރު އިމާރާތް ކުރުންވެސް، މިއިން ކޮންމެ މަސައްކަތަކީ، އިލްމީ އެތައް ތިއަރީއެއްގެ މައްޗަށް ބިނާކޮށް، ތަރައްގީކޮށްފައިވާ މަސައްކަތެއް. މިއީ، ވަކި ގްރޭޑަކުން ދަރިފުޅު ސްކޫލުން ވަކިކޮށް، މަސައްކަތަށް ފޮނުވާ ޒަމާނެއް ނޫން. އަދި މިއީ މަސައްކަތެއް ދަސްކޮށްނުދީ، ހަމައެކަނި ސްކޫލްގެ ފިލާވަޅުތައް ހިތުދަސްކުރާ ޒަމާނެއްވެސް ނޫން."
މިޒަމާނުގެ ތައުލީމަކީ، މަސައްކަތުގެ ހުނަރާ އެކުގައި އުނގެނޭ ތައުލީމެއްކަން ފާހަގަކުރައްވާ ރައީސް ވިދާޅުވީ ސްކޫލް މަރުހަލާގެ އެންމެ މުހިންމު އެއްކަމަކީ، ދަރިވަރުންގެ ކިބައިގައި ހުންނަ ހުނަރާއި ފަންނުތައް ދެނެގަނެ، އެ ހުނަރާއި ފަންނުތައް އިތުރަށް ތަރައްގީ ކުރެވޭނެ ގޮތަކަށް އަމާޒުކޮށްގެން ކިޔަވައިދިނުން ކަމަށެވެ. ވަށައިޖެހޭ ތައުލީމެއްގެ މައިގަނޑު އަސާސަކީވެސް އެއީ ކަމަށްވިދާޅުވިއެވެ.
"އެހެންވީމާ، މައިންބަފައިންވެސް، ދަރިންނަށް ކިޔަވައިދިނުމުގައި މި ކަންކަމަށް ސަމާލުކަން ދެއްވުމަކީ ވަރަށް މުހިންމު ކަމެއް. މި ހޯލުގައި މިތިބަ ދަރިވަރުންގެ ތެރޭގައިވެސް، ތަފާތު ފަންނުތަކާއި، ތަފާތު ހުނަރުތައް ލިބިފައި ތިބި ކުދިން ތިބޭނެ. އެކަން އެންމެ ބޮޑަށް ދެނެގަނެވޭނެ ބަޔަކީ، އެކުދިންގެ ބެލެނިވެރިންނާއި މުދައްރިސުން."
ސަރުކާރުގެ ތައުލީމީ ސިޔާސަތުގެ މައިގަނޑު އަމާޒަކީ، ޒަމާނީ ތައުލީމް އުނގެނި، އީޖާދީ އުފެއްދުންތެރިކަމަށް ވިސްނުން ހިންގާ، ހުނަރުވެރި ޖީލެއް ބިނާކުރުން ކަމަށާ ސާނަވީއާއި މަތީ ސާނަވީ ތައުލީމުން މަތީ ދަރަޖައިގައި ފާސްވާ ދަރިވަރުންނަށް، ވަރަށް ގިނަ ގައުމުތަކުގެ ޔުނިވާސިޓީތަކުން ކިޔެވޭނެ ފުރުސަތު ހަމަޖައްސައިދިނީ، އެ މަގްސަދު ހާސިލުކުރުމުގެ ބޭނުމުގައި ކަމަށް ރައަީސް ވިދާޅުވިއެވެ.